ឯកឧត្តម សុខ លូ អញ្ជើញជាអធិបតីភាព ក្នុងពិធីប្រកាសកែសម្រួល និងបំពេញបន្ថែមសមាសភាពគណៈកម្មការសមាគមនារីកម្ពុជា ដើម្បីសន្ដិភាព និងអភិវឌ្ឍន៍ខេត្តបាត់ដំបង និងបូកសរុបលទ្ធផលការងារឆ្នាំ២០២១ និងលើកទិសដៅឆ្នាំ២០២២
នៅព្រឹកថ្ងៃពុធ ៤កើត ខែមិគសិរ ឆ្នាំឆ្លូវ ត្រីស័ក ព.ស ២៥៦៥ ត្រូវនឹង ថ្ងៃទី៨ ខែធ្នូ ឆ្នាំ២០២១ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង អញ្ជើញជាអធិបតីភាព ក្នុងពិធីប្រកាសកែសម្រួល និងបំពេញបន្ថែមសមាសភាពគណៈកម្មការសមាគមនារីកម្ពុជា ដើម្បីសន្ដិភាព និងអភិវឌ្ឍន៍ខេត្តបាត់ដំបង និងបូកសរុបលទ្ធផលការងារឆ្នាំ២០២១ និងលើកទិសដៅឆ្នាំ២០២២ នៅសាលប្រជុំសាលាខេត្តបាត់ដំបង ។
សមាគមនារីកម្ពុជាដើម្បីសន្ដិភាព និងអភិវឌ្ឍន៍ សម្រេចទទួលស្គាល់ លោកជំទាវ ម៉េត រ៉ាវីចិត្រ សុខ លូ ជាប្រធានកិត្តិយស គណៈកម្មការសាខាសមាគមនារីកម្ពុជាដើម្បីសន្ដិភាព និងអភិវឌ្ឍន៍ខេត្តបាត់ដំបង ។
ឆ្លៀតក្នុងឱកាសនោះ ឯកឧត្តម សុខ លូ បានមានប្រសាសន៍ថា ផ្តាំផ្ញើដល់ប្រធាន អនុប្រធាន និងសមាជិកទាំងអស់ ឲ្យបន្តដំណើរការរួមគ្នា ក្នុងការកៀគរថវិកា ឬអំណោយជំនួយពីសប្បុរសជននានា ដើម្បីបានជួយដល់កិច្ចការសង្គម ពិសេសជួយដល់ជនរងគ្រោះដែលជានារីភេទ ឬកុមារ រងការគៀបសង្កត់ ឬកេងប្រវ័ញ្ចពីជនមួយចំនួន ឬជាជនរងគ្រោះ ក្រីក្រ ឬជួបមហន្តរាយនានា ។ ឯកឧត្តម បានមានប្រសាសន៍បន្តថា នារីមានសារៈសំខាន់ណាស់ នៅលើពិភពលោកដែលមិនអាចខ្វះបាន មិនថាក្នុងស្ថាប័នណាក៏ដោយ ក៏មិនអាចខ្វះនារីបានឡើយ នារីក៏មានសិទ្ធក្នុងការចូលរួមអភិវឌ្ឍន៍ដូចបុរសដែរ ហើយនារីមួយចំនួនទៀតមានចំណេះដឹងខ្លាំងជាងបុរសទៀតផង។
ក្នុងឱកាសនោះ ឯកឧត្តម សុខ លូ និងលោកជំទាវ ម៉េត រ៉ាវីចិត្រ សុខ លូ បានប្រគល់ជូននូវថវិកា ២០ លានរៀល ជូនដល់សមាគមនារីកម្ពុជាដើម្បីសន្ដិភាព និងអភិវឌ្ឍន៍ខេត្តបាត់ដំបង ជាដើមទុន និងដើម្បីបន្តការងារមនុស្សធម៌នៃសមាគមផងដែរ ៕
