មណ្ឌលគិរី ៖ សកម្មភាពដឹកឈើនៅក្នុងស្រុកកែវសីមានៅតែបន្តដំណើរការយ៉ាងរលូន ទោះបីជាមានបទបញ្ជាទប់ស្កាត់និងបង្ក្រាបបទល្មើសព្រៃឈើដ៏ក្តៅគគុកពីសម្តេចនាយករដ្ឋមន្ត្រីតេជោ ហ៊ុន សែន កាលពីថ្ងៃ១៥ មករា ២០១៦មក ដែលមានឯកឧត្តមនាយឧត្តមសេនីយ៏ សៅ សុខា ជាប្រធានគណៈកម្មការចម្រុះទប់ស្កាត់ និងបង្ក្រាបបទល្មើសព្រៃឈើ ក៏ដោយរហូតមកដល់សព្វថ្ងៃនេះ គឺនៅតែមានក្រុមឈ្មួញមួយក្តាប់តូចនៅតែបន្តការលួចឆ្មក់ធ្វើចរាចរណ៌ដឹកជញ្ជូនឈើយ៉ាងសស្រាក់សស្រាំនៅតាមបណ្តោយខ្សែរបន្ទាត់ព្រំដែនគោក ក៏ដូចជាតាមច្រករបៀងនៅក្នុងស្រុកកែវសីមាខេត្តមណ្ឌលគិរី ។
ទាក់ទិនបញ្ហានេះ គេសង្កេតឃើញថា ក្រុមឈ្មួញទាំងនោះហាក់ដូចជាមិនមានការទប់ស្កាត់ និងបង្ក្រាប់ពីមន្ត្រីជំនាញណាមួយនោះទេ ពោលគឺហាក់ដូចជាមានការឃុបឃិតគ្នារវាងឈ្មួញ និងមន្ត្រីជំនាញទាំងនោះ។
ប្រភពពីប្រជាពលរដ្ឋដែលនៅក្បែរច្រករបៀងក៏ដូចជានៅតាមដងផ្លូវដែលស្របនឹងខ្សែរបន្ទាត់ព្រំដែនបានរាយការណ៏ថានៅតែមានសកម្មភាពដឹកជញ្ជូនឈើឆ្លងដែនយ៉ាងគគ្រឹកគគ្រេងជារៀងរាល់យប់ដដែលដូចកាលពីសម្តេចតេជោ ហ៊ុន សែន មិនទាន់បានចេញបញ្ជាទប់ស្កាត់ និងបង្ក្រាបបទល្មើសព្រៃឈើ ។
ប្រភពក្រៅផ្លូវការមួយទៀតបានអោយដឹងថា នៅចំណុច៣៥គេតែងតែ ឃើញមានប្រភេទឡានតូចដឹកឈើចូលក្នុងផ្ទះ របស់មន្ត្រីនគរបាលឈ្មោះ យ៉ាំង ចារៀងរាល់យប់ស្ទើរតែទល់ភ្លឺក្នុងមួយយប់ៗ ។
ដោយឡែក ប្រពន្ធរបស់លោក យ៉ាំង ដែលជាមន្ត្រីនគរបាលរូបនោះបានប្រាប់អ្នកយកព័ត៌មានថា ឈើដែលដឹកចូលក្នុងផ្ទះរបស់គាត់នោះ មិនមែនជាឈើរបស់គាត់ទេ គឺឈើរបស់អ្នកដទៃគេដឹកយកមកផ្ញើក្នុងផ្ទះរបស់គាត់តែប៉ុណ្ណោះ។
ចំណែកឯលោក ជុយ សុខឃាង នាយផ្នែករដ្ឋបាលព្រៃឈើស្រុកកែវសីមា បានប្រាប់អ្នកយកព័ត៌មានថា ចាប់ពីពាក់កណ្ដាលខែមករា រហូតមកដល់ថ្ងៃទ២៩ មិនា នេះ ផ្នែករដ្ឋបាលព្រៃកែវសីមាបានធ្វើការបង្ក្រាបបានបទល្មើសមួយចំនួនរួចមក ហើយព្រមទាំងកំពុងតែបន្តខិតខំទប់ស្កាតបន្ថែមទៀតមិនបញ្ឈប់ត្រឹមនឹងនោះទេ ក្នុងនោះ លោកក៏បានបញ្ជាក់បន្ថែមផងដែរថា ទោះជាយ៉ាងណា ក៏នៅតែមានចន្លោះប្រហោងខ្លះដែរវាមិនអាចទប់ស្កាត់បានមួយរយភាគរយនោះទេ ៕
ដោយ ៖ គឹម ចំរើន
