មណ្ឌលគិរី ៖ ឈ្មួញរកស៊ីឈើខ្នាតតូចៗ សុំមិនបញ្ចេញអត្តសញ្ញាណ បានឲ្យដឹងថា រាល់ថ្ងៃមានឧកញ៉ា ២ទៅ៣នាក់ ដែលដឹកឈើច្រើន និងលើសទម្ងន់ ជាងគេ កំពុងតែធ្វើចរាចរ ជារៀងថ្ងៃ ហើយសមត្ថកិច្ច ហាក់ស្ទាក់ស្ទើរ ក្នុងការបង្ក្រាប ឬទប់ស្កាត់ ព្រោះតែខ្លាចអំណាច។
ឈ្មួញទាំងនោះ បន្តថា រថយន្តធន់ធំរបស់ក្រុមហ៊ុនឧកញ៉ា តុប វីដា និងក្រុមហ៊ុន DTC របស់លោកឧកញ៉ាល័ក្ខ ដែលកំពុងតែដឹកជញ្ជូនឈើចេញពីស្រុកកោះញែកខេត្តមណ្ឌលគិរី និងបន្ដមក ដាក់ នៅចំណុចភូមិច្រាប ឃុំ២ធ្នូ ស្រុកស្នួល ខេត្តក្រចេះនោះ គេសង្កេតឃើញថាពុំមានសមត្ថកិច្ច ឬមន្ដ្រីជំនាញពាក់ព័ន្ធណាម្នាក់ចុះមកត្រួតពិនិត្យនោះទេ។ តែបើពួកគាត់ជាអ្នកតូចតាច គឺមិនអាចគេចរួចនោះទេ។
ទាក់ទងនឹងការចោទប្រកាន់នេះ នៅពេលថ្មីៗកន្លងទៅនេះ នាយកក្រុមហ៊ុនDTC ក៏ធ្លាប់ប្រាប់អ្នកសារព័ត៌មានក្នុងខេត្តមណ្ឌលគិរីថា ឈើទាំងអស់នោះ គឺជាឈើដែលក្រុមហ៊ុនរបស់លោកដេញថ្លៃបាន ក្រោយពេលគណៈកម្មការបង្ក្រាបបទល្មើសព្រៃឈើថ្នាក់ជាតិរឹបអូសពីក្រុមហ៊ុនមួយចំនួន ក្នុងខេត្តមណ្ឌលគិរី។ ម្យ៉ាងទៀត ឈើដែលកំពុងដឹកជញ្ជូនតាមរថយន្តធំៗនាពេលបច្ចុប្បន្ននេះ គឺមានច្បាប់ត្រឹមត្រូវ និងផ្ទុកឈើត្រឹមតែ១៧ម៉ែត្រគូបប៉ុណ្ណោះ ពោលគឺពុំលើសទម្ងន់នោះទេ ។
ចំណែក លោក ឧកញ្ញា តុប វីដា យើងមិនអាចទាក់ទងសុំការបំភ្លឺបានទេ។ តែមេការរបស់លោកឧកញ៉ា តុប វីដា លោក ផាន់ណា បានឆ្លើយថា រថយន្តដឹកឈើរបស់ក្រុមហ៊ុនលោក គឺដឹកឈើចេញពីស្រុកកោះញែក ខេត្តមណ្ឌលគិរី ទៅខេត្តកោះកុង មានច្បាប់ត្រឹមត្រូវ ។ ចំណែកការលើសទម្ងន់ ឬយ៉ាងណានោះ លោកមិនបានដឹងទេ ព្រោះខាងមន្ទីរជំនាញមិនដែលហៅរថយន្តឲ្យចូលថ្លឹងផង។
ទាក់ទងនឹងករណីខាងលើ ប្រធានមន្ទីរសាធារណការ និងដឹកជញ្ជូនខេត្តមណ្ឌលគិរី លោក ម៉ៅ ធនរក្ស បានថ្លែងថា លោកទទួលស្គាល់ថា ករណីខាងលើ ពិតជាមានមែន ព្រោះបច្ចុប្បន្នរថយន្តធន់ធំកំពុងចរាចរ ដឹកជញ្ជូនឈើចេញពីក្រុមហ៊ុនមួយចំនួនដែលជារបស់ឧកញ៉ាធំៗ ពីរបីក្នុងខេត្តមណ្ឌលគិរី ទាំងយប់ទាំងថ្ងៃ បាននិងកំពុងតែធ្វើឲ្យផ្លូវជាតិ និងផ្លូវ១ចំនួនទៀត ខូចយ៉ាងធ្ងន់ធ្ងរ។
លោកបន្តថា បើតាមច្បាប់កំណត់គឺអនុញ្ញាតឲ្យរថយន្តទាំងនោះផ្ទុកទម្ងន់ត្រឹមតែពី២៥ទៅ៣០តោនប៉ុណ្ណោះ ប៉ុន្តែដោយសារតែមណ្ឌលគិរីពុំមានស្ថានីយជញ្ជីងថ្លឹង ទើបបណ្ដាលឲ្យមន្ត្រីជំនាញជួបការលំបាកក្នុងការអនុវត្តការងារ ។ ម្យ៉ាងទៀត មន្ទីរជំនាញ ក៏បានស្នើទៅក្រសួងសាធារណការ ដើម្បីសុំបង្កើតស្ថានីយជញ្ជីងថ្លឹង តែខាងក្រសួងនៅមិនទាន់ឆ្លើយតបនៅឡើយ៕
