ខេត្តសៀមរាប៖លោក សយ ទិត្យាវង្ស អនុប្រធានមន្ទីរ ត្រូវបានតែងតាំងមុខតំណែងទៅជាប្រធានមន្ទីរអប់រំយុវជន និងកីឡាខេត្តសៀមរាប ជំនួសលោក អ៊ុង សិរីឌី អតីតប្រធានមន្ទីរដែលបានចូលនិវត្តន៍ តាមសេចក្តីប្រកាសលេខ២៨១៥ អយក ប្រក ចុះថ្ងៃទី២១ ខែ ធ្នូ ឆ្នាំ២០១៥ របស់ក្រសួងអប់រំយុវជន និងកីឡា ។
ពិធីនេះបានប្រព្រឹត្តទៅ ក្រោមអធិបតីភាពរបស់ឯ.ឧបណ្ឌិត ហង់ ជួនណារ៉ុង រដ្ឋមន្ត្រីក្រសួងអប់រំយុវជន និង កីឡា ឯ.ឧបណ្ឌិត ឃឹម ប៊ុន សុង អភិបាលនៃ គណៈអភិបាលខេត្ត ឯ.ឧ នូ ផល្លា ប្រធានក្រុមប្រឹក្សាខេត្ត ដោយមានការចូលរួមពីសំណាក់ឯកឧត្តម លោកជំទាវ អស់លោក លោកស្រីជាថ្នាក់នាយកដ្ឋាន ថ្នាក់ដឹកនាំមន្ទីរ ក្រុង ស្រុក នៅរដ្ឋបាលសាលាខេត្តសៀមរាប កាលពីព្រឹកថ្ងៃទី២១ ខែ មករា ឆ្នាំ២០១៦ ។
មានប្រសាសន៍នោះឯ.ឧបណ្ឌិត ឃឹម ប៊ុនសុង ក៏បានលើកឡើង អំពីស្នាដៃ សមទ្ធិផលដែលមន្ទីរអប់រំយុវជន និង កីឡាខេត្តទទួលបាននាពេលកន្លងមក លើការបណ្តុះបណ្តាលនូវធនធានមនុស្ស ។
ឯកឧត្តមបណ្ឌិត ក៏បានបញ្ជាក់ថា សមទ្ធិផលដែលបានកើតឡើងមកនេះ ក៏ដោយកត្តាសំខាន់ៗ៤យ៉ាង រួមមាន កត្តាសន្តិសុខ , ច្បាប់ និង ក្របខ័ណ្ឌគោលនយោបាយ , កត្តាសម្បត្តិវប្បធម៌ និង កត្តាអភិវឌ្ឍន៍ខេត្ត ។ កត្តាទាំងនេះខេត្តបានធ្វើ ការសម្របសម្រួល កិច្ចសហការ និង ជម្រុញការអនុវត្តពីផ្នែកពាក់ព័ន្ធទាំងអស់ ដើម្បីភាពរីកចម្រើនលើគ្រប់វិស័យ ប្រកបដោយនិរន្តរភាព ។ ក្នុងនោះដែរឯ.ឧបណ្ឌិត ឃឹម ប៊ុនសុង ក៏បានផ្តល់នូវអនុសាសន៍មួយចំនួន ដើម្បីជា ប្រទីបសម្រាប់លោកប្រធានមន្ទីរដែលទើបចូលកាន់មុខតំណែងថ្មី ដើម្បីអនុវត្តនូវតួនាទី ភារកិច្ចរបស់ខ្លួន ក្នុងការដឹកនាំមន្ត្រីក្រោមឱវាទរបស់ខ្លួនឲ្យទទួលបានលទ្ធផលល្អ ។
មានប្រសាសន៍នោះ ឯ.ឧ បណ្ឌិត ហង់ ជួនណារ៉ុង បានគូសបញ្ជាក់ថា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការអនុវត្តយុទ្ធសាស្ត្រចតុកោណ ដំណាក់កាលទី៣ បានកំពុងយកចិត្តទុកដាក់ខ្ពស់លើវិស័យអប់រំ ដែលជាវិស័យអទិភាព ក្នុងយុទ្ធសាស្ត្រ ចតុកោណ ក្នុងការបណ្តុះបណ្តាលនូវធនធាន មនុស្ស ដែលជាគ្រឹះដ៏រឹងមាំនៅក្នុងសង្គមជាតិ ក្នុងកិច្ចអភិវឌ្ឍន៍ប្រទេសឲ្យមានការរីកចម្រើន ។ ម្យ៉ាងទៀត វិស័យអប់រំជាវិស័យមានសារៈសំខាន់ ក្នុងគោលនយោបាយយុទ្ធសាស្ត្ររបស់ រាជរដ្ឋាភិបាលក្នុងការអភិវឌ្ឍន៍ឲ្យមានប្រសិទ្ធិភាព ។
ឯកឧត្តមបណ្ឌិត ក៏បានកោតសរសើរផងដែរ អំពី លទ្ធផលនៃសមទ្ធិផលដែលមន្ទីរអប់រំយុវជន និង កីឡាខេត្តទទួលបានក្នុងពេលកន្លងមក របស់លោកប្រធានមន្ទីរ ចាស់ដែលបានចូលនិវត្តន៍ ទៅតាមការបញ្ចប់នូវរបបការងារនៃមន្ត្រីរាជការស៊ីវិល ដែលរដ្ឋធម្មនុញ្ញបានកំណត់ ហើយការប្រកាសតែងតាំងថ្នាក់ដឹកនាំនេះ គឺជាប្រពៃណីរបស់មន្ត្រីរាជការផងដែរ។
ក្នុងនោះដែរ ឯកឧត្តមបណ្ឌិត ហង់ ជួនណារ៉ុង ក៏បានលើកនូវគោលការសំខាន់ៗរបស់ក្រសួង ក្នុងការពង្រីកពង្រឹងវិស័យអប់រំឲ្យកាន់តែមានទាំង គុណភាព និង បរិមាណ ព្រមទាំងបានលើកឡើងពីការធ្វើកំណែទម្រង់ នៃកម្មវិធីសាស្ត្របង្រៀន នៅតាមកម្រិតសិក្សា ក្នុងគោលដៅធ្វើសមាហរណកម្មនៅតំបន់អាស៊ាន ។ ឯកឧត្តមបណ្ឌិត ក៏បានលើកនូវសរសរស្តម្ភដ៏ សំខាន់ៗ ក្នុងការសំដៅធ្វើអធិការកិច្ចនៅតាមកម្រិតសិក្សា សំដៅទៅលើការដឹកនាំ របស់នាយកសាលា និង ការ បង្រៀនរបស់លោកគ្រូអ្នកគ្រូ សាស្ត្រាចារ្យ ក្នុងការកសាងបណ្តុះបណ្តាលនូវសមត្ថភាពរបស់គ្រូផងដែរ ។ ម្យ៉ាង ទៀតត្រូវធ្វើការពង្រឹង ពង្រីកទៅលើការធ្វើអំណាន និង ការសរសេរទៅលើគ្រប់មុខវិជ្ជា ព្រមទាំងពង្រឹងនូវគុណភាពសិក្សា អំពីប្រវត្តិសាស្ត្ររបស់កម្ពុជា ក្នុងការបង្កើនចំណេះដល់កូនខ្មែរយល់ដឹងពីប្រវត្តិសាស្ត្រជាតិ ខ្លួន សំខាន់ លើអក្សរសាស្ត្រជាតិ ។
ឯកឧតមក៏បានធ្វើការផ្តាំផ្ញើដល់លោកប្រធានមន្ទីរថ្មី គឺគោរពឲ្យបាននូវបទបញ្ញា លិខិតបទ ដ្ឋាន ដោយតម្កល់ផលប្រយោជន៍ជាតិជាធំ និង អនុវត្តឲ្យបាននូវគោលនយោបាយ កម្មវិធីជាតិ ផែនការយុទ្ធសាស្ត្រ និង មានទំនាក់ទំនង សហការល្អជាមួយបណ្តាមន្ទីរ អង្គភាព ក្រុង ស្រុក និង ត្រូវរក្សាឲ្យបាននូវសេចក្តីថ្លៃថ្នូរ ក្រម សីលធម៌វិជ្ជាជីវៈ ក្នុងការបម្រើសេវាសាធារណៈដ៏មានប្រសិទ្ធភាពខ្ពស់ និង លើកកម្ពស់សមត្ថភាពធនធានមនុស្សជូនមន្ត្រីរាជការ ដើម្បីធានាបាននូវប្រសិទ្ធិភាពការងារ ។ ចូលរួមអនុវត្តកម្មវិធីកំណែទម្រង់ស៊ីជំរៅលើគ្រប់វិស័យរបស់ រាជរដ្ឋាភិបាល ពុះពារការលំបាកដោះស្រាយការប្រឈមដោយឈរលើស្មារតី រួមចំណែកអនុវត្តផែនការសកម្មភាព និងទិសដៅរបស់ក្រសួង និង អាជ្ញាធរខេត្តឲ្យទទួលបានលទ្ធផលល្អផងដែរ៕
ដោយ (លុច ណាម)
