ប្រភពពីប្រជាពលរដ្ឋរស់នៅក្នុងភូមិភិ ឃុំសេសាន ស្រុកអូរយ៉ាដាវ ខេត្តរតនគិរី បានឲ្យដឹងថារហូតមកដល់ពេលនេះសកម្មភាពដឹកជញ្ជូនឈើខុសច្បាប់ទៅស្រុកយួនតាមច្រករបៀងភូមិភិ នៅតែបន្តកើតមានយ៉ាងពេញបន្ទុក ហើយមន្ត្រីជំនាញនិងសមត្ថកិច្ចពាក់ព័ន្ធ មិនចាត់វិធានការបង្ក្រាបនោះទេ។
មានការរិះគន់ថាលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី និងសមត្ថកិច្ចពាក់ព័ន្ធដទៃទៀត គឺជាអ្នកឃុបឃិតបើកដៃឲ្យឈ្មួញដឹកជញ្ជូនឈើទៅស្រុកយួនតាមច្រករបៀងភូមិភិ ដើម្បីជាថ្នូរនឹងផលប្រយោជន៍ទើបអ្វីៗអាចប្រព្រឹត្តទៅដោយរលូន។ ប្រសិនបើឈ្មួញគ្មានទំនាក់ទំនងជាមួយមន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធទេនោះ ប្រាកដជាត្រូវប្រឈមនឹងការបង្ក្រាបចៀសមិនផុតឡើយ ហើយមានការថតរូបភាពផ្សព្វផ្សាយតាមបណ្ដាញព័ត៌មានទៀតផង។
ប្រភពពីសមត្ថកិច្ចពាក់ព័ន្ធបានឲ្យដឹងថា មានឈ្មួញជាច្រើននាក់ដែលបន្តសកម្មភាពដឹកឈើចេញទៅស្រុកយួន តាមច្រករបៀងភូមិភិ ក្នុងនោះមានដូចជាឈ្មោះ ណាក់, ឈ្មោះ វ៉ៃ, ឈ្មោះ នូ, ឈ្មោះ ចាន់ធី, ឈ្មោះ ស្រីល័ក្ខណ៍, ឈ្មោះ វ៉ែន និងឈ្មោះ ឆៃ ជាដើម។ ក្នុងចំណោមឈ្មួញទាំងនេះគឺពួកគេមានទំនាក់ទំនងយ៉ាងជិតស្និទ្ធជាមួយសមត្ថកិច្ចនគរបាល និងសមត្ថកិច្ចផ្សេងៗទៀតក្នុងស្រុកអូរយ៉ាដាវ ទើបអាចដឹកជញ្ជូនឈើចេញទៅស្រុកយួនតាមច្រករបៀងភូមិភិ និងច្រករបៀងផ្សេងទៀតនៅក្បែរៗនោះ។ ចំណែកឈ្មួញខ្លះដែលមានខ្នងបង្អែកក្រាស់ៗពួកគេដឹកជញ្ជូនឈើចេញតាមច្រកទ្វារអន្តរជាតិអូរយ៉ាដាវតែម្តង ព្រោះមានការឃុបឃិតពីមន្ត្រីជំនាញ និងសមត្ថកិច្ចពាក់ព័ន្ធយ៉ាងរលូន។
តាមប្រភពពីឈ្មួញមួយចំនួនដែលបន្តសកម្មភាពដឹកជញ្ជូនឈើទៅស្រុកយួនតាមច្រកព្រំដែន និងច្រករបៀងក្នុងស្រុកអូរយ៉ាដាវ បានឲ្យដឹងថា មុខរបររបស់ពួកគេពុំបានទទួលផលចំណេញច្រើនប៉ុន្មានទេ ព្រោះមានការបង់លុយឲ្យមន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័ន ដើម្បីសម្របសម្រួលបើកផ្លូវ។ ក្នុងនោះនៅតាមផ្លូវជាតិលេខ៧៨ រហូតដល់ច្រកទ្វារអន្តរជាតិអូរយ៉ាដាវ និងច្រករបៀងភូមិភិ ឬច្រករបៀងភ្នំក្រហមជាដើម ពួកគេត្រូវបង់លុយឲ្យមន្ត្រីរដ្ឋបាលព្រៃឈើ មន្ត្រីបរិស្ថាន មន្ត្រីគយ នគរបាលប្រឆាំងបទល្មើសសេដ្ឋកិច្ច នគរបាលអន្តោប្រវេសន៍ និងកម្លាំងអាវុធហត្ថផងដែរ ទើបអាចទៅដល់គោលដៅតាមការគ្រោងទុក។ ដូច្នេះលោក វេង សាខុន រដ្ឋមន្ត្រីក្រសួងកសិកម្ម គួរពិនិត្យមើលបញ្ហាខាងលើនេះផង ព្រោះបច្ចុប្បន្នសកម្មភាពដឹកជញ្ជូនឈើទៅស្រុកយួនតាមច្រករបៀងភូមិភិ ឃុំសេសាន ស្រុកអូរយ៉ាដាវ នៅតែកើតឡើងយ៉ាងរាលដាល ហើយមន្ត្រីរដ្ឋបាលព្រៃឈើខេត្តរតនគិរី មិនចាត់វិធានការទប់ស្កាត់ឡើយ៕
