(ខេត្តកំពត)៖ នៅព្រឹក ថ្ងៃសៅរ៍ ៧កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១២ ខែមករា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត បានអនុញ្ញាតឲ្យប្រតិភូវិនិយោគិនចិន ចូលជួប សំណេះសំណាល និងពិភាក្សាគម្រោងវិនិយោគរថភ្លើងល្បឿនលឿន ភ្នំពេញ-កំពត នៅសាលប្រជុំសាលាខេត្តកំពត។
លោកអភិបាលខេត្ត បានស្វាគមន៍ប្រតិភូ និងបង្ហាញពីសក្តានុពលដ៏ល្អរបស់ខេត្តកំពត ពិសេសធនធានធម្មជាតិ រ៉ែធម្មជាតិ តំបន់ភ្នំ ប្រព័ន្ធគមនោគមន៍ទាំងផ្លូវទឹក -ផ្លូវគោក ផ្លូវរថភ្លើង កំពង់ផែ មានភូមិសាស្ត្រជាប់ជាមួយខេត្តព្រះសីហនុ និងប្រទេសវៀតណាម ដែលសុទ្ធតែជាបរិស្ថានល្អអំណោយផលដល់ការវិនិយោគ។
ជាមួយនេះ តំណាងប្រតិភូវិនិយោគិនចិន បានបង្ហាញពីចំណាប់អារម្មណ៍ចំពោះលក្ខណៈពិសេសរបស់ខេត្តកំពត និងមានគម្រោង វិនិយោគរថភ្លើងល្បឿនលឿន ភ្នំពេញ-កំពត ដោយប្រើថាមពលពន្លឺព្រះអាទិត្យ។
លោក ជាវ តាយ អភិបាលខេត្ត បានសម្តែងការគាំទ្រចំពោះគម្រោងវិនិយោគរបស់ក្រុមហ៊ុន ព្រមទាំងស្នើឲ្យក្រុមហ៊ុនធ្វើការសិក្សាជាមុនសិនលើការសិក្សាទីតាំង និងចំនួនផ្លូវរថភ្លើង ដើម្បីជាមូលដ្ឋានក្នុងកិច្ចប្រជុំពិភាក្សានាពេលខាងមុខនេះ។ ហើយរដ្ឋបាលខេត្តកំពត ត្រៀមខ្លួនជានិច្ចដើម្បីផ្តល់កិច្ចសហការល្អជាមួយភាគីចិន ជម្រុញឲ្យគម្រោងវិនិយោគដំណើរការតាមផែនការដែលបានគ្រោងទុក៕
សេង ណារិទ្ធ
