ខេត្តមណ្ឌលគិរី ៖ រមណីដ្ឋានភ្នំដោះក្រមុំ ក្នុងរយៈពេលដែលឈានចូលឆ្នាំថ្មីឆ្នាំ2016នេះ មានភ្ញៀវទេសចរណ៌ជាតិ និងអន្តរជាតិ មកលេងកំសាន្តនៅរមណីដ្ឋានភ្នំដោះក្រមុំជាច្រើនគួរឲ្យកត់សម្គាល់ ព្រោះរមណីដ្ឋានភ្នំដោះក្រមុំជាកន្លែងសម្បូរទៅដោយសម្រស់ធម្មជាតិដ៍ស្រស់បំព្រង និងជាទីកន្លែង សក្ការៈបូជាដ៍ល្បីល្បាយ ដែលមានទីតាំងស្ថិតនៅកណ្ដាលក្រុងសែនមនោរម្យ ក្នុងភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី មានចម្ងាយ៣គីឡូម៉ែត្រពរង្វង់មូលគោព្រៃ។ ភ្នំដោះក្រមុំជាទីតំបន់ទេសចរណ៍ដ៍ស្រស់ត្រកាលសម្រាប់ភ្ញៀវចូលទស្សនាដែលមានទំហំដីជាង១០០ហិចតា ។
ភ្នំដោះក្រមុំត្រូវបានអ្នកស្រុកចាត់ទុកជាទីកន្លែងដ៍ ស័ក្កសិដ្ឋ គោរពទៅតាមជំនឿរបស់ពួកគេក្នុងការបន់ស្រន់សុំសេចក្ដីសុខសប្បាយ រួចផុតពីគ្រោះចង្រៃ នឹងសុំឲ្យសម្រេចនូវគោលបំណងការងារផ្សេងៗទៅតាមជំនឿរៀងៗខ្លួនរបស់ពួកគេ។ មិនត្រឹមប៉ុណ្ដោះទេ នៅពេលមានកម្មពិធីបុណ្យជាតិម្ដងៗអ្នកស្រុកតែងតែរៀបចំទីកន្លែងនោះយ៉ាងពិសេស។ អ្នកទេសចរណ៍ដែលបានឡើងទៅលេងលើភ្នំដោះក្រមុំតែងមានការអុជធូបបន់ស្រន់សុំសេចក្តីសុខសប្បាយ សុំអ្វីទៅតាមការប្រថ្នារបស់ពួកគេ។
អ្នកទេសចរណ៍ដែលបានឡើងទៅដល់កំពូលភ្នំដោះក្រមុំហើយមិនរំលងនូវការមើលឃើញនៃទេសភាព ដ៍ស្រស់ស្អាតពីលើភ្នំដែលអាចមើលឃើញនូវទិដ្ឋភាពនៅជុំវិញនៃទីរួមខេត្តមណ្ឌលគិរីជាក់ជាមិនខាន។ ភ្ញៀវទេសចរណ៍ដែលបានទៅលេងទីនោះហើយនឹងមានការថតរូបទុកជាអនុស្សាវរីសម្រាប់បង្អូតដល់បងប្អូនពីសម្រស់ព្រៃភ្នំក្នុងខេត្តភូមិភាគឥសាន ដែលសម្បូរទៅដោយព្រៃឈើសម្រស់ធម្មជាតិ។
ប្រសិនបើភ្ញៀវទេសចរណ៍ចង់ធ្វើដំណើរទៅកាន់ភ្នំដោះក្រមុំនោះគឺគ្រាន់តែចំនាយពេលប្រមាណ៥នាទីចេញពីក្រុងសែនមនោរម្យទៅនោះយើងនឹងបានឃើញខ្លោងទ្វាច្រកចូលទៅកាន់ កំពូលភ្នំជាក់ជាពុំខាន ដោយក្នុងនោះមានការដាក់ឈ្មោះថា មជ្ឈមណ្ឌលវប្បធម៌ជនជាតិ។
ប្រសិនបើភ្ញៀវទេសចរណ៍ចង់ឡើងទៅដល់កំពូលភ្នំនោះដើម្បីគយគន់មើលទេសភាពពីលើភ្នំជាពិសេសមើលទេសភាពជុំវិញក្រុងសែនមនោរម្យទាំងមូលនោះ មិនមានការពិបាកឡើយដោយសារមានការអភិវឌ្ឍន៍ផ្លូវកៅស៊ូ សម្រាប់រថយន្ដ ម៉ូតូ ឡើងទៅដល់កំពូលភ្នំតែម្ដង។ ប៉ុន្ដែសម្រាប់អ្នកទេសចរណ៍ណាដែលមិនចង់យករថយន្ដ ម៉ូតូឡើងទៅក៍អាចដាក់ផ្ញើរនៅតាមជើងភ្នំបានដែរ រួចអាចបន្ដធ្វើដំណើរឡើងទៅតាមកាំជណ្ដើរដែលមានប្រវែងប្រមាណជាង១០០ម៉ែត្រប៉ុណ្ដោះ។ ភ្ញៀវទេសចរណ៍ដែលបានឡើងទៅដល់កំពូលភ្នំហើយអ្នកខ្លះក៍បានរៀបចំអុជធូបកន្លែងសក្ការៈបូជាបន់ស្រន់ដើម្បីសុំសេចក្ដីសុខសប្បាយ សម្រេចប៉ងប្រថ្នារៀងខ្លួន មានអ្នកខ្លះចាប់យកកាមេរាសម្រាប់ថតរូបទុកជាអនុស្សាវរីយ៍។
រមណីដ្ឋានភ្នំដោះក្រមុំជាកន្លែងសម្រស់ធម្មជាតិអាចទាក់ទាញដល់ភ្ញៀវទេសចរណ៍ចូលទស្សនាជាច្រើនទាំងភ្ញៀវជាតិនិងអន្ដរជាតិ អ្នកទេសចរណ៍ដែលបានមកលេងកម្សាន្ដហើយនោះពិតជាមានអារម្មណ៍ស្រស់ថ្លាបំបាត់នូវទុកកង្វល់ទាំងឡាយ និងមិនអាចបំភ្លេចទីកន្លែងនេះបានទេ៕
គឹម ចំរើន
