មណ្ឌលគិរី៖ កូនដំរីព្រៃ១ក្បាល ជាប់អន្ទាក់របស់ព្រាន កំពុងត្រូវបានជួយសង្គ្រោះពីសំណាក់មន្ទីរបរិស្ថាន និងអង្គការ WCF ដើម្បីជួយសង្គ្រោះជីវិត កាលពីថ្ងៃ២៣ កក្កដាឆ្នាំ២០១៦ បន្ទាប់ពី សេចក្តីរាយការណ៍របស់ប្រជាពលរដ្ឋអាស្រ័យផលពីព្រៃឈើប្រទះឃើញ ។
លោក ឈិត សុផល ប្រធានមន្ទីរបរិស្ថានខេត្តមណ្ឌលគិរី បានប្រាប់អោយកាសែតដឹងថា កូនដំរីខាងលើមានអាយុប្រហែល ១ ឆ្នាំ ពេលនេះ មន្ត្រីបរិស្ថាន និងមន្ត្រីរបស់អង្គរការWCFកំពុងជួយសង្រោះ ។
រហូតដល់ព្រឹកថ្ងៃទី២៥ នេះ កូនដំរីរងរបួសនៅមិនទាន់នាំដល់កន្លែងសុវត្ថិភាពនៅឡើយទេ ដោយសារស្ថានភាពផ្លូវធ្វើដំណើរលំបាកខ្លាំង។
ដោយឡែក លោក មាគ វុឌ្ឍី ប្រធានគំរោង WCF បានអោយដឹងដែរថា កូនដំរីខាងលើ ត្រូវពលរដ្ឋរាយការណ៍នៅថ្ងៃទី២៣ កក្កដា លោកបញ្ជូនមន្ត្រីផ្នែកស្រាវជ្រាវទៅដល់កន្លែងដែលកូនដំរីជាប់អន្ទាក់ ។ លោកបានឲ្យដឹងថា កូនដំរីដែលជាប់អន្ទាក់ខាងលើ វាជាប់អន្ទាក់របស់វៀតណាម វាមានអាយុប្រហែល១ឆ្នាំ វាជាប់អន្ទាក់នៅចំណុច ចន្លោះគីឡូម៉ែត៦៤ ស្ថិតនៅភូមិសាស្ត្រឃុំស្រែខ្ទុមស្រុកកែវសីមា ។ លោកបន្តទៀតថា ដោយសារស្ថាភាពផ្លូវក្នុងព្រៃពិបាកធ្វើដំណើរ រហូតមកដល់ថ្ងៃទី២៥ កក្កដា ឆ្នាំ២០១៦នេះ កូនដំរីនោះនៅមិនទាន់បញ្ជូនមកដល់ស្នាក់អភិរក្សនៅឡើយទេ ។
រហូតមកដល់ពេលនេះ ជើងកូនដំរីដែលរងរបួសមានសភាពហើមជាខ្លាំង ហើយមិនអាចដើររួចទេ ខណៈដែលក្រុមសង្គ្រោះកំពុងព្យាយាម ។
តាមការឲ្យពីមន្ត្រីជំនាញ កូនដំរីនេះនឹងត្រូវបញ្ជូនទៅសួនសត្វភ្នំតាម៉ៅ និងស្វែងការព្យាបាលនៅទីនោះ ៕
