(ខេត្តកែប)៖ នៅព្រឹកថ្ងៃទី០៣ ខែធ្នូ ឆ្នាំ២០១៩ លោក អ៊ុក ថាអភិបាលរងខេត្ត តំណាង លោក កែន សត្ថា អភិបាល នៃគណ:អភិបាលខេត្ត និងជាប្រធានក្រុមការងារកសាងផែនការអភិវឌ្ឍន៍ខេត្ត បានដឹកនាំកិច្ចប្រជុំផ្សព្វផ្សាយស្តីពីការផ្សព្វផ្សាយព័ត៌មានស្តីពីដំណើរការកសាងផែនការអភិវឌ្ឍន៍រយៈពេលប្រាំឆ្នាំ(២០២០-២០២៤)របស់រដ្ឋបាលខេត្ត ដែលមានការអញ្ជើញចូលរួមដោយ លោក លោកស្រី តំណាងក្រុមប្រឹក្សាខេត្ត តំណាងគណ:កម្មាធិការទាំងបីរបស់ក្រុមប្រឹក្សាខេត្ត ក្រុមការងារកសាងផែនការខេត្ត អភិបាលក្រុង ស្រុក និងអង្គការសង្គមស៊ីវិល សរុបប្រមាណ៥៥ រូប។
ក្នុងកិច្ចប្រជុំ លោក អ៊ុក ថា មានប្រសាសន៍ថា កិច្ចប្រជុំផ្សព្វផ្សាយថ្ងៃនេះ គឺជាការបង្ហាញនូវគោលបំណង និងវិធីសាស្ត្រ នៃការកសាងផែនការអភិវឌ្ឍរយៈពេលប្រាំឆ្នាំ របស់រដ្ឋបាលខេត្ត ជូនអ្នកពាក់ព័ន្ធ ដើម្បីជាមូលដ្ឋានក្នុង ការរួមគិត រួមធ្វើ និងរួមទទួលខុសត្រូវ ក្នុងការអភិវឌ្ឍខេត្តរបស់យើង ប្រកបដោយសក្តានុពល មានប្រសិទ្ធិភាព និងភាពឆ្លើយតបតាមស្ថានភាពជាក់ស្តែង។
លោកបានបញ្ជាក់ផងដែរថា ផែនការអភិវឌ្ឍន៍នេះ មានភាពច្បាស់លាស់ មានចក្ខុវិស័យត្រឹមត្រូវ វាពិតជាបានជះ ឥទ្ធិពលយ៉ាងពិតប្រាកដ ដល់ការដឹកនាំ គ្រប់គ្រង និងការសម្រេចបានលទ្ធផលល្អប្រសើរ ហើយការកសាងផែនការអភិវឌ្ឍន៍ខេត្ត ដែលមានភាពត្រឹមត្រូវ និងទទួលយកបាន វាពិតជាទាមទារនូវការចូលរួមពីគ្រប់ផ្នែកនៃអ្នកពាក់ព័ន្ធនានាផងដែរ។
ឆ្លើយតបទៅនឹងគោលបំណងដ៏មានសារៈសំខាន់នៃកិច្ចប្រជុំផ្សព្វផ្សាយនាថ្ងៃនេះ នឹងបង្ហាញនូវឯកសារសំខាន់ៗជាគត្តិយុត្តិមួយចំនួន និងផ្តល់ទិន្នន័យថ្មីៗ ដើម្បីប្រើប្រាស់ និងវិភាគស្ថានភាពក្នុងការកសាងផែនការអភិវឌ្ឍន៍។
លោកអភិបាលរងខេត្ត ក៏បានបន្ថែមទៀតថាដើម្បីឲ្យដំណើរការ នៃការកសាងផែនការអភិវឌ្ឍន៍រយៈពេលប្រាំឆ្នាំ ស្របតាមសេចក្តីណែនាំបច្ចេកទេស និងប្រតិទិនការងារ សូមសមាជិកសមាជិកានៃក្រុមការងារទាំងអស់ ដើម្បីឲ្យផែនការអភិវឌ្ឍន៍រយៈពេលប្រាំឆ្នាំ(២០២០-២០២៤)របស់ រដ្ឋបាលខេត្ត មានលក្ខណៈទូលំទូលាយ ស៊ីជម្រៅ និងអាចទទួលយកបាន សូមឲ្យគ្រប់បណ្តាយន្តការ គ្រប់មន្ទីរ អង្គភាព និងអ្នកពាក់ព័ន្ធទាំងអស់ ត្រូវតែចូលរួមក្នុងដំណើរការកសាងផែនការអភិវឌ្ឍន៍ខេត្តនេះ ដោយអនុវត្តន៍តាមសេចក្តីណែនាំបច្ចេកទេស ដែលបានកំណត់ដោយប្រកាសអន្តរក្រសួង លេខ០៨៤ផក ចុះថ្ងៃទី០២ ខែមីនា ឆ្នាំ២០១៧ របស់ក្រសួងមហាផ្ទៃ និងក្រសួងផែនការ ប្រតិទិនការងារកសាងផែនការអភិវឌ្ឍន៍រយៈពេលប្រាំឆ្នាំ(២០២០-២០២៤)របស់រដ្ឋបាលខេត្ត និងសេចក្តីសម្រេចគោលការណ៍ណែនាំផ្នែកគោលនយោបាយរបស់ក្រុមប្រឹក្សាខេត្ត ដែលអនុម័តដោយក្រុមប្រឹក្សាខេត្តអាណត្តិទី៣ ក្នុងសម័យប្រជុំវិសាមញ្ញកាលពីថ្ងៃទី២៩ ខែវិច្ឆិកា ឆ្នាំ២០១៩កន្លងមក៕ សេង ណារិទ្ធ
