(ខេត្តកំពត)៖ នៅថ្ងៃអង្គារ ១៥កើត (ពេញបូណ៌មី) ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៩ ខែកុម្ភ: ឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត និងលោកស្រី លាង ហៃ ជាវ តាយ បានដឹកនាំមន្ត្រីរាជការ និងប្រជាពលរដ្ឋពុទ្ធបរិស័ទ ក្រុងកំពត និងស្រុកទឹកឈូ ប្រារព្ធពិធីបុណ្យមាឃបូជា នៅប្រសាទដើមពោធិ៍ ស្ថិតនៅភូមិ១ឧសភា សង្កាត់កំពង់កណ្តាល ក្រុងកំពត ខេត្តកំពត។
អញ្ជើញចូលរួមក្នុងពិធីនេះក៏មានការចូលរួមយ៉ាងច្រើនកុះករ ពីសំណាក់លោក លោកស្រី ក្រុមប្រឹក្សាខេត្ត គណៈអភិបាលខេត្ត ប្រធាន អនុប្រធានមន្ទីរ អង្គភាពជុំវិញខេត្ត ក្រុមប្រឹក្សា គណៈអភិបាលក្រុង ស្រុក ប្រជាពុទ្ធបរិស័ទស្រុកទឹកឈូ និងក្រុងកំពត និងព្រះសង្ឃ សរុបចំនួន ប្រមាណ៤០០ អង្គ/នាក់។
ក្នុងនោះលោកអភិបាលខេត្ត បានឧបត្ថម្ភនូវថវិកាសម្រាប់ចូលបុណ្យចំនួន២.៦៤០.០០០រៀល និងឧបត្ថម្ភដល់យាយជីតាជី ម្នាក់២ម៉ឺនរៀល សរុប៥លានរៀល និងឧបត្ថម្ភដល់កងកម្លាំងប្រដាប់អាវុធ អស់ថវិកាសរុប៣លានរៀលផងដែរ។
លោក ជាវ តាយ អភិបាលខេត្តកំពត បានលើកឡើងថា ការលើកស្ទួយលើវិស័យសាសនាប្រៀបបាននឹងការឆ្លុះបញ្ចាំងនូវគុណធម៌របស់មនុស្សឲ្យប្រព្រឹត្តតែអំពើល្អ ប្រកបដោយសច្ចះទៀងត្រង់មិនប្រព្រឹត្តអបាយមុខ ហើយក៏បានបណ្តុះនូវផ្នត់គំនិតយើងឲ្យចេះធ្វើបុណ្យ រក្សាសិលទាន សាងតែអំពើល្អប្រកបដោយសទ្ធាជ្រះថ្លា។យ៉ាងណាមិញបុណ្យមាឃបូជា គឺជាថ្ងៃដែលយើងទាំងអស់គ្នារៀបចំធ្វើដើម្បីបូជា រម្មឹកចំពោះព្រះសម្មាសម្ពុទ្ធដែលព្រះអង្គបានបង្កើតព្រះពុទ្ធសាសនាឲ្យយើងប្រារព្ធធ្វើនៅតាមទីវត្តអារាមនានានៅទូទាំងប្រទេសកម្ពុជាផងដែរ។
សូមបញ្ជាក់ថា បុណ្យមាឃបូជា គឺជាពិធីមួយត្រូវបានប្រារព្ធចំថ្ងៃ១៥កើត(ខែពេញបូរមី)ខែមាឃ ដោយពុទ្ធសាសនឹកតែងតែនាំគ្នាប្រារព្ធធ្វើឡើងដើម្បីអនុមោទនាយកផលបុណ្យទាំងអស់គ្នាតាមទម្លាប់បន្តតាំងពីដូនតារៀងរហូតមក៕
សេង ណារិទ្ធ
