កំពត៖ បច្ចុប្បន្នកាសីុណូវីម៉ាណ(VIMARN)ដែលស្ថិតក្នុងច្រកទ្វារអន្តរជាតិ ព្រែកចាក នៃភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច ខេត្តកំពត នោះគេសង្កេតឃើញមានភ្ញៀវចូលលេងល្បែងយ៉ាងពពាក់ពពូនលើ២៤ម៉ោង ដែលបានធ្វើឱ្យអ្នកគ្រប់គ្រងពិសេសថៅកែកាសីុណូមួយនេះញញឹមបិទមាត់មិនជិតទេ។
បើតាមការបង្ហើបឱ្យដឹងពីបុគ្គលិកក្នុងកាសីុណូខាងលើសុំមិនបញ្ចេញឈ្មោះ បានលួចទំលាយថា ចាប់តាំងពីថៅកែថ្មីមកជួលកាសីុណូយីហោ ដឺវីម៉ាណនេះមកហាក់មានយីអ៊ុនខ្ពស់កប់ពពក ព្រោះការជួលកាសីុណូដែលមានបង្កប់សង្វៀនជល់មាន់ដ៏មានទ្រង់ទ្រាយធំមហិមាបែបនេះ គឺសំបូរភ្ញៀវចូលមកលេងភ្នាល់ទាំងយប់ទាំងថ្ងៃ ហើយក្រុមអ្នកញៀនល្បែងទាំងនោះភាគច្រើនជាជនជាតិខ្មែរ ដែលបានធ្វើដំណើរមកពីបណ្តាស្រុកនានានៃខេត្តកំពតនិងមួយចំនួនទៀតមកពីបណ្តាខេត្តមួយចំនួនផងដែរ ដោយបានធ្វើដំណើរតាមមធ្យោបាយម៉ូតូឬរថយន្តគ្រប់ប្រភេទ។ប្រភពដែលអាចជឿរទាំងស្រុងបានឱ្យដឹងទៀតថា ក្នុងចំណោមការសីុណូទាំងអម្បាលមានក្នុងតំបន់ទល់ដែននេះគឺពុំអាចប្រៀបធៀបជាមួយកាសីុណូវីម៉ាណនេះឡើយ ព្រោះ បនល្បែងមួយនេះមានលក្ខណៈដ៏ល្អប្រសើរដោយសារតែបរិវេណខាងក្នុងមានបង្កើតបៀរកាឌិនអាចបង្កបរិយាកាសសប្បាយគ្រប់ពេលវេលា ដល់ភ្ញៀវណាដែលមានជ័យលាភីនឹងល្បែងសីុសង។ក្រៅពីនោះក្នុងបរិវេណកាសីុណូក៏មានបង្កើតបនល្បែងគ្រប់ប្រភេទទៀតស្ថិតក្នុងសង្វៀនបញ្ជល់មាន ដូចជាតាយ សីុវ អាប៉ោង៘ ទើបធ្វើឱ្យក្រុមអ្នកញៀនល្បែងនាំគ្នាសំរុកចូលលេងក្នុងកាសីុណូវីម៉ាណ យ៉ាងភ្លូកទឹកភ្លូកដីបែបនេះ ហើយភាគច្រើនសុទ្ធតែភ្ញៀវខ្មែរតែម្តង។ប្រភពដដែលបានបង្ហើបទៀតថា គេសម្គាល់ឃើញរាប់ឆ្នាំហើយដែលកាសីុណូមួយនេះស្វាគមន៍ជនជាតិខ្មែរឱ្យចូលប្រព្រិត្តល្បែងសីុសង ប៉ុន្តែពុំដែលឃើញអ្នកណាឈ្នះម្នាក់ទេ គឺចាញ់រហូត។
ទាក់ទងនឹងភ្ញៀវចូលលេងល្បែងក្នុងកាសីុណូវីមាណនេះ មហាជនបាននាំគ្នារិះគន់ទៅលើអាជ្ញាធរ ពិសេសស្ថាប័នពាក់ព័ន្ធ ហាក់ពុំមានចាត់វិធានការណាមួយដើម្បីព្រមានដល់អ្នកគ្រប់គ្រងកាស៊ីណូដែលកំពុងអនុវត្តន៍ផ្ទុយពីលក្ខខណ្ឌនិងច្បាប់អនុញញាតការសាងសង់សំរាប់ធ្វើអាជីវកម្ម ដោយបានកំណត់ឱ្យម្ចាស់កាស៊ីណូធ្វើអាជីវកម្មប៉ុន្តែមិនតម្រូវឱ្យពលរដ្ឋខ្មែរចូលលេងជាដាច់ខាត តែបើក្រលេកមើលក្នុងកាសីុណូវីម៉ាណវិញ បែរជាមានខ្មែរចូលចាក់ភ្នាល់ល្បែងដ៏ពេញបន្ទុកទៅវិញ តើគិតយ៉ាងណាទៅ?ម្យ៉ាងវិញទៀតក្នុងការស៊ីណូវីម៉ាណក្រៅពីសំបូរមនុស្សចូលប្រព្រិត្តល្បែង ក៏ជាទីតាំងមួយសំរាប់ផ្តល់ការសប្បាយផឹកស៊ី ស្រីញីធអូនបងក្នុងបៀរកាឌិន ដោយអាចសង្ស័យមានការប្រព្រិត្តបទល្មើសគ្រឿងញៀនផងក៏មិនដឹង។
ពាក់ព័ន្ធនឹងករណីខ្មែរចូលលេងល្បែងសីុសងក្នុងកាសីុណូ វីម៉ាណខាងលើ នៅរសៀលថ្ងៃទី០៦ខែមីនា ឆ្នាំ២០១៧អ្នកយកព័ត៌មានពុំអាចសុំការពន្យល់ណាមួយពីអ្នកគ្រប់គ្រងកាស៊ីណូវីម៉ាណបានទេ ដោយសារគ្មានលេខទូរសព្ទទំនាក់ទំនង។ដោយឡែកក្នុងរសៀលថ្ងៃដដែលអ្នកយកព័ត៌ក៏មិនអាចសុំការបំភ្លឺពីលោក ណុប សារឹម ប្រធានច្រកទ្វារអន្តរជាតិផ្នែកអន្តោប្រវេស៍ បានទេ ព្រោះលោកជាប់ប្រជុំ ៕ ណារិទ្ធ
