ឧត្តម គង់ សោភ័ណ្ឌ អភិបាលខេត្តកណ្តាល បានចូលរួមប្រារព្ធពិធីបុណ្យចម្រើនអាយុវឌ្ឍន:មង្គលនិងស្រង់ព្រះសុគន្ធវារី

(ខេត្តកណ្តាល)៖ នារសៀលថ្ងៃអាទិត្យ ១០រោច ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៧ ខែមីនា ឆ្នាំ២០២២ នៅវត្តសុវណ្ណវារី ហៅវត្តព្រែកតាទែន ស្ថិតនៅឃុំព្រែកតាទែន ស្រុកពញាឮ ឯកឧត្តម គង់ សោភ័ណ្ឌ អភិបាល នៃគណ:អភិបាលខេត្តកណ្តាល រួមជាមួយមន្រ្តីរាជការរដ្ឋបាលខេត្តកណ្តាល ស្រុកពញាឮ និងពុទ្ធបរិស័ទ បានចូលរួមប្រារព្ធពិធីបុណ្យចម្រើនអាយុវឌ្ឍនៈមង្គលគម្រប់ខួប៦៨ ឈានចូល ៦៩ព្រះវស្សា និងស្រង់ព្រះសុគន្ធវារីប្រគេន សម្តេចព្រះឧត្តមមុនី ជា សំអាង ព្រះមេគណខេត្តកណ្តាល។

ក្នុងទិវាដ៏នក្ខត្តឫក្សនេះ ឯកឧត្តម គង់ សោភ័ណ្ឌ សូមសម្តែងនូវកតញ្ញូតាធម៌យ៉ាងជ្រាលជ្រៅចំពោះព្រះគុណូបការៈដ៏ធំធេងរបស់ សម្តេចព្រះឧត្តមមុនី ជា សំអាង ដែលព្រះអង្គជានិច្ចកាលតែងថ្វាយនូវកម្លាំងព្រះកាយពល និងព្រះបញ្ញាញាណ ដើម្បីបុព្វហេតុដ៏ថ្លៃថ្លានៃការអភិវឌ្ឍ និងទ្រទ្រង់ព្រះពុទ្ធសាសនាឲ្យមានការរីកចម្រើនឥតឈប់ឈរ។

ក្នុងឱកាសដ៏ឧត្តុង្គឧត្តមនេះដែរ ឯកឧត្តម គង់ សោភ័ណ្ឌ អភិបាល នៃគណ:អភុបាលខេត្តកណ្តាល សូមលើកហត្ថប្រណម្យបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក និងទេវតាថែរក្សាទឹកដីនៃព្រះរាជាណាចក្រកម្ពុជា សូមតាមបីបាច់ថែរក្សា និងប្រោះព្រំសព្ទសាធុការពរថ្វាយ សម្តេចព្រះឧត្តមមុនី ជា សំអាង ជាទីគោរពសក្ការៈ សូមប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ និងចៀសផុតពីរោគាព្យាធិទាំងឡាយទាំងពួងកុំបីអាក់ខានឡើយ ដើម្បីបន្តចូលរួមដឹកនាំវិស័យពុទ្ធចក្រនៅកម្ពុជា និងខេត្តកណ្តាល ឲ្យរីកចម្រើនស្ថិតស្ថេរជានិច្ចនិរន្តរ៍។

សូម សម្តេចព្រះឧត្តមមុនី ជា សំអាង ព្រះមេគណខេត្តកណ្តាល ព្រះមេត្តាទទួលនូវគារវកិច្ចជាទីសក្ការៈដ៏ខ្ពង់ខ្ពស់ពីទូលព្រះបង្គំ។