ឯកឧត្តម គង់ សោភ័ណ្ឌ បាននាំយកអំណោយមនុស្សធម៌កាកបាទក្រហមខេត្តកណ្តាល ចែកជូនពលរដ្ឋរងគ្រោះដោយខ្យល់កន្ត្រាក់ ៣៨គ្រួសារ

(ខេត្តកណ្ដាល)៖ នារសៀលថ្ងៃព្រហស្បតិ៍ ទី៣១ ខែមីនា ឆ្នាំ២០២២ ឯកឧត្តម គង់ សោភ័ណ្ឌ អភិបាល នៃគណ:អភិបាលខេត្តកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកណ្តាល បានដឹកនាំក្រុមការងារសាខាកាកបាទក្រហមកម្ពុជាខេត្តកណ្តាល នាំយកអំណោយមនុស្សធម៌ មកប្រគល់ជូនគ្រួសារដែលរងផលប៉ះពាល់ដោយខ្យល់កន្ត្រាក់ចំនួន ៣៨ គ្រួសារ ក្នុងនោះគ្រួសាររលំទាំងស្រុងចំនួន ០៨គ្រួសារ និងគ្រួសាររងគ្រោះធ្ងន់ធ្ងរ ៣០គ្រួសារ នៅឃុំម្កាក់ ស្រុកអង្គស្នួល ខេត្តកណ្តាល។

មានប្រសាសន៍នាឱកាសនោះដែរ ឯកឧត្តម គង់ សោភ័ណ្ឌ អភិបាលខេត្តកណ្តាល និងជាប្រធានគណ:កម្មាធិការសាខាកាកបាទក្រហមកម្ពុជាខេត្តកណ្ដាល បានពាំនាំនូវការផ្តាំផ្ញើសាកសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនបងប្អូនប្រជាពលរដ្ឋរងគ្រោះដោយក្ដីនឹករលឹក និងអាណិតអាសូរពន់ពេក។

ឯកឧត្តម គង់ សោភ័ណ្ឌ បានបន្តថា កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន សម្ដេចតែងគិតគូរជានិច្ចអំពីសុខទុក្ខរបស់ប្រជាពលរដ្ឋទូទៅ នៅគ្រប់ពេលវេលា។ ហើយសម្ដេចថែមទាំងបានណែនាំជាប្រចាំដល់មន្រ្តីនៅថ្នាក់មូលដ្ឋាន ត្រូវពិនិត្យមើលពីជីវភាពរស់នៅរបស់ប្រជាពលរដ្ឋ ព្រមទាំងចុះសួរសុខទុក្ខដល់ជនងាយរងគ្រោះ និងជនរងគ្រោះគ្រប់ប្រភេទ ដោយមិនប្រកាន់ពូជសាសន៍ សាសនា ប្រពៃណី ឬនិន្នាការនយោបាយឡើយ។

ក្នុងឱកាសនោះដែរ ឯកឧត្តម គង់ សោភ័ណ្ឌ អភិបាល នៃគណ:អភិបាលខេត្តកណ្តាល បានចូលរួមនូវការសោកស្ដាយ ចំពោះប្រជាពលរដ្ឋទាំង ៣៨ គ្រួសារ ដែលបានខូចខាតនៅផ្ទះសំណាក់បែកដល់បញ្ហាខ្យល់កន្ត្រាក់ ដែលបានកើតឡើងនាពេលកន្លងមក ហើយឯកឧត្តមក៏បានលើកទឹកចិត្ត ដល់បងប្អូនប្រជាពលរដ្ឋទាំង ៣៨គ្រួសារ សូមកុំមានការអស់សង្ឃឹម ព្រោះគ្មានអ្នកណាម្នាក់ចង់ឱ្យឧបទ្ទវហេតុនេះទេ កើតឡើងគង់លើខ្លួនឡើង។

ជំនួយសង្រ្គោះដែលសាខាបានផ្ដល់ជូនគ្រួសាររងគ្រោះ ទាំង៣៨គ្រួសារ ក្នុង០១គ្រួសារទទួលបាន៖ អង្ករ ២៥គីឡូក្រាម មី ១កេស ,ទឹកត្រី ១យួរ ,ត្រីខ ១យួរ ,ទឹកសុទ្ធ ១កេស ,អាល់កុល ១ដប ,ម៉ាស់ ១ប្រអប់ ,ថវិកា ២០ម៉ឺនរៀល។ ដោយឡែកចំពោះអ្នករងគ្រោះរលំផ្ទះទាំងស្រុង ០៨គ្រួសារ បានឧបត្ថម្ភបន្ថែមជូនបន្ថែមក្នុងគ្រួសារនីមួយៗនូវ៖ កៅស៊ូតង់ ១ផ្ទាំង និងថវិកាចំនួន ៤០ម៉ឺនរៀល៕