កែប៖ ផ្លូវចំនួនបួនខ្សែមានប្រវែង១៣៤០០ម៉ែត្រនៃភូមិសាស្ត្រស្រុកដំណាក់ចង្អើរខេត្តកែប ត្រូវបានបើកការដ្ឋាននៅព្រឹកថ្ងៃទី១២ ខែមីនា ឆ្នាំ២០១៧ ក្រោមការចូលរួមដ៏សកម្មរបស់ ឯកឧត្តម កែន សត្ថា អភិបាលខេត្តកែបនិងឯកឧត្តម សំ សារីន ប្រធានក្រុមប្រឹក្សាខេត្ត រួមនឹងមន្ទីរស្ថាប័នពាក់ព័ន្ធនានាទូទាំងខេត្តផងដែរ។
ទោះជាបែបណា ក្នុងថ្ងៃបើកការដ្ឋានស្ថាបនាផ្លូវដ៏ថ្មីសន្លាងនេះ ប្រជាពលរដ្ឋក្នុងតំបន់មានសេចក្តីសោមនស្សរីករាយក្រៃលែង ដោយពួកគាត់បានចូលរួមក្នុងពិធីនេះយ៉ាងច្រើនកុះករ ហើយក៏ជាក្តីសង្ឃឹមដ៏មុតមាំថា នៅទីជនបទណាក៏មានផ្លូវធំទូលាយងាយស្រួលក្នុងការធ្វើចរាចរណ៍ ពិសេសជាងនេះអាចផ្តល់វេលាដ៏សំខាន់សំរាប់កូនចៅរបស់ពួកគាត់ទៅសាលារៀនទាន់ពេលដោយពុំមានអាក់ខាន។
ចំពោះការស្ថាបនាផ្លូវចំនួន៤ខ្សែស្ថិតក្នុងភូមិសាស្ត្រស្រុកដំណាក់ចង្អើរនេះដែរ ពិតជាផ្តល់នូវអត្ថប្រយោជន៍ដ៏ច្រើន អាចធ្វើឱ្យសេដ្ឋកិច្ចគ្រួសាររបស់ប្រជាពលរដ្ឋក្នុងតំបន់មានសន្ទុះជាលំដាប់ ដោយពួកគាត់អាចរកប្រាក់ចំណូលបានយ៉ាងងាយស្រួល ពីការលក់ឬដោះដូរផលិតផលក្នុងស្រុក ពិសេសផលកសិកម្មដែលប្រមូលបានដោយមិនចាំបាច់ដឹកជញ្ជូនយកទៅលក់ក្នុងទីផ្សា។
អាជ្ញាធរខេត្តកែប ក្នុងព្រឹកនេះក៏បានលើកឡើងផងដែរថា មានផ្លូវ ត្រូវតែមានក្តីសង្ឃឹម ព្រោះបច្ចុប្បន្ននេះមនុស្សកាន់តែកើនឡើងជាបន្តបន្ទាប់ហើយជានិច្ចកាលមនុស្សគ្រប់ស្រទាប់វណ្ណៈអ្នកណាក៏ត្រូវការធ្វើដំណើរដែរ ដូច្នេះការស្ថាបនាផ្លូវបានច្រើនកាលណាកាន់តែប្រសើរ។លោកបានបញ្ជាក់ថា ទីណាមានផ្លូវនឹងមានអត្ថប្រយោជន៍កាន់តែច្រើនថែមទាំងមានសក្តានុពល ព្រោះខេត្តយើងជាខេត្តទេសចរណ៍ តូចមែនតែមានខ្លឹម។
ទោះបីយ៉ាងណាគេសង្កេតឃើញ អាជ្ញាធរខេត្តកែប គ្រប់លំដាប់ថ្នាក់មានភាពមមាញឹកក្នុងកិច្ចការងារ ចាប់តាំងពីថ្នាក់លើរហូតដល់ថ្នាក់មូលដ្ឋានដោយមិនបានគិតថាថ្ងៃ សៅរ៍ឬអាទិត្យឡើយ ហើយការស្ថាបនាផ្លូវចំនួន៤ខ្សែក្នុងភូមិសាស្ត្រស្រុកដំណាក់ចង្អើរនេះ ពិតជាធ្វើឱ្យពលរដ្ឋក្ន្ងុងតំបន់ខាងលើមានការរីករាយកក់ក្តៅក្នុងចិត្ត ដោយពួកគាត់ទន្ទឹងរង់ចាំឱកាសនេះយូរមកហើយៗក៏ចាត់ទុកជាអំណោយមួយដ៏ថ្លៃថ្លារបស់អាជ្ញាធរខត្តកែប ក្រោមការដឹកនាំដ៏ឈ្លាសវៃ របស់ប្រមុខរាជរដ្ឋាភិបាលកម្ពុជាដែលតែងតែរួមសុខរួមទុក្ខជាមួយប្រជាពលរដ្ឋគ្រប់ពេលវេលានោះ៕ ណារិទ្ធ
