ខេត្តឧត្តរមានជ័យ÷ នៅព្រឹកថ្ងៃទី ០៤ ខែឧសភា ឆ្នាំ២០២១ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ បានអមដំណើរ លោក មីតូរី ណាអូគី (MITORI Naoki) ប្រធានការិយាល័យកុងស៊ុល របស់ស្ថានទូតជប៉ុនប្រចាំខេត្តសៀមរាប បានអញ្ជើញត្រួតពិនិត្យសមិទ្ធផលសាលារៀនបឋមសិក្សា ០១ ខ្នង នៅភូមិនាគរាជ ឃុំគោកមន ស្រុកបន្ទាយអំពិល និងអុជធូបឧទ្ទិសជូនវិញ្ញាណក្ខន្ធ លោក “តាកាតា ហារីយ៉ូគិ” (TAKATA HARUYUKI) អតីតកងកម្លាំងនគរបាលជប៉ុន ដែលបានពលី ក្នុងបេសកម្ម រក្សាសន្តិភាព(UNTAC) នៅភូមិសាស្ត្រ ស្រុកបន្ទាយអំពិល ខេត្តឧត្តរមានជ័យ កាលពីថ្ងៃទី០៤ ខែឧសភា ឆ្នាំ១៩៩៣ ។
ក្នុងនោះត្រូវបានគេសង្កេតឃើញថា មានការចូលរួមពី លោកប្រធានមន្ទីរអប់រំខេត្ត លោកគ្រូ អ្នកគ្រូ និងអាជ្ញាធរមូលដ្ឋាន ជាច្រើនរូប ផងដែរ ។
ក្នុងនោះទៀតសោតលោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ មានប្រសាសន៍ផ្តាំផ្ញើដល់លោក គ្រូ អ្នក គ្រូ ស្ថាប័នពាក់ព័ន្ធមួយចំនួនទៀត ជាពិសេសប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នឲ្យបានខ្ពស់ចំពោះបញ្ហាជម្ងឺកូវិដ-១៩ ត្រូវរក្សាអនាម័យឲ្យបានល្អជាប្រចាំ ពាក់ម៉ាស់ រក្សាគម្លាត និង លាងដៃជាមួយជែល ឬ ទឹក អាកុល ឲ្យបានញឹកញាប់ ជាពិសេស ត្រូវ អនុវត្តន៍ឲ្យបានខ្ជាប់ខ្ជួននូវវិធានការរបស់រាជរដ្ឋាភិបាលនិងក្រសួងសុខាភិបាលកម្ពុជា គឺ ៣កុំ និង ៣ការពារ៕
