មណ្ឌលគីរី ៖ ផ្លូវវៀងមួយខ្សែដែលមានប្រវែងប្រមាណជិតបីរយម៉ែត្រ ដែលមន្ទីរសាធារណការ នឹងដឹកជញ្ជូនខេត្តបានឈូសឆាយដើម្បីជួយសម្រួលក្នុងការធ្វើដំណើរទៅមករបស់បងប្អូនប្រជាពលរដ្ឋក្នុងស្រុកពេជ្រាដា និងដើម្បីភាពងាយស្រួលសម្រាប់ភ្ញៀវទេសចរណ៏ ខណៈស្ពានដែកមួយត្រូវបានបាក់ជាពីរកំណាត់ កាលពីពីរសប្តាហ៏មុន បានក្លាយទៅជាកន្លែងទាក់ទាញភ្លៀវទេសរណ៏ស្ទើរនឹងស្មានមិនដល់។
ព្រោះតែផ្លូវវៀងនោះមានអូរថ្មដាមួយឈ្មោះ អូរផ្លាយ ដែលអាចឲ្យរថយន្តធុនមធ្យមនឹងធុនតូច បើកបរឆ្លងទឹកបាន នឹងមានទេសភាពស្អាតប្លែកភ្នែក នឹងមានទឹកហូរត្រជាក់ដល់ឆ្អឹងខ្នង។
អ្នកទេសចរណ៏មួយក្រុមដែលបានមកលេងកម្សាន្តខេត្តមណ្ឌលគិរី ហើយទៅលេងទឹកជ្រោះប៊ូស្រា បាននិយាយថា ពួកគាត់មានបំណង ទៅលេងទឹកជ្រោះប៊ូស្រានឹងងូតទឹកលេងជាមួយគ្រួសារមិត្តភ័ក្ត តែនៅពេលបានមកដល់ចំនុចផ្លូវវៀងស្ពានបាក់ ស្រាប់តែជាប់ចិត្តនឹងទេសភាពរបស់អូរផ្លាយ ដែលមានទឹកថ្លារយង់ហូរលើថ្មដាទៅវិញ។
ក្រុមទេសចរណ៏ដដែលបន្តថា បន្ទាប់ពីពួកគាត់ឃើញអូរផ្លាយមានកន្លែងគួរឲ្យចង់ងូតទឹកលេងសប្បាយដូច្នេះមនុស្សក្នុងក្រុមទាំងអស់ដែលមានសមាជិកប្រមាណជាង២០នាក់ ក៏សម្រេចចិត្តថា ទៅលេងជ្រោះប៊ូស្រា ថតរូប នឹងហូបអាហារនៅទីនោះរួច នឹងបកមកងូតទឹកលេងនៅអូរផ្លាញវិញ ម្យ៉ាងទឹកជ្រោះប៊ូស្រាមានស្ថានភាព ថ្មរដិបរដុបខ្លាំងពិបាកងូតទឺកលេងផង។
មិនខុសពីក្រុមអ្នកទេសចរណ៏ខាងលើ ប្រជាពលរដ្ឋដែលធ្វើដំណើរឆ្លងកាត់ផ្លូវមួយខ្សែនេះ តែងនាំគ្នាចុះងូតទឹកលេងសិនមុននឹងបន្តដំណើរទៅមុខទៀត ហើយជាងនេះទៀត បងប្អូនអ្នករស់នៅខេត្តមណ្ឌលគិរី នៅពេលថ្ងៃសៅរ៏ឬថ្ងៃអាទិត្យ តែងនាំគ្រួសារនឹងមិត្តភ័ក្ត ទៅធ្វើអាហារបែបងាយៗ ហូបលេងនៅតាមមាត់អូរក្រោមម្លប់ឈើត្រជាក់ត្រឈឹង នឹងអាចហែលទឹកលេងដែលមានសីតុណ្ហភាពប្រមាណជា២០ទៅ២២អង្សាប៉ុណ្ណោះ។ហើយអ្នកទេសចរណ៏ខ្លះដែលចូលចិត្តនេសាទត្រី ក៏អាចយកសំណាញ់ឬសន្ទូចទៅស្ទូចត្រីយកមកអាំងហូបភ្លាមៗតាមបែបធម្មជាតិ យ៉ាងសប្បាយរីករាយ។
ក្រោយពីមានការចាប់អារម្មណ៏របស់ភ្លៀវទេសចណ៏លើកន្លែងលេងកម្សាន្តថ្មីនេះ គេមិនទាន់ឃើញមានសកម្មភាពរបស់មន្ទីរទេសចរណ៏ចុះធ្វើការរៀបចំ ឬអភិវឌ្ឍន៏អ្វីនៅឡើយ។បើតាមមគ្គុទេសទេសចរណ៏ម្នាក់បានឲ្យដឹងថា តំបន់អូរផ្លាយនេះ ស្ទើរតែមិនមានអ្នកស្គាល់ទេ ព្រោះកាលពីពេលស្ពានមិនទាន់បាក់ នៅតាមផ្លូវច្រកចូលអូរផ្លាយមានឃើញតែស្លាកសញ្ញាដាក់ថា អូរផ្លាយ តែសូម្បីផ្លូវធ្វើដំណើរប្រវែងប្រហែល១០០ម៉ែត្រសោះ ជិះម៉ូតូឬរថយន្តចូលមករួចឡើយ ហើយក៏គ្មានអ្នកទេសចរណ៏ចូលលេងទេ ។ តែថ្មីៗនេះ ដោយសារស្ពានឆ្លងទៅមកទឺកជ្រោះប៊ូស្រាបាក់មិនអាចធ្វើដំណើរកើត ទើបគេធ្វើវៀងកាត់តាមអូរផ្លាយ ទើបធ្វើឲ្យអ្នកទេសចរណ៏ជាច្រើនឈ្លក់វង្វេងនឹងសម្រល់ដ៏ត្រកាលរបស់អូរផ្លាយ។
សូមរំឮកថា ស្ពានដែកមួយកន្លែង ដែលជាស្ពានសម្រាប់ធ្វើដំណើរឆ្ពោះមករមណីដ្ឋានទឹកជ្រោះប៊ូស្រា និងជាសរសៃឈាមសេដ្ឋកិច្ចយ៉ាងសំខាន់ក្នុងការផ្លាស់ប្ដូរទំនិញផលិតផលផ្សេងៗពីទីរួមខេត្តមណ្ឌលគិរី ជាមួយទីរួមស្រុកពេជ្រាដា បានបាក់ហើយ គ្រាដែលស្ពាននោះគេបានមើលឃើញថា មានសភាពទ្រុតទ្រោមបន្តិចហើយ ស្របពេលដែលឡានយីឌុបមួយគ្រឿងដឹកស៊ីម៉ង់ និងឥដ្ឋឆ្លងកាត់នោះ ក៏បណ្ដាលឲ្យបាក់តែម្ដង ។
ហេតុការណ៍បាក់ស្ពាននេះបានកើតឡើងកាលពីវេលាម៉ោង១១យប់ ថ្ងៃទី២១ ធ្នូ ២០១៥ នេះ ស្ថិតនៅចំណុចអូរផ្លាយ ក្នុងភូមិពូរ៉ាដែត ឃុំស្រែអំពូម ស្រុកពេជ្រាដា ខេត្តមណ្ឌលគិរី ៕
ដោយ ៖ គឹម ចំរើន
