រតនគីរី ៖ លោក ឡុច ឡៅ ចៅក្រមស៊ើបសួរសាលាដំបូងខេត្តរតនគីរី បានចេញលិខិតជូនដំណឹងអំពីដីកាដំណោះ ស្រាយ ចោទប្រកាន់ទៅលើមនុស្សចំនួន ៤នាក់ (តំណាងប្រជាពលរដ្ឋចំនួន ១០០គ្រួសារ ក្នុងភូមិបរឡយ ឃុំកិះចុង ស្រុកបរកែវ ខេត្តរតនគីរី)ពីបទរំលោភកាន់កាប់អចលនវត្ថុអ្នកដទៃ ។
មនុស្សទាំង៥នាក់នោះមានឈ្មោះដូចខាងក្រោម ៖ ១-ឈ្មោះ សូត្រ សឿន ភេទប្រុស អាយុ ៥៨ឆ្នាំ, ២-ឈ្មោះ ជ្រឹក ជឿន ហៅទូច ភេទប្រុស អាយុ ៣៧ឆ្នាំ, ៣- ឈ្មោះ ឯម ចាន់ ភេទប្រុស អាយុ ៥៦ឆ្នាំ,៤- ឈ្មោះ សយ រីម ភេទប្រុស អាយុ ៥៦ឆ្នាំ និង៥-ឈ្មោះ គួច សុភាព ភេទប្រុស ។
ក្រោយពីក្តាប់បាននូវសេចក្តីនៃលិខិតជូនដំណឹងនេះ ប្រជាពលរដ្ឋទាំង ១០០គ្រួសារ កើតទុកមិនសុខចិត្ត ប្រតិកម្មទៅនឹងតុលាការសាលាដំបូងខេត្តរតនគីរី ដែលចុះធ្វើការស៊ើបសួរមិនបានច្បាស់លាស់ដោយហេតុថា ដើមបណ្តឹងឈ្មោះ ហ៊ាង សុជាតិ បានកាន់ឯកសារលិខិតផ្ទេរសិទ្ធិកាន់កាប់ដីក្លែងក្លាយបន្លំយកទៅ ប្តឹងតុលាការ ។
តំណាងប្រជាពលរដ្ឋទាំង ៥នាក់ បានអះអាងថា មុនតុលាការសាលាដំបូងខេត្តរតនគីរី បើកសវនាការជំនុំ ជម្រះពីបទរំលោភកាន់កាប់អចលនវត្ថុអ្នកដទៃមេត្តាចុះស្រាវជ្រាវ ស៊ើបអង្កេតផង ។
តំណាងប្រជាពលរដ្ឋក៏បន្តបញ្ជាក់ឱ្យដឹងទៀតថា លោក ហ៊ាង សុជាតិ បានប្រព្រឹត្តក្លែងលិខិតផ្ទេរសិទ្ធិកាន់ កាប់ដីក្លែងក្លាយដែលមានផ្ទៃដី ១៨៦ហិកតា ។ មិនតែប៉ុណ្ណោះទេ ឈ្មោះ ហ៊ាង សុជាតិ បានក្លែងលិខិតសាធារណៈ បំភ័ន្តលោកមេឃុំ និងប្រជាពលរដ្ឋចំនួន ១០០គ្រួសារ ក្នុងគោលបំណងចង់លេបត្របាក់ដីពីអ្នកភូមិបរឡាយថែម ទៀតផង ។ លោកមេឃុំក៏ឃើញដូច្នោះក៏ធ្វើលិខិតបដិសេធរហូតដល់ចំនួនពីរច្បាប់ ។
សូមបញ្ជាក់ថា លើឯកសារកម្មសិទ្ធិដីរបស់ ហ៊ាង សុជាតិ សូម្បីមេឃុំកិះចុង លោក ស៊ើយ កែវ និងជំទាវ ខាំ ស្តៃ ក៏អត់ទទួលស្គាល់ដែរ ។ ចុះហេតុម្តេចក៏តុលាការហ៊ានចោទប្រជាពលរដ្ឋ និងកាន់ដើមចោទឈ្មោះ ហ៊ាង សុជាតិថា ជាអ្នកប្តឹងត្រឹមត្រូវទៅវិញ ? បើមិនជឿមេឃុំដែលជាអាជ្ញាធរដែនដី រស់នៅផ្ទាល់ជាមួយប្រជាពលរដ្ឋ តើទៅជឿអ្នកណាវិញ ។ តុលាការគួរតែចងចាំប្រសាសន៍សម្តេច ហ៊ុន សែន នាយករដ្ឋមន្ត្រីដែលលោកធ្លាប់មាន ប្រសាសន៍ថា មេឃុំជាអ្នកដឹងរឿងច្បាស់ជាងគេ ។
បញ្ហានេះប្រជាពលរដ្ឋទាំង ១០០គ្រួសារ សូមអំពាវនាវដល់អង្គការសង្គមស៊ីវិល ក្រសួងយុត្តិធម៌តុលាការ ខេត្តរតនគីរី និងអង្គភាពប្រឆាំងអំពើពុករលួយ មេត្តាចុះស្រាវជ្រាវអង្កេតឱ្យបានច្បាស់នឹងផ្តល់ភាពយុត្តិធម៌ជូន ប្រជាពលរដ្ឋដែលរងគ្រោះ ហើយកុំលំអៀងទៅជន ខិលខូចដែលធ្វើឱ្យបាត់បង់ជីវិត និងជីវភាពការរស់នៅរបស់ប្រជាជន ។
ជាពិសេសជាងនេះទៅទៀតនោះ សូមអង្វរដល់សម្តេចអគ្គមហាសេនាបតីតេជោ ហ៊ុន សែន មេត្តាជួយរកយុត្តិធម៌ដល់អ្នកភូមិបរឡយ ដែលកំពុងរងគ្រោះពីការលួចធ្វើលិខិតផ្ទេរសិទ្ធិកាន់កាប់ដី ក្លែងក្លាយ ពីបុគ្គលខិលខូចឈ្មោះ ហ៊ាង សុជាតិ នេះផង ៕
