ខេត្តបន្ទាយមានជ័យ៖ ផ្លូវមួយខ្សែ ដែលមានទទឹង៥ម៉ែត្រ និងបណ្តោយ១២គីឡូម៉ែត្រ ផ្លូវមួយខ្សែនេះ កន្លងមក រងការចូខខាតស្ទើរទាំងស្រុង ដោយសារតែទឹកខែវស្សាវាយលុក ដែលស្ថិតនៅក្នុងភូមិ ភ្នៀត សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។ លុះនៅព្រឹកថ្ងៃទី ១ ខែមករាឆ្នាំ២០១៧ត្រូវបានបើកការដ្ឋានធ្វើនិងជួសជុលឡើងវិញដោយមានការចូលរួមពី ឯកឧត្តម សួន បវរអភិបាលខេត្តបន្ទាយមានជ័យ ឯកឧត្តម លី សារី អភិបាលរងខេត្តបន្ទាយមានជ័យ លោក សាំងគង់ ម្ចាស់គ្រឿងចក្រនិងប្រជាពលរដ្ឋបានមកចូលរួម៤០០នាក់ផងដែរ ។
ក្នុងវិធីជួសជុលផ្លូវលំឡើងវិញនាពេលេះន ឯកឧត្តម សួន បវរ បានមានប្រសាសន៍ថា ផ្លូវដែលកំពុងតែជួសជុលឡើងវិញនេះ វាមានសារៈសំខាន់ណាស់វាជាសរសៃឈាមសំរាប់ឲ្យប្រជាពលរដ្ឋនៅក្នុងឃុំភ្លៀតធ្វើដំណើរចុះឡើងដល់ទៅ ៧ ភូមិ ហើយកន្លងមកផ្លូវនេះ ត្រូវបានទឹកភ្លៀងវាយលុកហូរកាត់ច្រោះដី ធ្វើឲ្យផ្លូវនេះដូចសំបុកមាន់ការ ធ្វើដំណើររបស់ប្រជាពលរដ្ឋតាមដងផ្លូវនេះពិបាកយ៉ាងខ្លាំងពេលធ្វើដំណើរចូលខេត្តម្តងៗរាប់ម៉ោង ។
ឯកឧត្តម សួន បវរ បានបញ្ជាក់ទៀតថា ដោយមានការសំណូមពរយ៉ាងទទូចរបស់ប្រជាពលរដ្ឋនៅក្នុងឃុំភ្នៀតនេះឲ្យលោកជួយជួសជុលធ្វើផ្លូវនេះឡើងវិញ ទើបនៅថ្ងៃទី១ ខែមករា ឆ្នាំ២០១៧ នេះ ក៏បានបើកការដ្ឋានធ្វើតែម្តង ។ ឯកឧត្តម សួន បវរ បានបញ្ជាក់ទៀតថា ផ្លូវនេះត្រូវចំណាយទឹកប្រាក់អស់ ៩ ម៉ឺនដុល្លា ជាលុយផ្ទាល់របស់លោក បានមកពីសប្បុរសជនជួយ ផ្លូវនេះចាក់ដីភ្នំបន្ថែម និងនៅចុងបញ្ចប់ក្រាលគ្រួសក្រហមពីលើបន្ថែមទៀត ក្នុងនោះ លោកបានធ្វើការសំណូមពរដល់ប្រជាពលរដ្ឋ ដែលរស់នៅតាមដងផ្លូវដែលកំពុងជួសជុលនោះ មេត្តាអនុគ្រោះបើមានផលប៉ះពាល់ ដល់របងផ្ទះ ដើមឈើនិងអ្វីផ្សេងៗទៀតនោះត្រូវចូលរួមគ្នាជាមួយអាជ្ញាធម៌ដើម្បីធ្វើផ្លូវនេះឲ្យបានចប់ចុងចប់ដើម ។
ឯកឧត្តម សួន បវរ បានបញ្ជាក់ទៀតថា ក្រោយពីផ្លូវនេះធ្វើបានល្អ ហើយបងប្អូននៅក្នុងសង្កាត់ភ្នៀតនេះ ត្រូវចូលរួមថែរក្សាផ្លូវនេះឲ្យបានគ្រប់គ្នា ដើម្បីឲ្យផ្លូវមួយខ្សែនេះជាប់បានយូរអង្វែង ទុកសំរាប់ក្មេងជំនាន់ក្រោយបានដើរទៀតផង ។
នៅចុងបញ្ចប់កម្មវិធី ឯកឧត្តម សួន បវរ ឯកឧត្តមលី សារី និងមន្ត្រីអមដំណើជាច្រើននាក់ទៀតបានធ្វើការចែកអំណោយដល់ប្រជាពលរដ្ឋ ទាំង៤០០នាក់ដែលបានចូលរួមពិធីបើកការដ្ឋានធ្វើផ្លូវនេះក្នុង១នាក់បានសារុង១និងថវិការ១មឺុនរៀលទៀតផង ៕
