ឯកឧត្តម ហ៊ុន ម៉ានី៖ «ការចាប់ផ្តើមជួបវិបត្តិកូវី១៩ដូចគ្នា តែលទ្ធផលនៃការគ្រប់គ្រងដោយជោគជ័យមានភាពខុសគ្នា គឺអាស្រ័យលើសមត្ថភាពដឹកនាំរបស់ប្រទេសនីមួយៗ»
ថ្លែងក្នុងពិធីសំណះសំណាលជាមួយរចនាសម័្ពន្ធគណៈចលនាមហាជនខេត្តកំពត នារសៀលថ្ងៃទី២៨ ខែមករា ឆ្នាំ២០២២ ឯកឧត្តម ហ៊ុន ម៉ានី អគ្គលេខាធិការនៃអគ្គលេខាធិការដ្ឋានគណៈចលនាមហាជន បានមានប្រសាសន៍សង្កត់ធ្ងន់លើ
សមត្ថភាពដឹកនាំរបស់គណៈបក្សប្រជាជន ក្នុងគ្រប់កាលៈទេសៈ ជាពិសេសក្នុងដំណាក់កាលលំបាកនៃវិបត្តកូវីដ១៩ ជូនសមាជិក សមាជិកានៃអង្គប្រជុំ។ ឯកឧត្តម បានលើកឡើងថា៖ «វិបត្តិកូវីដ១៩ ជាវិញ្ញាសារសាកល្បងសមត្ថភាពនៃការដឹកនាំរបស់រាជរដ្ឋាភិបាលកម្ពុជា និងប្រទេសផ្សេងៗ ក្នុងការគ្រប់គ្រងស្ថានការការរីករាលដាលជំងឺកូវីដ១៩។ ការចាប់ផ្តើមដូចគ្នា តែលទ្ធផលនៃការគ្រប់គ្រងមានភាពខុសគ្នា គឺអាស្រ័យលើសមត្ថភាពដឹកនាំរបស់ប្រទេសនីមួយៗ»។
ឯកឧត្តម បានបន្តថា តាមរយៈការសម្រេចចិត្តដ៏ត្រឹមត្រូវ និងទាន់ពេលរបស់ថ្នាក់ដឹកនាំរាជរដ្ឋាភិបាល ប្រជាពលរដ្ឋកម្ពុជាបានទទួលវ៉ាក់សាំងរហូតដល់ដូសជំរុញទី៤ ដែលនេះគឺជាចំនុចសំខាន់ដែលបណ្ដាប្រទេសមួយចំនួនមិនអាចធ្វើបាន។ ជាមួយគ្នានេះ
ក្រោមការគ្រប់គ្រងយ៉ាងយកចិត្តទុកដាក់ ធ្វើឱ្យការឆ្លងមានកំរិតឆ្លងទាប ហើយរយៈពេល១៩ ថ្ងៃហើយដែលកម្ពុជាមិនមានអ្នកស្លាប់ប្រសិនបើធៀបជាមួយប្រទេសដទៃទៀត។ មិនតែប៉ុណ្ណោះ បើទោះបីកម្ពុជាមានថវិការមិនច្រើនដូចប្រទេសដទៃទៀត ប៉ុន្តែកម្ពុជាអាចមានលទ្ធភាពទាំងទិញវ៉ាក់សាំង ទាំងយន្តការផ្សេងៗ ដែលធានានូវភាពគ្រប់គ្រាន់នៃការចាក់វ៉ាក់ស៊ាំងជូនប្រជាពលរដ្ឋជាតិ និងឈានដល់ជនបរទេស។ លើសពីនេះទៀតសោត សេដ្ចកិច្ចកម្ពុជាបានវិលត្រលប់មកប្រក្រតីភាពវិញ ដែលនេះសុទ្ធសឹងតែជាការឆ្លុះបញ្ចាំងពីការគ្រប់គ្រងដែលមានប្រសិទ្ធិភាព។
សូមជម្រាបជូនថា ពិធីសំណះសំណាលជាមួយរចនាសម័្ពន្ធគណៈចលនាមហាជនខេត្តកំពត ត្រូវបានប្រព្រឹត្តទៅក្រោមអធីបតីភាព ឯកឧត្តម ហ៊ុន ម៉ានី និងមានការចូលរួមពីសំណាក់ ឯកឧត្តម ម៉ៅ ធនិន ប្រធានគណៈកម្មាធិការគណបក្សខេត្ត និងជាប្រធានគណៈចលនាមហាជនខេត្ត រួមជាមួយឯកឧត្តម លោកជំទាវ លោក លោកស្រី ជាសមាជិក សមាជិកា គណៈអចិន្ត្រៃយ៍នៃគណៈកម្មការគណបក្សខេត្ត ក្រុង ស្រុក ឃុំ សង្កាត់នៃខេត្ត។
