លោកឧត្តមសេនីយ៍ទោ សិទ្ធិ ឡោះ ដឹកនាំកម្លាំងក្រោមឱវាទគោរពទង់ជាតិ និង ជម្រុញកម្លាំងឲ្យចូលរួមចាក់វ៉ាក់សាំងដូសទី៤ ឲ្យបានគ្រប់គ្នា
ខេត្តបន្ទាយមានជ័យ៖នៅព្រឹកថ្ងៃចន្ទ ៧រោច ខែបុស្ស ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៤ ខែមករា ឆ្នាំ២០២២ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដឹកនាំកម្លាំងនគរបាលទូទាំងខេត្ត កម្លាំងអធិការដ្ឋាននគរបាលក្រុង-ស្រុក ទាំង៩ និង កម្លាំងវរសេនាតូចនគរបាលការពារព្រំដែនគោកទាំង៤ គោរពទង់ជាតិ នៃព្រះរាជាណាចក្រកម្ពុជា។
ថ្លែងក្នុងពិធីនោះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បាន ជម្រុញដល់កម្លាំងនគរបាលទូទាំងខេត្ត ត្រូវទៅចូលរួមចាក់វ៉ាក់សាំងការពារជម្ងឺកូវីដ១៩ ដូសទី៤ (ដូសជម្រុញ)ឲ្យបានគ្រប់គ្នា។ លោកបានចាត់ទុកថា ការចាក់វ៉ាក់សាំងថ្ងៃនេះ គឺជាការលើកកម្ពស់សុខមាលភាពរបស់កម្លាំងនគរបាល ហើយក៏ជាការរួមចំណែកក្នុងការប្រយុទ្ធប្រឆាំង និងជម្ងឺកូវីដ១៩ផងដែរ។
លោកឧត្តមសេនីយ៍ទោ សិទ្ធិ ឡោះ ក៏បានណែនាំដល់កម្លាំងបាលគ្រប់ការិយាល័យជំនាញ ចំណុះឲ្យស្នងការដ្ឋាននគរបាលខេត្តបន្ទាយមានជ័យទាំងអស់ ត្រូវមានស្មារតីទទួលខុសត្រូវ ពង្រឹងលើប្រសិទ្ធភាពការងារ ចំណេះ ជំនាញ វិន័យ ដល់មន្ត្រីក្រោមឱវាទ ត្រូវរួមគ្នាប្រើប្រាស់ទឹកភ្លើងដោយភាពសន្សំសំចៃ ត្រូវបិតទឹក បិតភ្លើងអគ្គីសនី ម៉ាស៊ីនត្រជាក់ ឲ្យបានត្រឹមត្រូវមុនចាកចេញពីកន្លែងធ្វើការ និងត្រូវអនុវត្តតាមវិធានសុខាភិបាល ៣ ការពារ ៣ កុំ ។
