(ខេត្តកំពត)៖ នៅព្រឹកថ្ងៃពុធ ៨កើត ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៤ ខែធ្នូ ឆ្នាំ២០១៩ រដ្ឋបាលខេត្តកំពតបានបើកកិច្ចប្រជុំគណៈអភិបាលខេត្តប្រចាំខែវិច្ឆិកា ឆ្នាំ២០១៩។
កិច្ចប្រជុំនេះ បានប្រព្រឹត្តឡើងក្រោមអធិបតីភាព លោក ជាវ តាយ អភិបាលនៃគណៈអភិបាលខេត្តកំពត និងមានការចូលរួមពីសំណាក់លោកអភិបាលរងខេត្ត កងកម្លាំងទាំងបីប្រភេទ ប្រធាន អនុប្រធាន មន្ទីរអង្គភាពទូទាំងខេត្ត លោកនាយករដ្ឋបាលបាលសាលាខេត្ត អភិបាលក្រុង ស្រុក និងមន្ត្រីចំណុះនៃរដ្ឋបាលខេត្តទាំងមូល។
របៀបវារៈនៃកិច្ចប្រជុំ រួមមាន៖
១. ពិនិត្យ ពិភាក្សាលើសេចក្តីព្រាងរបាយការណ៍ប្រចាំខែវិច្ឆិកា ឆ្នាំ២១៩ ស្តីពីការអនុវត្តការងាររបស់រដ្ឋបាលខេត្ត.
២. ពិនិត្យ ពិភាក្សាលើការបែងចែកប្រាក់រង្វាន់លើកទឹកចិត្តជូនមន្ត្រីរាជការសាលាខេត្តប្រចាំខែវិច្ឆិកា ឆ្នាំ២០១៩.
៣. ពិនិត្យ ពិភាក្សាកែសម្រួលព្រំប្រទល់រដ្ឋបាលក្រុងកំពត និងស្រុកទឹកឈូ.
៤. សេចក្តីរាយការណ៍អំពីលទ្ធផលការធ្វើវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តឆ្នាំ២០១៩ នៅតាមបណ្តាក្រុង ស្រុក។
ក្នុងឱកាសនោះលោក ជាវ តាយ អភិបាលខេត្តកំពត បានជំរុញដល់បណ្តាមន្ទីរអង្គភាព អាជ្ញាធរក្រុង ស្រុក ទាំងអស់ត្រូវខិតខំបំពេញភារកិច្ចតាមតួនាទីរបស់ខ្លួន ដើម្បីឆ្លើយតបតម្រូវការទាន់ពេលវេលា សម្រាប់បម្រើសេវាជូនបងប្អូនប្រជាពលរដ្ឋនៅតាមមូលដ្ឋានឱ្យកាន់តែមានប្រសិទ្ធភាព៕ សេង ណារិទ្ធ
