បើកុំតែមានបទបញ្ជារបស់ប្រមុខរាជរដ្ឋាភិបាល ឲ្យទប់ស្ទាត់ការរត់ពន្ឋឈើខុសច្បាប់ នឹងការកាប់បំផ្លាញឈើនៅតំបន់ភូមិភាគឦសាន ម្ល៉េះគ្មាននរណាដឹងថា រាល់ក្រុមហ៊ុនដែលចូលមកវិនិយោគនៅក្នុងខេត្តមណ្ឌលគិរី លើវិស័យកសិឧស្សាហកម្ម កំពុងធ្វើព្យុះធ្វើភ្លៀងស្រាច់នឹងចិត្ត ព្រោះក្រៅពីការប្រមូលឈើក្នុងដែនដីរបស់ក្រុមហ៊ុន (រាល់ដីសម្បទានសេដ្ឋកិច្ច គឺសុទ្ឋសឹងដីព្រៃរិចរឹល ដែលតំរ៉ូវឲ្យក្រុមហ៊ុនធ្វើការអភិវឌ្ឍន៏ នឹងស្តារធនធានធម្មជាតិឡើងវិញ ក្នុងលក្ខខណ្ឌមិនប៉ះពាល់ដល់ជីវចម្រុះ នឹងប្រជាជនក្នុងតំបន់) ដែលទទួលសិទ្ឋិស្របច្បាប់ពីរាជរដ្ឋាភិបាល ថៅកែក្រុមហ៊ុនទាំងនោះ មានខ្លះជាជនជាតិបរទេសនឹងជនជាតិខ្មែរ បានធ្វើការប្រមូលទិញឈើឬដាក់កម្លាំងឲ្យចូលទៅកាប់ឈើ នៅក្នុងតំបន់ហាមឃាត់នឹងតំបន់អភិរក្ស បង្ករឲ្យព្រៃឈើទាំងនោះរងនូវភាពវិនាស ស្ទើរគ្មានសល់។
សេចក្តីរាយការណ៍និយាយថា ក្រុមហ៊ុនជាច្រើនដែលកន្លងមក មានសកម្មភាពប្រមូលទិញឈើក្នុងតំបន់ការពារសត្វព្រៃភ្នំព្រេច(គ្រប់គ្រងដោយក្រសួងបរិស្ថាន) នឹងតំបន់អភិរក្សជីវចម្រុះសីមា (គ្រប់គ្រងដោយក្រសួងកសិកម្ម)រួមមាន ក្រុមហ៊ុនកសិកម្មខ្មែរអង្គរ ក្រុមហ៊ុនប៊ិញភ្វឿក ក្រុមហ៊ុនដាយថាន់ ក្រុមហ៊ុនដាយណាម ក្រុមហ៊ុនម៉ាស់ស្ទើខេសាន់ ក្រុមហ៊ុនប៉ាស៊ីភិច…សុទ្ឋតែមានរបៀបប្រមូលឈើដូចគ្នា គឺគេបានឲ្យប្រជាពលរដ្ឋនឹងក្រុមឈ្មួញដែលមានឥទ្ឋិពល ចូលកាប់ឈើល្អៗចេញពីព្រៃការពារ រួចដឹកមកទម្លាក់នៅក្នុង ដីក្រុមហ៊ុន បន្លំជាឈើមានច្បាប់នឹងជាឈើដែលកាប់ក្នុងដីក្រុមហ៊ុនស្របច្បាប់ ។
ប្រភពព័ត៌មានបន្តថា ក្បាច់គុណមួយនេះត្រូវបាន ថៅកែក្រុមហ៊ុនដែលម៉ៅការប្រមូលឈើក្នុងដីសម្បទានសេដ្ឋកិច្ច ប្រើអស់រាប់ឆ្នាំមកហើយ នឹងបាននាំឈើរាប់ម៉ឺនម៉ែត្រគូបទៅលក់ឲ្យឈ្មួញយួន តាមព្រំដែនខេត្តត្បូងឃ្មុំរហូតក្លាយទៅជារឿងសាមញ្ញសម្រាប់ អ្នករស់នៅខេត្តតំបន់ភូមិភាគឦសានបាត់ទៅហើយ។
គេនៅចាំបានថា រាល់ពេលមន្ត្រីថ្នាក់ជាតិនឹងថ្នាក់ខេត្តចុះធ្វើវេទីការសាធារណៈម្តងៗ ប្រជាពលរដ្ឋតែងចោតសួរទៅមន្ត្រីជំនាញរដ្ឋបាលព្រៃឈើថា តើគ្រប់ការដឹកជញ្ជូននឹងសកម្មភាពកាប់ឈើក្នុងតំបន់ហាមឃាត់ពីសំណាក់ក្រុមហ៊ុនវិនិយោគទាំងនោះមានច្បាប់ឬយ៉ាងណា? ព្រោះការកាប់ឈើទាំងនោះភាគច្រើនគេឃើញ កាប់តែក្នុងព្រៃស្តុក ព្រៃការពារសម្រាប់សត្វព្រៃ ទោះបីឈើក្រុមដីក្រុមហ៊ុន ស្ទើររកឈើល្អមួយដើមគ្មាននោះ។ការចោតជាសំនួររបស់ប្រជាពលរដ្ឋ តែងត្រូវបានមន្ត្រីជំនាញព្រៃឈើនៅខេត្តមណ្ឌលគិរី បកស្រាយថា មានច្បាប់ទម្លាប់ត្រឹមត្រូវ។បើមានច្បាប់ ចុះមិចពេលនេះ ឈើទាំងអស់នោះបែរជាគ្មានច្បាប់ នឹងត្រូវគណៈកម្មការជាតិបង្ក្រាបបទល្មើសព្រៃឈើ ចាប់បង្ក្រាបអស់រាប់ពាន់ម៉ឺនកំណាត់ទៅវិញ ខ្លះថែមទាំងដុតចោលទៀត ពិតជាគួរឲ្យឆ្ងល់ខ្លាំងណាស់។
ជាក់ស្តែង កាលពីសម័យលោក រឿង សុផាត ជានាយផ្នែករដ្ឋបាលព្រៃឈើកែវសីមា (ទើបផ្លាស់ប្តូរតំណែងទៅជានាយរងខណ្ឌរដ្ឋបាលព្រៃឈើនៃខេត្តមួយផ្សេងទៀតនាពេលថ្មីៗនេះ) នៅពេលអ្នកយកព័ត៌មានជជីកសួររឿង ក្រុមហ៊ុនប៊ិញភ្វឿក នាំឈើគេចពន្ឋចេញទៅក្រៅប្រទេសជិត៥ឆ្នាំកន្លងមកនេះ លោកតែងឆ្លើយថា ឈើទាំងនោះមាន P C (ច្បាប់អនុញ្ញាត) ។ ប្រហែលពិតដូចលោកនិយាយមែន គឺមានច្បាប់ត្រឹមមាត់លោកប៉ុណ្ណោះ ព្រោះកាលពីព្រឹកថ្ងៃទី២១ ធ្នូ ២០១៦ មន្ត្រីជំនាញព្រៃឈើប្រចាំខេត្តមណ្ឌលគិរី បានចុះត្រួតពិនិត្យនឹងធ្វើការបង្ក្រាបឈើហុបរាប់រយម៉ែត្រគូប ដែលត្រូវគេដុតបំផ្លាញចោលនៅក្នុងក្រុមហ៊ុនប៊ិញភ្វឿក ដែលលោក រឿង សុផាត តែងពោលថាមានច្បាប់។
ចំណែកលោក សំរ៉ង ឌីវិចិត្រ នាយកដែនជម្រកការពារសត្វព្រៃភ្នំព្រេច ដែលកន្លងមកក៏ធ្លាប់អះអាងមិនដាច់ពីមាត់បានប្រាក់កោះសន្តិភាពថា គ្រប់ឈើដែលនាំចេញពី ក្រុមហ៊ុនកសិកម្មខ្មែរអង្គរ ក្រុមហ៊ុនដាយណាម ក្រុមហ៊ុនម៉ាសស្ទើខេសាន់ សុទ្ឋតែមានច្បាប់អនុញ្ញាត ពីរដ្ឋបាលព្រៃឈើ តែពេលនេះបែរជាត្រូវគណៈកម្មការជាតិបង្ក្រាបបទល្មើសព្រៃឈើ រកឃើញថា ភាគច្រើនគឺគ្មានច្បាប់ទៅវិញ។ទាក់ទិនទៅនឹងករណីនេះឆន្ទៈខ្មែរបានព្យាយាមសុំការបំភ្លឺជាច្រើនដងពី លោកនាយកដែនជម្រកតាមរយៈទូរសព្ទ តែតេចូលហើយគ្មានអ្នកឆ្លើយតប។
គ្រាន់តែក្នុងប៉ុន្មានករណីនេះ សបញ្ជាក់ឲ្យឃើញថា ការរត់ពន្ឋឈើក្នុងខេត្តមណ្ឌលគិរី គឺមានភាពជាប្រព័ន្ឋ ព្រោះគ្រប់ជំនាញទាំងអស់សុទ្ឋតែដឹងថា ឈើដែលក្រុមលោកឧកញ៉ាកំពុងរកស៊ីកន្លងមកនោះ គឺគ្មានច្បាប់ តែអស់លោកជាមន្ត្រីជំនាញបែរជាខិតខំជួយសម្រួលដល់ការរត់ពន្ឋឈើទាំងនោះ បានយ៉ាងរលូនដោយគ្មានការរំខានបន្តិចសោះ លុះត្រាមានបទបញ្ជាដាច់ខាតពីប្រមុខរាជរដ្ឋាភិបាលកម្ពុជាឲ្យបង្ក្រាបឈើខុសច្បាប់ ទើបអស់លោកមន្ត្រីដែលនៅមើលការខុសត្រូវក្នុងមូលដ្ឋាន កំរើកសសៃយ៉ាងចម្លែក រត់ទៅចាប់ឯលិចផង ឯកើតផង នៅតែចាប់មិនឈ្នះ ត្បិតឈើមួយចំនួនធំត្រូវបានគេដុតបំផ្លាញ នឹងយកទៅកប់ក្នុងដីដែលមិនអាចរកឃើញសូម្បីមួយដុំ។
ប្រតិបត្តិការបង្ក្រាបឈើនៅទូទាំងខេត្តមណ្ឌលគិរីនាពេលប៉ុន្មានថ្ងៃកន្លងមក ត្រូវគេមើលឃើញថា មន្ត្រីជំនាញបានចាប់ឃាត់ឈើល្មើសច្បាប់បានចំនួនរាប់ពាន់កំណាត់រួចមកហើយ នឹងកំពុងធ្វើប្រតិបត្តិការបន្តថា ។តែទោះជាយ៉ាងណារហូតមកដល់រសៀលថ្ងៃទី២១ មករា ២០១៦ កោះសន្តិភាពនៅមិនទាន់ទទួលរបាយការណ៏លំអិត ពីរដ្ឋបាលព្រៃឈើមណ្ឌលគិរីពីចំនួនក្រុមហ៊ុននឹងចំនួនឈើដែលបានបង្ក្រាបនៅឡើយទេ ព្រោះហាក់ដូចជាមានការលាក់លៀមពីមន្ត្រីជំនាញ។
បទល្មើសព្រៃឈើនៅខេត្តមណ្ឌលគិរីមិនត្រឹមតែមាននៅតាមបណ្តក្រុមហ៊ុនដែលមានដីសម្បទានទេ សូម្បីនៅតាមខ្សែបន្ទាត់ព្រំដែនដែលមានប្រវែងប្រមាណជាង២០០គីឡូម៉ែត្រ ក៏សម្បូរសកម្មភាពនាំឈើចេញទៅក្រៅប្រទេសផងដែរ ក្នុងនោះច្រករបៀងមួយចំនួនដែលមានសកម្មភាពដឹកជញ្ជូនឈើចេញក្នុងស្រុកកែវសីមាមាន ច្រកបាឡាង ច្រកឡាប៉ាខេ ច្រកង៉ាំដី ច្រកង៉ាំបាវ៉េ ច្រកង៉ាំយូលិត ស្រុកអូររាំងមាន ច្រកទួលស្វាយ ច្រកដាក់ដាំ ច្រកឡាំប៉ឹក ស្រុកពេជ្រាដាមាន ប៉ុស្តិ៍៧ ច្រកអូរតាំកន ប៉ុស្តិ៍៦ ប៉ុស្តិ៍៥ ប៉ុស្តិ៍៤ ចំណែកនៅស្រុកកោះញែកមាន ច្រកអូររូ ច្រក ម្រើច នឹងប៉ុស្តិ៍៣ ជាដើម ។ ភាពអំណោយផ្តល់ដល់ល្អបំផុតចំពោះក្រុមឈ្មួញដែលនាំឈើទៅប្រទេសវៀតណាម ដោយសារតែគ្រប់បណ្តាលច្រករបៀងក្នុងស្រុកអូររាំង ស្រុកពេជ្រាដា នឹងស្រុកកោះញែក គឺស្ថិតនៅតំបន់ការពារសត្វព្រៃណាំលៀ(គ្រប់គ្រងដោយ ក្រសួងបរិស្ថាន) នឹងតំបន់ព្រៃការពារមណ្ឌលគិរី(គ្រប់គ្រងដោយរដ្ឋបាលព្រៃឈើ) ចំណែកច្រករបៀងទាំងអស់នៅស្រុកកែវសីមា មានតំបន់អភិរក្សជីវចម្រុះសីមា ជាកន្លែងសម្បូរឈើប្រណិតៗសម្រាប់នាំចេញទៅប្រទេសវៀតណាម។
សេចក្តីរាយការណ៍ដោយឡែកមួយពីស្រុកលំផាត់បានឲ្យដឹងថា ក្នុងក្រុមហ៊ុនមួយដែលមានព្រំប្រទល់ជាប់គ្នារវាងខេត្តរតនគិរីនិងមណ្ឌលគិរី បន្ទាប់ពីមានការបង្ក្រាបទីតាំងក្រុមហ៊ុនដែលកាប់ឈើខុសច្បាប់ តាមបណ្តាខេត្តមួយចំនួនរួចមកមានក្រុមហ៊ុនខ្លះក៏បានយកគ្រឿងចក្រកាយរណ្តៅ កប់ឈើអត់ច្បាប់ដែលកាប់ចេញពីតំបន់ជំរកសត្វព្រៃលំផាត់ ដោយមានការឃុបឃិតពីមន្ត្រីបរិស្ថាននិងរដ្ឋបាលព្រៃឈើផងដែរ។
ប្រភពនោះបានបង្ហើបថា ក្រុមហ៊ុន(ដូនពេញអាគ្រីកូ)ដែលមានទីតាំងជាប់ទន្លេស្រែពក ស្ថិតក្នុងឃុំជ័យឧត្តម ស្រុកលំផាត់ដែលមានគំនរឈើជាច្រើន ដែលនៅសេសសល់ហើយមួយចំនួន គឺឈើគ្មានច្បាប់ ត្រូវគេកាយរណ្តៅកប់ក្នុងដីអស់ទៅហើយដែរ។ឯមួយចំនួនទៀតលាក់ទុកក្នុងចំការដូងប្រេង ទាក់ទិននិងប្រភពខាងលើមិនអាចសុំការបំភ្លឺពី តំណាងក្រុមហ៊ុនបានទេនៅរសៀលថ្ងៃទី២១ នេះ។ ចំណែកលោកកែប កត់ នាយខណ្ឌរដ្ឋបាលព្រៃឈើរតនគិរី ឆន្ទៈខ្មែរបានសុំការបំភ្លឺតាមរយៈទូរសព្ទ តែគ្មានអ្នកឆ្លើយតបទេ នៅរសៀលថ្ងៃទី២១ មករា ២០១៦ ៕
