(ខេត្តប៉ៃលិន) នៅរសៀលថ្ងៃទី៣ខែមករាឆ្នាំ២០២១នេះ លោកជំទាវ បាន ស្រីមុំ អភិបាលនៃគណៈអភិបាលខេត្តប៉ៃលិន និងឯកឧត្តម សៅ សារ៉ាត់ អ្នកតំណាងរាស្ត្រមណ្ឌលប៉ៃលិន បានអញ្ជើញចុះសំណេះសំណាល លើកទឹកចិត្តដល់ក្រុមគ្រូពេទ្យប្រឆាំងកូវីដ១៩ ដែលកំពង់បំពេញបេសកកម្មរបស់ខ្លួននៅមណ្ឌលចត្តាឡីស័កផ្ទះសំណាក់គ្រូបង្រៀន ក្នុងក្រុងប៉ៃលិន ខេត្តប៉ៃលន។
ក្នុងឱកាលនោះដែរ លោកជំទាវ បានផ្តាំផ្ញើដល់ក្រុមគ្រូពេទ្យទាំងអស់ឲ្យយកចិត្តទុកដាក់ក្នុងពិនិត្យព្យាបាលជូនបងប្អូនពលករដែលទើបនឹងឆ្លងដែនមកពីប្រទេសថៃ ព្រមទាំងធ្វើយ៉ាងណាឲ្យគោរពតាមគោលការណ៍របស់ក្រសួងសុខាភិបាល អ្នកដែលទើបនឹងមកពីក្រៅប្រទេសត្រូវនៅធ្វើចត្តាឡីស័ករយៈពេលចំនួន១៤ ចំពោះអ្នកដែលឆ្លងជំងឺគឺត្រូវនៅបន្តព្យាបាលរហូតជាសះស្បើយ ទើបអាចចេញពីមណ្ឌលចត្តាឡីស័កបាន ពីព្រោះកាលណាបើយើងធ្វេសប្រហែសនោះ គឺវាអាចមានការឆ្លងចូលដល់សហគមន៍គឺមានហានិភ័យខ្លាំងបំផុត។
លោកជំទាវ ក៏បានថ្លែងអំណរគុណដល់ក្រុមគ្រូពេទ្យទាំងអស់ចំពោះការលះបង់ដ៏ធំធេងសម្រាប់ការចូលរួមប្រឆាំងនឹងជំងឺកូវីដ-១៩ និងលើកទឹកចិត្តដល់គ្រូពេទ្យឲ្យថែរក្សាការងារសុខភាព និងសុវត្ថិភាពខ្លួនឯងជាមុន មុននឹងចូលព្យាបាលជូនអ្នកជំងឺ បើយើងរួមគ្នាយើងនឹងឆ្លងផុតគ្រាដ៏លំបាកនេះជាមួយគ្នា៕
