កាលពីព្រឹកថ្ងៃទី ១៦ ខែឧសភា សម្តេចក្រុមព្រះ នរោត្តម រណប្ញទ្ធិ ប្រធានគណបក្សហ្វ៊ុនស៊ិនប៉ិច បានយាងទៅសួរ សុខទុក្ខអ្នកគាំទ្រព្រះអង្គនៅជាយដែន ។ សម្តេចក្រុមព្រះ ដែលអមដំណើរដោយគណៈប្រតិភូក្នុងជួរបក្សរបស់ព្រះអង្គជា ច្រើនរូប បានយាងទៅឃុំស្វាយទងខាងត្បូង ក្នុងស្រុកកំពង់ត្រាច ខេត្តកំពត ។
លោក ម៉ៅ រ៉េត ជំទប់ទី ២ ឃុំស្វាយទងខាងត្បូង មកពីគណបក្សហ្វ៊ុនស៊ិនប៉ិច បានឱ្យដឹងថា អ្នកគាំទ្រព្រះអង្គជាង ២ពាន់នាក់ មកពីឃុំទាំង ១៤ក្នុងស្រុកកំពង់ត្រាច បាននាំគ្នាមកក្រាបបង្គំព្រះអង្គ ។ លោក ម៉ៅ រ៉េត បានប្រាប់ថា នេះជា លើកទីមួយហើយ ដែលព្រះអង្គបានយាងមកដល់មូលដ្ឋានដែលអ្នកគាំទ្រព្រះអង្គ ។ ក្រុមអ្នកគាំទ្រព្រះអង្គបានរួមគ្នាក្រាល កន្ទេលជំនួសកម្រាលព្រំ ថ្វាយដល់ព្រះអង្គយ៉ាងវែងផងដែរ ។
សម្តេចក្រុមព្រះ នរោត្តម រណប្ញទ្ធិ ប្រធានគណបក្សហ្វ៊ុនស៊ិនប៉ិច បានមានបន្ទូលទៅកាន់អ្នកគាំទ្រព្រះអង្គថា ទោះបី ការធ្វើដំណើរមានការលំបាកយ៉ាងណា ក៏ព្រះអង្គនៅតែមកជួបពលរដ្ឋជាអ្នកស្រឡាញ់ព្រះអង្គដែរ ។ ព្រះអង្គសប្បាយចិត្ត ណាស់ ដោយឃើញអ្នកគាំទ្រព្រះអង្គមកចូលរួមជាច្រើនជាងការរំពឹងទុកទៅទៀត។ ព្រះអង្គមានព្រះបន្ទូលយ៉ាងខ្លីថា ជិតដល់ថ្ងៃសម្រេចចិត្តហើយ សូមអញ្ជើញទៅបោះឆ្នោតឱ្យបានគ្រប់ៗគ្នា ។
នៅថ្ងៃទី ១៦ ខែឧសភា នេះដែរ សម្តេចក្រុមព្រះ ក៏បានជួបសំណេះសំណាលជាមួយអ្នកគាំទ្រព្រះអង្គនៅស្រុក បន្ទាយមាស ស្រុកកំពង់ត្រាច ហើយព្រះអង្គ៏យាងទៅខេត្តកែបទៀត ៕
