មណ្ឌលគិរី ៖ បុរសម្នាក់រងរបួសក្បាលយ៉ាងធ្ងន់ធ្ងរ ខណៈកំពុងធ្វើដំណើរតាមផ្លូវជាតិលេខ៧៦ ទៅកាន់ការ៉ាសសាំងមួយកន្លែង ក្នុងល្បឿនលឿនក៍រេចង្កូតម៉ូតូដួល ជាច្រើនត្រឡប់តែម្នាក់ឯង។
ករណីគ្រោះថ្នាក់ចរាចរណ៍ដែលជិះម៉ូតូដូលខ្លូនឯងនេះបានកើតឡើងនៅរសៀលថ្ងៃទី៤ មករា ២០១៦ ស្ថិតក្នុងភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។
សមត្ថកិច្ចនៅកន្លែងកើតហេតុបានឲ្យដឹងថា បុរសដែលរងគ្រោះថ្នាក់នេះមានឈ្មោះ ស្រ៊ី វល័ក្ខ អាយុ២២ឆ្នាំ រស់នៅក្នុងភូមិកណ្ដាល ក្រុងសែនមនោរម្យ មានមុខរបរជាកម្មករ មូលហេតុដែលកើតមានគ្រោះថ្នាក់នេះដោយសារតែជនរងគ្រោះបើកបរដោយមិនមានពាក់មួកសុវត្ថិភាព និងបើកក្នុងល្បឿនលឿនខ្វះការប្រុងប្រយ័ត្ន ហើយគ្រោះថ្នាក់នេះមិនបានធ្វើឲ្យប៉ៈពាល់ដល់អ្នកធ្វើដំណើរផ្សេងទេ ព្រោះជនរងគ្រោះបើកបរតែម្នាក់ឯងរងរបួសត្រង់ក្បាលយ៉ាងធ្ងន់ធ្ងរ ម៉ូតូជនរងគ្រោះមានម៉ាក ស៊ីរ៉ុស គ្មានផ្លាកលេខ គ្មានកញ្ចក់ និងគ្មានមួកសុវត្ថិភាព បច្ចុប្បន្នម៉ូតូជនរងគ្រោះត្រូវសមត្ថកិច្ចនាំយកទៅរក្សាទុកនៅប៉ុស្ដិ៍នគរបាលស្ពានមានជ័យ ចំណែកឯជនរងគ្រោះកំពុងសម្រាកព្យាបាលនៅមន្ទីរពេទ្យឯកជនក្នុងក្រុងសែនមនោរម្យ។
សមត្ថកិច្ចបានបន្ដថា គ្រោះថ្នាក់ដែលកើតឡើងភាគច្រើនបណ្ដាលមកពី កត្តាមនុស្ស មិនគោរពច្បាប់ចរាចរណ៍ បើកបរដោយគ្មានពាក់មួកសុវត្ថិភាព និងក្នុងស្ថានភាពស្រវឹង ដូច្នេះហើយសមត្ថកិច្ចបានសំណូមពរដល់ប្រជាពលរដ្ឋមេត្តាចូលរួមគោរពច្បាប់ចរាចរណ៍ទាំងអស់គ្នា ដើម្បីសុវត្ថិភាពតាមដងផ្លូវសាធារណៈ៕
ហេង ចាន់ ណុប
