ខេត្តបន្ទាយមានជ័យ ៖ ផ្លូវមួយខ្សែមានប្រវែង១១គីឡូម៉ែត្រ ដែលជាសរសៃឈាមរបស់ឃុំស្រះរាំង និងឃុំបន្ទាយនាង ក្នុងស្រុកមង្គលបូរី ខេត្តបន្ទាយមានជ័យ។ ផ្លូវមួយខ្សែនេះរងការខូចខាតយ៉ាងដំណំ ដោយសារតែទឹកភ្លៀងហូរកាត់ និងគ្មានលូ និងប្រឡាយសំរាប់បង្ហូរទឹកភ្លៀងជាយូរខែឆ្នាំមកហើយ។ ប្រជាពលរដ្ឋនៅក្នុងឃុំទាំង២នេះ ជួបការលំបាកក្នុងការធ្វើដំណើរទៅវិញទៅមក។ ទើបលោកឧត្ដមសេនីយ៍ត្រី ឱបូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យ បានធ្វើការគៀងគរស្វែងរកសប្បុរសជនក្នុងស្រុក និងក្រៅស្រុកដើម្បីរកថវិកាមកជួសជុលផ្លូវមួយខ្សែនេះឡើងវិញ ដើម្បីសម្រួលចរាចរទៅមកឲ្យបានស្រួលឡើងវិញ។
លុះនៅព្រឹកថ្ងៃទី៨ ខែកញ្ញា ឆ្នាំ២០១៦ នេះ លោកវរ:សេនីយ៍ឯក វង្ស ធី តំណាងឲ្យលោកឧត្ដមសេនីយ៍ត្រី ឱ បូរិន្ទ ប្រធានក្រុមការងារចុះជួយឃុំស្រះរាំង និងលោកឧកញ៉ា សាន តេង និង លោកស្រី ឈុន កាន លោកវរៈសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ លោកឡុងពុនអភិបាលស្រុកមង្គលបូរី និងមន្ត្រីអ្នកមុខអ្នកការជាច្រើននាក់ បានបើកការដ្ឋានជួសជុលផ្លូវមួយខ្សែនេះឡើងវិញ ដែលមានប្រវែង១១គីឡូម៉ែត្រ ចាប់ពីថ្នល់ជាតិ ដែលស្ថិតក្នុងឃុំបន្ទាយនាងរហូតដល់ភូមិច្រាប ឃុំស្រះរាំង។
ក្នុងឱកាសបើកការដ្ឋានជួសជុលផ្លូវមួយខ្សែនោះដែរ លោកឧកញ៉ា សាន តេង បានមានប្រសាសន៍ថា ក្នុងការជួសជុលផ្លូវមួយខ្សែនេះលោកបានចំណាយអស់ថវិកា ប្រហែល៧.០០០ដុល្លា ក្នុងនោះមានគ្រឿងចក្រចំនួន២គ្រឿង ហើយក្នុងការជួសជុលនោះ ប្រើរយៈពេលប្រហែល៧ថ្ងៃឲ្យហើយ ដើម្បីឲ្យប្រពលរដ្ឋនៅក្នុងឃុំទាំង២នេះ បានធ្វើចរាចរទៅមកឲ្យបានស្រួល។ ក្នុងនោះដែរ លោកវរ:សេនីយ៍ឯក វង្ស ធី បានមានប្រសាសន៍ដែរថា ក្នុងឃុំស្រះរាំងនេះកាលពីដើមឡើយ មានការខ្វះខាតជាច្រើនដូចជា ផ្លូវពិបាកក្នុងការធ្វើដំណើរ គ្មានធារាសាស្ត្រសំរាប់ផ្តល់ទឹកធ្វើស្រែ គ្មានស្រះ គ្មានអណ្តូងទឹកនិងនៅមានបញ្ហាជាច្រើនដែលត្រូវប្រឈម។
ក្រោយពីបានបង្កើតក្រុមការងារចុះជួយឃុំស្រះរាំងនេះ ធ្វើឲ្យឃុំស្រះរាំងមានការរីកចំរើនឥតឈប់ឈរ។ ចំណែកលោក ឡុង ពុន អភិបាលស្រុកមង្គលបូរី ក៏បានមានប្រសាសន៍ដែរថា ក្នុងនាមលោកជាអាជ្ញាធរស្រុកមង្គលបូរីនេះ លោកសូមថ្លែងអណរគុណដល់ក្រុមការងារចុះជួយឃុំស្រះរាំង ដែលកន្លងមកខិតខំជួយកសាងក្នុងឃុំស្រះរាំងនេះឲ្យមានការរីកចំរើន ឥតឈប់ឈរ ហើយលោកក៏សូមអរគុណដល់លោកឧកញ៉ា សាន តេង និងលោកស្រី ឈុន កាន ដែលបានចំណាយថវិកាផ្ទាល់ខ្លួនយ៉ាងច្រើន ជួយកសាងផ្លូវមួយខ្សែនេះឡើងវិញ ដើម្បីទុកឲ្យប្រជាពលរដ្ឋទាំង២ឃុំ នេះ បានធ្វើចរាចរទៅមកបានស្រួលផងដែរ៕
