ខេត្តឧត្តរមានជ័យ ៖ នៅព្រឹកថ្ងៃទី២១ ខែមករា ឆ្នាំ២០២១ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ បានដឹកនាំកិច្ចប្រជុំបូកសរុបលទ្ធផល កិច្ចប្រតិបត្តិការការងារ ប្រចាំខែមករា ឆ្នាំ២០២១ និងលើកទិសដៅអនុវត្តបន្ត ។ កិច្ចប្រជុំនេះដែលមានការចូលរួមពីលោក-លោកស្រីស្នងការរង ,លោកនាយរងផែន ,លោកនាយការិយាល័យជំនាញ ,លោកអធិការក្រុង-ស្រុកទាំង០៥ ,លោកមេបញ្ជាការវរ:សេនាតូចនគរបាលការពារព្រំដែនគោកទាំង០២ ផងដែរ។
បន្ទាប់ពីលោកឧត្តមសេនីយ៍ទោ ហួត សុធី ស្នងការនគរបាលខេត្ត មានមតិបើកអង្គប្រជុំរួច លោកវរសេនីយ៍ឯក ព្រំ ប៊ុនរិទ្ធ បានឡើងអានរបាយការណ៍ប្រចាំខែធ្នូ ឆ្នាំ២០២០ បន្ទាប់លោកវរសេនីយ៍ឯក ធូ សុភា នាយការិយាល័យនគរបាលចរាចរណ៍ផ្លូវគោក បានឡើងផ្សព្វផ្សាយសេចក្តីណែនាំលេខ០០១ របស់ក្រសួងមហាផ្ទៃ ស្តីពីការលុបបំបាត់ការបង្កសំឡេងរំខានលើសកម្រិតដោយយានយន្តគ្រប់ប្រភេទ ។
កិច្ចប្រជុំនេះដែរលោកឧត្តមសេនីយ៍ត្រី ហុង ចំរើន ស្នងការរង ទទួលផែនការងារគ្រប់គ្រងអាវុធជាតិផ្ទុះ និងអគ្គិភ័យ បានផ្សព្វ ផ្សាយសេចក្តីណែនាំរបស់នាយកដ្ឋាន ដល់លោកអធិការក្រុង-ស្រុក និងអស់លោកនាយប៉ុស្ត៍រដ្ឋបាលទាំងអស់ ឲ្យធ្វើការផ្សព្វផ្សាយលេខទូរស័ព្ទរបស់អង្គភាពពន្លត់អគ្គីភ័យ ដល់ប្រជាពលរដ្ឋ និងណែនាំ បឋមឲ្យចេះបង្កា ទប់ស្កាត់រាល់ពេលអគ្គីភ័យកើតឡើងផងដែរ ។
ក្នុងឱកាសនោះដែរ លោកឧត្តមសេនីយ៍ទោ ស្នងការ បានណែនាំដល់លោកនាយការិយាល័យជំនាញ ពិសេសលោកអធិការនគរបាលក្រុង-ស្រុកទាំង០៥ ត្រូវយកចិត្តទុកដាក់អនុវត្តសេចក្តីណែនាំរបស់ក្រសួងមហាផ្ទៃអោយមានប្រសិទ្ធភាពខ្ពស់ ។
ជាមួយគ្នានោះ លោកឧត្តមសេនីយ៍ទោ បានអញ្ជើញប្រគល់ជូននូវលិខិតថ្លែងអំណរគុណ ដល់ថ្នាក់ដឹកនាំ ដែលបានចូលរួមឧបត្ថម្ភនៅថវិការមួយចំនួន ដើម្បីកសាងអង្គភាពស្នងការដ្ឋាន និងបានប្រគល់ម៉ាស៊ីនម៉ាស៊ីនពិនិត្យជាតិអាល់កុលដល់លោកអធិការនគរបាលក្រុង-ស្រុក ទាំង០៥ ដោយក្នុងមួយស្រុកទទួលបានម៉ាស៊ីនមួយឈុត ដែលជាអំណោយរបស់ឯកឧត្ដម នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ដើម្បីយកទៅ ប្រើប្រាស់នៅពេលចុះអនុវត្តច្បាប់ចរាចណ៍ផ្លូវគោក ៕
