(ឧត្ដរមានជ័យ)៖ នាព្រឹកថ្ងៃអាទិត្យ ១១រោច ខែជេស្ឋ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹង ថ្ងៃទី០៦ ខែមិថុនា ឆ្នាំ២០២១ គណបក្សប្រជាជនកម្ពុជាខេត្តក្រុងសំរោង បើកកិច្ចប្រជុំផ្សព្វផ្សាយសេចក្ដីសម្រេចស្ដីពីផែនការរួមឆ្ពោះទៅកាន់ការបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិទី៥ឆ្នាំ២០២២ របស់គណៈអចិន្ត្រៃយ៍គណៈកម្មាធិការកណ្ដាល ក្រោមអធិតីភាពដ៏ខ្ពង់ខ្ពស់ ឯកឧត្ដម ប៉ែន កុសល្យ ប្រធានគណបក្សប្រជាជនកម្ពុជាខេត្តឧត្ដរមានជ័យ ឯកឧត្ដម ឡៅ ឆន សមាជិកព្រឹទ្ធសភា ឯកឧត្ដម នៅ សំ តំណាងរាស្ត្រមណ្ឌលឧត្ដរមានជ័យ និងឯកឧត្ដម យិន ធិន អនុប្រធានគណបក្សប្រជាជនកម្ពុជាខេត្តឧត្ដរមានជ័យ។
ក្នុងឱកាសនោះដែរ ឯកឧត្ដម ប៉ែន កុសល្យ គូសបញ្ជាក់ថា ថ្នាក់ដឹកនាំជាក្បាលម៉ាស៊ីនគណបក្ស ត្រូវបន្តយុទ្ធនាការដណ្តើមយកសន្លឹកឆ្នោត ពោលគឺចិញ្ចឹមចលនាឲ្យដូចភ្លៀងរលឹម ធ្វើការជិតស្និទ្ធ និងគាំពារសមាជិក និងអ្នកគាំទ្រ។ ពិសេសផ្តោតសំខាន់លើអ្នកគាំទ្រតែម្តង គឺថាបើទោះមិនទាន់ក្លាយជាសមាជិកបក្សក្តី ខណៈដែលពួកគាត់មើលឃើញទង្វើដ៍ល្អ និងការកសាងជាបន្តបន្ទាប់របស់គណបក្ស ជាហេតុធ្វើឲ្យគាត់គាំទ្រនឹងបោះឆ្នោតជូនគណបក្ស នេះជាចំណុចសំខាន់។
ឯកឧត្ដម បានធ្វើការណែនាំនូវការងារបន្ថែមមួយចំនួន ដល់ប្រធានគណបក្ស សមាជិក-សមាជិកាគណបក្សថ្នាក់ក្រុង សង្កាត់ ភូមិផងដែរ៖
-ផ្ទៀងផ្ទាត់ឈ្មោះរបស់សមាជិកបក្សនៅក្នុងបញ្ជីឈ្មោះរបស់គណៈកម្មាធិការជាតិរៀបចំការបោះឆ្នោត (គ.ជ.ប) ប្រសិនបើឃើញខុសទិន្នន័យណាមួយ ត្រូវទៅជួបក្រុមចុះឈ្មោះ ដើម្បីធ្វើការកែតម្រូវភ្លាម។
– ខិតខំគ្រប់គ្រងសមាជិកបក្សដែលធ្វើចំណាកស្រុក ពិសេសត្រូវបង្កើនសមាជិកថ្មី ពង្រឹងសមាជិកបក្សចាស់ ដើម្បីដណ្ដើមជ័យជម្នះជូនគណបក្សក្នុងការបោះឆ្នោតខាងមុខ។
-ពន្លឿនការធ្វើអត្តសញ្ញាណបណ្ណសញ្ជាតិខ្មែរជូនសមាជិកបក្សឲ្យបានគ្រប់គ្នា។ ប្រសិនបើមានបញ្ហាខុសឈ្មោះ ថ្ងៃ-ខែ-ឆ្នាំកំណើត ទីកន្លែងកំណើត ឬបាត់ ឬខូច ក៏ដូចជាផុតសុពលភាពជាដើមនោះ ក៏ត្រូវម្នីម្នាដោះស្រាយជូនសមាជិកបក្សឲ្យបានលឿន។
-ណែនាំឲ្យក្រុមការងារជំរុញការកសាង និងជួសជុលកែលម្អទីស្នាក់ការគណបក្សឃុំ-សង្កាត់ ទាំងអស់ឲ្យមានសោភ័ណភាព អនាម័យ បរិស្ថានល្អ បំពាក់ឧបករណ៍ សម្ភារ: និងមធ្យោបាយធ្វើការងារឲ្យបានគ្របគ្រាន់ ពិសេសជួសជុលផ្លាកសញ្ញាគណបក្សនៅតាមដងផ្លូវ និងនៅតាមភូមិ ឃុំ-សង្កាត់ ឲ្យបានស្អាតឡើងវិញ។
ជាចុងក្រោយ៖ ឯកឧត្ដមប្រធាន បានថ្លែងការកោតសរសើរ ចំពោះលទ្ធផលការងារដែលថ្នាក់ដឹកនាំ និងសមាជិកគណបក្សប្រជាជនក្រុងសំរោងសម្រេចបាន ទាំងការដោះស្រាយបញ្ហា បំពេញតម្រូវការ និងការអភិវឌ្ឍន៍ក្នុងមូលដ្ឋានរៀងៗខ្លួន ដែលជាការរួមចំណែកយ៉ាងធំធេងជាមួយរាជរដ្ឋាភិបាលកម្ពុជា និងត្រូវពង្រឹងពង្រីកកិច្ចសហការជាមួយសមាជិកគណបក្សថ្នាក់ សង្កាត់ ភូមិ ដើម្បីសម្រេចឲ្យបាននូវសមិទ្ធផល និងជ័យជម្នះជូនគណបក្សប្រជាជនកម្ពុជា ក៏ដូចជាប្រយោជន៍ជូនប្រជាជនទូទៅផងដែរ៕
