នៅសាលាខេត្តព្រះសីហនុ បានរៀបចំកិច្ចប្រជុំស្តីពីកិច្ចសហប្រតិបត្តិការរវាងខេត្តព្រះសីហនុ និងខេត្តជាំងស៊ូ ក្រោមអធិបតីភាព លោក ឯម ភាព នាយករដ្ឋបាលខេត្តព្រះសីហនុ និងលោក ហ័ង ស៊ីឈាំង (Huang Xiqiang) នាយកមន្ទីរការបរទេសខេត្តជាំងស៊ូ ដោយពិភាក្សាលើគម្រោងកិច្ចសហប្រតិបត្តិការរវាងខេត្តព្រះសីហនុ និងខេត្តជាំងស៊ូ ក្នុងឆ្នាំបន្ត ឬក្រោយជំងឺកូវីដ-១៩ បញ្ចប់ តាមរយៈ វិដេអូ zoom ដោយមានការចូលរួមពី អភិបាលរងក្រុងព្រះសីហនុ អនុប្រធានមន្ទីរសុខាភិបាលខេត្ត អនុប្រធានមន្ទីរការងារ និងបណ្តុះបណ្តាលវិជ្ជាជីវៈ និងលោកនាយកទីចាត់ការ ទំនាក់ទំនងនិងកិច្ចសហប្រតិបត្តិការអន្តរជាតិ។
ភាគីទាំងពីរបានពិភាក្សា និងឯកភាពលើគម្រោងអាទិភាពចំនួន ៣ សម្រាប់ដាក់បញ្ជូលក្នុងគម្រោងកិច្ចសហប្រតិបត្តិការរវាងភាគីទាំងពីរគឺ៖
១. ការពង្រឹង និងជំរុញសកម្មភាពវិនិយោគ និងឧស្សាហកម្មក្នុងតំបន់សេដ្ឋកិច្ចពិសេសក្រុងព្រះសីហនុ។ សម្រាប់ក្នុងតំបន់សេដ្ឋកិច្ចពិសេសក្រុងព្រះសីហនុផងដែរ នឹងនៅតែបន្តពង្រឹងការផ្សព្វផ្សាយ និងអប់រំដល់បុគ្គលិកកម្មករ ក្នុងការការពារ ទប់ស្កាត់ និងប្រយុទ្ធប្រឆាំងជំងឺកូវីដ-១៩ និងអនុវត្តវិធានការសុខាភិបាល ៣កុំ និង៣ការពារ។ ក្នុងនោះផងដែរ ភាគីខេត្តព្រះសីហនុ បានបញ្ជាក់ថា ក្រោយពីទទួលបានវ៉ាក់សាំងកូវីដ-១៩ ពីរាជរដ្ឋាភិបាលកម្ពុជា នៅដំណាក់ការក្រោយនេះ រដ្ឋបាលខេត្តនឹងចាត់ចែងការចាក់វ៉ាក់សាំងជូនប្រជាពលរដ្ឋ រួមទាំងបុគ្គលិក កម្មករ និយោជិត និយោជក ខ្មែរនិងបរទេស ទូទាំងខេត្តព្រះសីហនុ។
២.កិច្ចសហប្រតិបត្តិការលើវិស័យអប់រំ ដោយភាគីខេត្តជាំងស៊ូ និងផ្តល់អាហាររូបករណ៍ដល់និស្សិតខេត្តព្រះសីហនុបានសិក្សានៅខេត្តជាំងស៊ូ។
៣.កិច្ចសហប្រតិបត្តិការលើវិស័យសុខាភិបាល ។ ភាគីទាំងពីរពិភាក្សាផ្លាស់ប្តូរព័ត៌មាន និងបទពិសោធន៍ក្នុងការទប់ស្កាត់ប្រយុទ្អប្រឆាំងជំងឺកូវីដ-១៩។ ភាគីទាំងពីរបានឯកភាពក្នុងការគាំទ្រ និងការជួយគ្នាទៅវិញទៅមក លើ វិស័យនេះ ជាពិសេសជំរុញឱ្យដំណើរការមន្ទីរពិសោធន៍ជំងឺកូវីដ-១៩ នៅខេត្តព្រះសីហនុ ឱ្យមាននិរន្តរភាព។
(ប្រភពរដ្ឋបាលខេត្តព្រះសីហនុ)
