ក្រចេះ ៖ ក្រុមចោរ ប្រដាប់ដោយអាវុធវែងខ្លីបានធ្វើសកម្មភាពចូលប្លន់ផ្ទះប្រជាពលរដ្ឋមួយកន្លែង នៅនៅភូមិត្រពាំងស្រែឃុំ ២ ធ្នូ ស្រុកស្នួល ខេត្តក្រចេះ កាលពីវេលាម៉ោង ២០ និង៣០នាទី ថ្ងៃទី២៤ ខែកក្ដដា ឆ្នាំ២០១៦ ដោយបានវាយម្ចាស់ផ្ទះ និងបាញ់ប្រហារថែមទៀត ។
ទ្រព្យសម្បត្តិដែលក្រុមចោរប្លន់យកពីម្ចាស់ផ្ទះនោះ តាមការឲ្យដឹងថា រួមមានខ្សែដៃមាសចំនួន ២ ដំឡឹង ក្រវិលផ្លាកទីន ១ ជី ចិញ្ចៀនផ្លាកទីន ១ ជី ទូរស័ព្ទដៃចំនួន៣គ្រឿង និងលុយមួយចំនួនទៀត ។
តាមការបញ្ជាក់ពីអាវុធហត្ថស្រុកស្នួលបានឲ្យដឹងថា ករណីនេះបង្កឡើងដោយជនសង្ស័យមិនស្គាល់អត្តសញ្ញាណមានគ្នាចំនួន ៧ នាក់ប្រដាប់ដោយអាវុធខ្លីគ្រប់ដៃនិងអាវុធវែង ១ ដើម ហើយ បានធ្វើសកម្មភាពយកអាវុធខ្លីភ្ជង់ និងវាយជនរងគ្រោះជាម្ចាស់ផ្ទះឈ្មោះ សួង ហុង ភេទស្រីអាយុ៤៦ឆ្នាំ ត្រូវ ត្រូវចំសៀតផ្កា ខាងឆ្វេងរងរបួសជាទម្ងន់ ។ ចំណែកកូនប្រុសរបស់ជនរងគ្រោះ ឈ្មោះ តាំង វ៉ាន់ធី អាយុ១៦ឆ្នាំ ត្រូវក្រុមចោរយកអាវចងថែមទៀត ។ ខណៈពេលនោះ ប្ដីជនរងគ្រោះឈ្មោះ តាំង ម៉ានី បានជិះម៉ូតូមកដល់ផ្ទះ ក៏ត្រូវបានក្រុមចោរបាញ់ ១ គ្រាប់តែខុស ហើយជនរងគ្រោះបានរត់រួច ។ ក្រោយពីពួកវាធ្វើសកម្មភាពប្លន់រួច ក្រុមចោរប្លន់បានរត់គេចខ្លួនដោយផ្លោះតាមរបងផ្ទះខាងក្រោយ ។
បច្ចប្បន្ន សមត្ថកិច្ចកំពុងស្រាវជ្រាវកំណត់មុខសញ្ញាជនសង្ស័យ ៕
