ខេត្តប៉ៃលិន ៖ ឯកឧត្តម កើត សុធា អភិបាល នៃគណៈអភិបាលខេត្តប៉ៃលិន បានថ្លែងនៅកន្លែ ងដាំកូនឈើ ស្ថិតនៅចំណុចជើងភ្នំយ៉ាត ក្នុងភូមិវត្ត សង្កាត់ប៉ៃលិន ក្រុងប៉ៃលិន កាលពីព្រឹកថ្ងៃទី២៥ ខែកក្កដា នេះ នាឱកាសរុក្ខទិវា ០៩ កក្កកដា ថា សមត្ថកិច្ច និងមន្ត្រីជំនាញទាំងអស់ ត្រូវតែរិតបន្តឹងចំពោះការកាប់បំផ្លាញព្រៃឈើគ្រប់ប្រភេទនៅលើភ្នំខៀវ ក៏ដូចជាតំបន់អភិរក្ស ផ្សេងៗ ដោយត្រូវចុះអប់រំដល់ប្រជាពលរដ្ឋឲ្យយល់ដឹងច្បាស់ពីផលប៉ះពាល់ នៃការបាត់បង់ព្រៃឈើ ជាធនធានធម្មជាតិដ៏សំខាន់សម្រាប់ទាក់ទាញទឹកភ្លៀងស្រោចស្រពដាំណាំដាំដុះ ។
ជាមួយគ្នានោះដែរ ឯកឧត្តម ក៏បានព្រមានដល់អ្នកដែលកំពុងតែហ៊ុមព័ទ្ធយកដីព្រៃធ្វើជាកម្មសិទ្ធិផ្ទាល់ខ្លួន ដោយកាប់ព្រៃអភិរក្ស និងឈុសឆាយព្រៃយកដី ត្រូវបញ្ឈប់សកម្មភាពជាបន្ទាន់ ព្រោះទង្វើទាំងនោះ នាំមកនូវផលប៉ះពាល់យ៉ាងធ្ងន់ធ្ងរដល់បរិស្ថាន និងបង្កនូវគ្រោះមហន្តរាយរាំងស្ងួត ជាពិសេសបញ្ហានេះជាបទល្មើស ដែលច្បាប់មិនអាចលើកលែងទោសឲ្យនោះឡើយ ។
ជាចុងក្រោយ ឯកឧត្តម ក៏បានអំពាវនាវដល់បងប្អូនប្រជាពលរដ្ឋទាំងអស់ ជាពិសេ សយុវជន ត្រូវតែខិតខំប្រឹងប្រែងជួយថែរក្សា និងដាំដើមឈើសារជាថ្មីឡើងវិញ ដើម្បីការពារបរិស្ថាន និងជាគម្របផែនដី សំរាប់ប្រយោជន៍យើងទាំងអស់គ្នា ។
ជាមួយគ្នានោះដែរ លោក អោម វីរៈ នាយផ្នែករដ្ឋបាលព្រៃឈើប៉ៃលិន បានឲ្យដឹងថា ថ្ងៃនេះជាថ្ងៃប្រារព្ធពិធីដាំកូនឈើ០៩ កក្កដា ដែលមានប្រធានបទ«ការដាំដើមឈើ និងព្រៃឈើជាកាតព្វកិច្ចរបស់យើងទាំងអស់គ្នា» ហើយការដាំកូនឈើនេះមានចំនួន៣៥០០ដើម ក្នុងនោះមានកូនឈើគ្រប់ប្រភេទ ដូចជា ត្របែកព្រៃ បេង នាងនួន ធ្នង់ គ្រញូង ក្ងោក ដោយនាំគ្នាដាំនៅលើជើងភ្នំយ៉ាត ហើយសល់ប៉ុន្មានទៀត ខាងលោកនឹងនាំគ្នាបន្តដាំនៅតាមដងផ្លូវជាតិលេខ៥៧ផងដែរ ។
ចំណែកប្រជាពលរដ្ឋរស់នៅខេត្តប៉ៃលិន បានឱ្យដឹងថា ពួកគាត់ពិតជាសប្បាយរីករាយយ៉ាងខ្លាំង ខណៈឃើញអាជ្ញាធរក៏ដូចជាមន្ត្រីរដ្ឋបាលព្រៃឈើ និងខាងបរិស្ថានចុះទៅធ្វើពិធីដាំដើមឈើ ។ ប៉ុន្តែពួកគាត់សំណូមពរឱ្យ ខាងសមត្ថកិច្ចធ្វើការហាមឃាត់ និងទប់ស្ងាត់ជនល្មើ ស ដែលកំពុងតែកាប់បំផ្លាញ រានព្រៃជើងភ្នំខៀវ យកដីដាំដំណាំ ដែលពីមួយឆ្នាំទៅមួយឆ្នាំជិតដល់កំពូលហើយ ។ ពួកគាត់បន្តទៀតថា ចំណែកនៅខាងលើភ្នំខៀវវិញ ដើមឈើធំៗ ល្អៗ ត្រូវក្រុមឈ្មួញលួចកាប់ដឹកតាមម៉ូតូ និងរថយន្តយកទៅលក់តាមសិប្បកម្មនានាក្នុងក្រុងជា រាល់ថ្ងៃ ដែលជាហេតុធ្វើឱ្យមានការបាត់បង់ព្រៃឈើ ហើយក៏ជះឥទ្ធិពលក្តៅខ្លាំងឡើងៗ ធ្វើឱ្យពួកគាត់មានការលំបាករស់នៅយ៉ាងខ្លាំងផងដែរ ៕
ដោយ ៖ នីយ៉ា
