ខេត្តរតនគិរី ៖ លោក អ៊ី ចំរើន ប្រធានប៉ុស្តិ៍ច្រកទ្វារ អន្តរជាតិអូរយ៉ាដាវ ដែលទើបឡើងថ្មី កំពុងបំពេញការងារ តាមរបៀប ជិះសេះលែងដៃ ដើម្បីប្រមុលលុយស្រង់ដើម ក្នុងការចាយលុយទិញប៉ុស្តិ៍ ក្នុងនោះ មានប្រភពចំណូលជាច្រើ នដែលលោក អ៊ី ចំរើន កំពុងសុខស្រួល ក្នុងការយកទៅ ធ្វើមានធ្វើបានផ្ទាល់ខ្លួន ដូចជា ការគាបជំរិតប្រជាពលរដ្ឋ ដែលដឹកជញ្ជូនកសិផល ទៅលក់នៅវៀតណាម រួមទាំងការឃុបឃិត អោយក្រុមឈ្មួញ ដឹកជញ្ជូនឈើខុសច្បាប់ ចេញតាម ច្រករបៀងភូមិភិ និងច្រករបៀង ភូមិឡំ និងច្រកទ្វារអន្តរជាតិ អូរយ៉ាដាវ យ៉ាងគគ្រឹកគគ្រេង ដែលភាពអសកម្មទាំងនេះ ទាមទារឱ្យថ្នាក់លើ កោះហៅ លោក អ៊ី ចំរើន ទៅសួរនាំ ឬដាក់ពិន័យផង។
ប្រជាពលរដ្ឋ ដែលរកស៊ី ដឹកជញ្ជូនកសិផល មានដំឡូងមីជាដើម ចេញទៅលក់ នៅវៀតណាម ត្រូវ កូនចៅលោក អ៊ី ចំរើន គាបជំរិតឱ្យបង់ប្រាក់ ក្នុងឡានធំ ២០ម៉ឺនរៀល ទៅ ២៥ម៉ឺនរៀល ឡានតូចកែឆ្នៃ១០ ម៉ឺនរៀល ទៅ ១៥ម៉ឺនរៀល ព្រមទាំងមានដែក ចាក់រាវរកឈើ រំខានការរកស៊ីជាច្រើនម៉ោង។ តែចំពោះរថយន្ត ដឹកឈើខុសច្បាប់វិញ មិនមានការ ចាក់រាវ ឬពិនិត្យអ្វីនោះទេ ព្រោះមេការឈ្មួញឈើ បានរត់ការបង់លុយ រួចអស់ទៅហើយ។ លើសនេះទៀត ចំពោះ ពលរដ្ឋឆ្លងដែន ទៅប្រទេសវៀតណាម មានប៉ាស្ពែរ ចេញបង់ ៥ដុល្លារ ចូលបង់ ៥ដុល្លារ សរុប១០ដុល្លារ ចំពោះពលរដ្ឋ គ្មានប៉ាស្ព័របង់ ២០ដុល្លារ ទាំងទៅទាំងមក។
មន្ត្រីក្រោមបង្គាប់ បានប្រាប់ឱ្យដឹងថា ប្រាក់ចំណូលទាំងអស់ គឺយកជូនលោក អ៊ី ចំរើន ដែលជាមេប៉ុស្តិ៍ គ្មាននរណាហ៊ានកិបកេង សូម្បីតែមួយរៀល។ប្រជាពលរដ្ឋ បានអះអាងថា ជាគោលការណ៍ ការដឹកជញ្ជូនកសិផល មិនតម្រូវឱ្យមាន ការបង់ពន្ធ ឬបង់ថ្លៃផ្លូវ ឱ្យក្រុមកុងត្រូលជជុះនោះទេ ប៉ុន្តែលោក អ៊ី ចំរើន បានចាត់តាំង មន្ត្រីរបស់គាត់ឱ្យចុះប្រមូលលុយ ពីរថយន្តដឹកកសិផល យ៉ាងអនាធិបតេយ្យ ដើម្បីប្រមុលលុយ ស្រង់ដើមក្នុង ការទិញប៉ុស្តិ៍ និងអភិវឌ្ឍន៍មុខតំណែងយ៉ាងរលូនល្អ។
ដោយឡែក មន្ត្រីតូចតាច បានឱ្យដឹងថា មួយរយៈកន្លងទៅនេះ ឈ្មួញបានសម្រុកដឹកឈើ ចេញទៅវៀតណាម តាមច្រកទ្វារ អន្តរជាតិអូរយ៉ាដាវ យ៉ាងពេញបន្ទុក ដោយសារតែ មានការឃុបឃិតបើកដៃពីមេៗនៅច្រកនេះ ជាពិសេសលោក អ៊ី ចំរើន។ ប្រភពបានឱ្យដឹងទៀតថា ក្នុងរយៈពេល ១ខែ ឈ្មួញអាចដឹកឈើប្រណីត ចេញទៅវៀតណាម ប្រមាណ ១០០រថយន្ត ហើយពុំមានមន្ត្រីជំនាញ និងសមត្ថកិច្ចពាក់ព័ន្ធ ចាត់វិធានការ បង្ក្រាបនោះទេ។
ឈើប្រណីត ដែលត្រូវគេដឹក តាមផ្លូវជាតិលេខ៧៨ ចេញពីស្រុកតាវែង វ៉ឺនសៃ និង ស្រុកកូន មុំ ដោយរថយន្ត ប្រភេទតាកូម៉ា វីហ្គោ ធូនដ្រា ឡិចស៊ីស សាំងយ៉ុង និងឡង់គ្រីស័រ ត្រូវបានក្រុមឈ្មួញ បង់ឱ្យសមត្ថកិច្ច ប្រចាំច្រកព្រំដែន ក្នុងមួយរថយន្តចាប់ពី ៥០ ទៅ ១០០ដុល្លារ ។
ប្រភពដែលស្និទ្ធិនឹងលោក អ៊ី ចំរើន បានឱ្យដឹងថា ក្នុង១ខែៗលោក អ៊ី ចំរើន អាចប្រមូលលុយ បានយ៉ាងច្រើន ពីការឃុបឃិតឱ្យឈ្មួញ ដឹកជញ្ជូនឈើ ឆ្លងកាត់ច្រកទ្វារអន្តរជាតិអូរយ៉ាដាវ ។
សារព័ត៌មានយើងពុំអាចសុំការបំភ្លឺពីលោកប្រធានច្រកអូរយ៉ាដាវ អ៊ី ចំរើន បានទេក្នុងពេលនេះ ? ៕
