ខេត្តស្វាយរៀង ៖ប្រភពព័ត៌មានពីមន្ត្រីប៉ូលិសខេត្តស្វាយរៀងបានឲ្យដឹងថា លោកផ្កាយ២ ស៊ូ ម៉ារ៉ាឌី បានដេញថ្លៃទទួលបានបេសកកម្ម(P)សម្រាប់ខេត្តស្វាយរៀង។ ប៉ុន្តែលោកមិនបានចុះបំពេញការងារតាមតួនាទីភារកិច្ចដែលមានចែងក្នុង លក្ខខណ្ឌនៃបេសកកម្មនោះទេ ហើយបានប្រគល់ឲ្យលោកវរសេនីយ៍ត្រី ជួប វណ្ណឌី ធ្វើការជំនួស គ្រាដែលប្រភពផ្សេងទៀតបានអះអាងថា លោក ស៊ូ ម៉ារ៉ាឌី បានលក់P នោះទៅឲ្យវរេសនីយ៍ត្រី ជួប វណ្ណឌី ក្នុងតម្លៃយ៉ាងហោចណាស់ពី៤០០០ទៅ៥០០០ដុល្លារក្នុងរយៈពេល១ខែ។
លោកផ្កាយ២ ស៊ូ ម៉ារ៉ាឌី អនុប្រធាននាយកដ្ឋានសេដ្ឋកិច្ចក្រសួងមហាផ្ទៃបាននិងកំពុងរងនូវការ រិះគន់ថា បានលក់បេសកកម្ម(P) ដែលលោកដេញថ្លៃបានឲ្យទៅលោកវរសេនីយ៍ត្រី ជួប វណ្ណឌី ហើយបានប្រើប្រាស់ជនស៊ីវិល២នាក់ដែលមិនមែនស្ថិតក្នុងក្របខ័ណ្ឌ ប៉ូលិសទៅបំពេញការងារជាប៉ូលិសសេដ្ឋកិច្ច ដោយម្នាក់ឈរជើងនៅច្រកទ្វារអន្តរជាតិបាវិត និងម្នាក់ទៀតឈរជើងនៅទីរួមខេត្តស្វាយរៀងដើម្បីប្រមូលលុយ។
ប្រភពដដែលបានបញ្ជាក់ថា ក្រោយទទួលបានសិទ្ធិពីលោកផ្កាយ២ ស៊ូ ម៉ារ៉ាឌី លោកវរេសនីយ៍ត្រី ជួប វណ្ណឌី ក៏បានជ្រើសរើសមនុស្ស២នាក់ដែលគេដឹងថា មិនស្ថិតក្នុងក្របខ័ណ្ឌប៉ូលិសសេដ្ឋកិច្ចឲ្យធ្វើការងារជាប៉ូលិស សេដ្ឋកិច្ចដោយឲ្យម្នាក់ឈរជើងនៅច្រកអន្តរជាតិបាវិត និងម្នាក់ទៀតឈរជើងនៅទីរួមខេត្តស្វាយរៀង ខណៈដែលមនុស្សទាំងពីរនាក់នេះមិនបានប្រើជំនាញក្នុងការត្រួតពិនិត្យ មុខទំនិញនាំចូលពីប្រទេសវៀតណាមនោះទេ ប៉ុន្តែពួកគេអង្គុយចាំតែយកលុយពីពួកឈ្មួញដើម្បីយកមកញាត់ក្នុង ហោប៉ៅលោក ជួប វណ្ណឌី ដែលទទួលម៉ៅការពីលោកផ្កាយ២។
ទាក់ទិននឹងករណីខាងលើនេះមន្ត្រីប៉ូលិសខេត្តស្វាយរៀងម្នាក់ដែលសុំមិន ឲ្យបញ្ចេញឈ្មោះបានឲ្យដឹងថា មនុស្ស២នាក់ដែលលោក ជួប វណ្ណឌី ប្រើប្រាស់ឲ្យដើរតួនាទីជាប៉ូលិសសេដ្ឋកិច្ចប្រចាំច្រកទ្វារអន្តរជាតិ បាវិត និងទីរួមខេត្តស្វាយរៀងនោះគឺពួកគេមិនបានសហការជាមួយប៉ូលិសមូលដ្ឋាន ឡើយ និយាយរួមគឺគេធ្វើអ្វីតាមអំពើចិត្ត និងនាំឲ្យមានការថ្នាំងថ្នាក់ពីក្រុមអ្នករកស៊ីនាំទំនិញចូល ហើយការថ្នាំងថ្នាក់នោះត្រូវធ្លាក់មកលើមន្ត្រីប៉ូលិសមូលដ្ឋាន។
ចំណែកមន្ត្រីប៉ូលិសនាយកដ្ឋានសេដ្ឋកិច្ចក៏បានធ្វើការរិះគន់ផងដែរ ចំពោះការចេញបេសកកម្ម(P) ឲ្យមន្ត្រីប៉ូលិសសេដ្ឋកិច្ចដែលគេឃើញថា មន្ត្រីប៉ូលិសដដែលៗ ដែលទទួលបានP ជាបន្តបន្ទាប់។ ចំណែកមន្ត្រីប៉ូលិសសេដ្ឋកិច្ចផ្សេងទៀតរកការងារធ្វើមិនបាន ហើយដើរទាត់ខ្យល់ពេញមួយឆ្នាំៗ។ យ៉ាងណាក៏ដោយមន្ត្រីទាំងនោះបានចោទប្រកាន់ផងដែរថា ការចេញP ម្តងៗគឺត្រូវចំណាយលុយរាប់ម៉ឺនដុល្លារឯណ្ណោះ រហូតមានការដេញថ្លៃថែមទៀត។ ករណីនោះគឺកើតមានច្រំដែលៗយូរឆ្នាំមកហើយ ហើយពុំមានការកែទម្រង់នោះទេ បើទោះជារាជរដ្ឋាភិបាលកំពុងប្រកាសអំពីកំណែទម្រង់ស៊ីជម្រៅក៏ដោយ។
ក្រុមមន្ត្រីខាងលើបានចោទប្រកាន់ថ្នាក់ដឹកនាំនាយកដ្ឋានប៉ូលិស សេដ្ឋកិច្ចកំពុងងុបងល់នឹងការដេញថ្លៃលក់P ដែលជាប្រពៃណីអាក្រក់ដែលបង្ហាញនូវភាពមិនប្រក្រតីនៃការដឹកនាំ ឬអាចនិយាយថា ជាអំពើពុករលួយដុះស្លែក្នុងនាយកដ្ឋានដែលមិនអាចកែប្រែបាន។ ប៉ុន្តែអ្វីដែលមជ្ឈដ្ឋានទូទៅបានដឹងគ្រប់ៗគ្នានោះ គឺនាយកដ្ឋានសេដ្ឋកិច្ច គឺជាមជ្ឈមណ្ឌលដែលរងនូវការរិះគន់ខ្លាំងជាងគេទាក់ទងនឹងអំពើពុករលួយ ។
ពាក់ព័ន្ធការលើកឡើងខាងលើនេះ សារព័ត៌មានយើង មិនទាន់អាចទំនាក់ទំនងលោកផ្កាយ២ ស៊ូ ម៉ារ៉ាឌី និងលោកវរសេនីយ៍ត្រី ជួប វណ្ណឌី ដើម្បីបញ្ជាក់នៅឡើយ ដោយសារទូរស័ព្ទមិនអាចទាំនក់ទំនងបាន ៕
