ព្រៃវែង ៖ កម្មវិធីសម្ភោធ ឧបដ្ឋានសាលានេះ បានប្រារព្វធ្វើឡើងកាលពីថ្ងៃទី ២៥ មករា ឆ្នាំ ២០១៦ វេលាម៉ោង ០៨ ព្រឹក នៅភូមិស្វាយអន្ទរ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង ក្រោមអធិបតិភាពដ៏ខ្ពងខ្ពស់សម្ដេចក្រឡាហោម ស ខេង និងឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងមានមន្ត្រីថ្នាក់ជាតិ និងថ្នាក់ក្រោមជាតិ ព្រមទាំងលោកយាយ លោកតា សិស្សានុសិស្សប្រជាពលរដ្ឋចូលរួមក្នុងកម្មវិធីយ៉ាងច្រើនកុះករ ។
បន្ទាប់ពីលោកអភិបាលនៃគណអភិបាលស្រុក ឌុច សុគន្ធា បានឡើងថ្លែងសុន្ទរកថា ក្នុងការបូកសរុបសមិទ្ធផលនានាដែលសម្រេចក្នុងឆ្នាំចាស់ផ្លាស់ចូលឆ្នាំថ្មី ត្រូវបានបញ្ចប់ សម្ដេចក្រឡាហោម ក៏បានផ្ដាំផ្ញើបងប្អូនប្រជាពលរដ្ឋស្ដីអំពីប័ណ្ណបើកបរ និងអំពីបញ្ហាគ្រោះថ្នាក់ចរាចណ៍ ដែលកំពុងតែកើតមានឡើងសព្វថ្ងៃនេះ ។ នាឱកាសនោះផងដែរ សម្តេចក៏បានលើកឡើងអំពីផ្លូវគម្រោងស្ថាបនាផ្លូវពីរខ្សែ ដែលគ្រោងនឹងធ្វើក្នុងឆ្នាំ ២០១៦ និងសម្ភោធឲ្យប្រើប្រាស់ក្នុងឆ្នាំ ២០១៧ ផងដែរ ។ គម្រោងនេះ គឺស្ថិតនៅក្នុងស្រុកពាមជ័រ និងមួយខ្សែទៀត ស្ថិតនៅក្នុងស្រុកពោធិ៍រៀង ។
ក្នុងឱកាសនោះផងដែរ សម្ដេចក្រឡាហោម ស ខេង ក៏បានប្រគេនថវិកាផ្ទាល់របស់សម្ដេច ចំនួនម្ភៃប្រាំលានរៀល និងក្រុមការងាររបស់ឯកឧត្តម នេត សាវៀន ក៏បានចូលរួមឧបត្ថម្ភ ថវិកាចំនួនម្ភៃលានផងដែរ ប្រគេនជូនវត្តបទុម (ហៅវត្តស្វាយអន្ទរ) ដែលបានសាងសង់រួចជាស្ថាពរ សរុបថវិកា ១.៥៧១.០០០.០០០ លានរៀល និងប្រគេនព្រះក្នុងមួយអង្គ ចំនួន ២០.០០០រៀល ព្រមទាំងតាជីដូនជី ក្នុងម្នាក់ថវិកា ១០.០០០ រៀល រីឯលោកគ្រូ អ្នកគ្រូ ក៏ទទួលបានថវិកា ២០.០០០ ផងដែរ ៕
