មណ្ឌលគិរី ៖ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានជម្រុញដល់មន្ទីរបរិស្ថានខេត្តមណ្ឌលគិរី ត្រូវសហការណ៍ជាមួយមន្ទីរសេដ្ឋកិច្ច និងហិរញ្ញវត្ថុខេត្ត ព្រមទាំងក្រុមហ៊ុនពាក់ព័ន្ធទៅនឹងការប្រមូលសំរាម និងការទុកដាក់សំរាមឲ្យបានត្រឹមត្រូវ ពីព្រោះបញ្ហានេះអនុវត្តនៅមិនទាន់មានប្រសិទ្ធិភាពនៅឡើយទេ ។ ឯកឧត្តមបានលើកឡើងជាចម្ងល់ថា ហេតុអ្វីកញ្ចប់ថវិកាទំលាក់ជូនហើយ បែរជាអនុវត្តមិនបានទៅតាមគោលការណ៍របស់ក្រសួង ។ នេះបើតាមប្រសាសន៍ របស់ឯកឧត្តមរដ្ឋមន្ត្រី នៅក្នុងពិធីប្រកាសផ្ទេរភារកិច្ច និងតែងតាំងមុខតំណែងប្រធានមន្ទីរបរិស្ថានខេត្តមណ្ឌលគិរី និងកិច្ចប្រជុំស្តីពី វឌ្ឍនភាពនៃការគ្រប់គ្រងតំបន់ការពារធម្មជាតិ កាលពីព្រឹកថ្ងៃទី០៦ខែធ្នូ ឆ្នាំ២០១៦នេះ។
ពិធីនេះប្រព្រឹត្តទៅដោយមានការចូលរួមពីសំណាក់ឯកឧត្តមប្រធានក្រុមប្រឹក្សាខេត្ត លោកអភិបាលរងខេត្ត មេបញ្ជាការកងកម្លាំងប្រដាប់អាវុធទាំងបីប្រភេទ លោក លោកស្រីប្រធាន អនុប្រធានមន្ទីរអង្គភាពជុំវិញខេត្ត។ ដោយផ្ទេរតំណែងភារកិច្ចថ្មីនេះជូនមន្ត្រីចំនួន០២រូបគឺលោក កែវ សុភក៌ វរៈថ្នាក់មន្ត្រីថ្នាក់លេខ២ជាមន្ត្រី បំរើការងារនៅនាយកដ្ឋានអភិរក្សតំបន់ការងារធម្មជាតិដីគោគខាងកើតទន្លេមេគង្គ នៃអគ្គនាយកដ្ឋានរដ្ឋបាលការពារ និងអភិរក្សធម្មជាតិ ឡើងកាន់តំណែងជាប្រធានមន្ទីរបរិស្ថានខេត្តមណ្ឌលគិរី ជំនួសលោក ឈិត សុផល ដែលត្រូវផ្ទេរទៅបម្រើការងារនៅក្រសួងបរិស្ថាន។
ឯកឧត្តម សាយ សំអាល់ បានមានប្រសាសន៍បន្តថា បញ្ហាសំរាមនេះគឺសំខាន់ណាស់ពាក់ព័ន្ធទៅនឹងសុខភាពការរបស់ប្រជាពលរដ្ឋ ហើយក្រុងសែនមនោរម្យមិនមែនជាការហៅចៃដន្យតៗគ្នានោះទេ ឈ្មោះក្រុងសែនមនោរម្យពោរពេញទៅដោយសោភ័ណ្ឌភាពស្រស់ស្អាត បរិយាកាសបរិសុទ្ធ ជាទឹកដីពោរពេញទៅដោយសក្តានុពល ជាពិសេសលើវិស័យទេសចរណ៍ បើបរិស្ថានមិនស្អាតគ្មានអ្នកណាចង់មកលេងនោះទេ ។
បន្ទាប់មកឯកឧត្តម បានក្រើនរំលឹកដល់មន្ត្រីជំនាញ និងអង្គភាពពាក់ព័ន្ធទាំងអស់ ត្រូវតែដកខ្លួនចេញឲ្យឆ្ងាយពីបទល្មើសព្រៃឈ្រើ ត្រូវយកចិត្តទុកដាក់ចំពោះតួនាទីភារកិច្ចរបស់ខ្លួនដែលថ្នាក់លើដាក់ជូន។ត្បិតមុខសញ្ញាទាំងអស់ដែលកំពុងតែប្រព្រឹត្តបទល្មើសកន្លងមកនោះត្រូវបានស្គាល់អស់ហើយ ទាន់នៅមានឱកាសសូមកុំប្រព្រឹត្តបន្តទៀត។
បន្ទាប់មកទៀតឯកឧត្តម បានផ្តាំផ្ញើរដល់ប្រធានមន្ទីដែលទើបតែងតាំង ត្រូវបន្តកិច្ចសហការណ៍ជាមួយមន្ទីរអង្គភាពពាក់ព័ន្ធបង្ក្រាបរាល់បទល្មើសដែលកើតមាននៅក្នុងដែនសមត្ថកិច្ចរបស់ខ្លួនឲ្យមានប្រសិទ្ធិភាព ព្រមទាំងឯកភាពផ្ទៃក្នុងដោយសមូហភាព៕
សន ចាន់ឌី
