មណ្ឌលគីរី ៖ ច្រករបៀងការពារព្រំដែនជាច្រើនកន្លែងនៅក្នុងស្រុកកែវសីមា ខេត្តមណ្ឌលគិរី ជាប់ជាមួយព្រំដែនរបស់ប្រទេសវៀតណាមកំពុងត្រូវបានគេមើលឃើញថា មានការដឹកជញ្ជូនឈើប្រណិតខុសច្បាប់យ៉ាងគគ្រឹកគគ្រេងដោយមានការបើកភ្លើងខៀវពីមន្ដ្រីយោធាខិលខូចមូយចំនួនក្នុងកងអនុសេនាតូចលេខ១ និងកងអនុសេនាធំលេខ២ រួមជាមួយលោកប៊ូ សំអុល មេប៉ុស្តិ៍ឡាប៉ាខេ ជាអ្នកបើកដៃរួមទាំងច្រករបៀងផ្សេងៗ ក្នុងនោះក៍មានមន្ដ្រីប៉ូលីសខិលខូចមួយមួយចំនួនដែលនៅតាមច្រកទាំងនោះរួមដៃគ្នាទើបបានជាមានបទល្មើសខុសច្បាប់ទាំងនេះចេញបានយ៉ាងរលូនបែបនេះ។
តាមសេចក្កីរាយការណ៍បានឲ្យដឹងថា បើទោះបីជាមានការហាមប្រាមនិងរិតបណ្ដឹងយ៉ាងក្ដៅគគុករបស់អាជ្ញាធរខេត្ត និងជំនាញពាក់ព័ទ្ធនៅខេត្តមណ្ឌលគិរីស្ដីពីបទល្មើសព្រៃឈើ។ ប៉ុន្ដែផ្ទុយទៅវិញនៅស្រុកកែវសីមានៅច្រករបៀងការពារព្រំដែនចំនួន២កំពុងលេចផ្លោជាងគេក្នុងការដឹកជញ្ជូនឈើប្រណិតខុសច្បាប់ទាំងយប់ ទាំងថ្ងៃ ហាក់ដូចជាគ្មានការខ្លាចញញើតនិងច្បាប់បន្តិចសោះ។
ប្រភពបានបញ្ជាក់ឲ្យដឹងថា ក្នុងមួយថ្ងៃៗ (ទាំងយប់ទាំងថ្ងៃ) មានការដឹកេជញ្ជូនឈើតាមច្រករបៀងការពារព្រំដែនយកទៅលក់នៅនៅព្រំដែនប្រទេសវៀតណាមត្រង់ស្រុក ប៊ូដូប ខេត្តបីញភឿនតិចជាង១០ម៉ែត្រគូបនោះឡើយនៅក្នុងច្រកង៉ាដីនិងច្រកបាវ៉េ។ ដោយមានលោក ហឹម សុភ័ក្ដ មន្ដ្រីយោធាដែលមានអត្តលេខ២០១១៣៧ មានតួនាទីជាមេបញ្ជាការរងកងអនុសេនាលេខ១ កងអនុសេនាធំលេខ២ វរៈសេនាតូចលេខ១០៣ការពារព្រំដែន នៃតំបន់សឹងរងមណ្ឌលគិរី ជាអ្នកកាងនិងជាអ្នកប្រមូលកញ្ចប់។
ប្រជាពលរដ្ឋបាននាំគ្នាសំណូមពរដល់មេបញ្ជាការវរៈព្រំដែនយោធា១០៣ ក៍ដូចជាមេបញ្ជាការសឹងរងខេត្តផង ដើម្បីជៀសវាងការប៉ៈពាល់ដល់អង្គភាព ម្យ៉ាងទៀតក៍ដូចគ្នាដែរ ប្រជាពលរដ្ឋបានធ្វើការសំណូមពរដល់លោកមេបញ្ជាការរបស់ វរៈ៦២១ របស់ប៉ូលីសព្រំដែនឲ្យជួយមើលកូនចៅរបស់ខ្លួនផង ដើម្បីកុំឲ្យជៈឥទ្ធិពលអាក្រក់ៗដល់មេអង្គភាពរបស់ខ្លួនដែលគេមិនបានធ្វើ ៕
គឹម ចំរើន
