កំពត ៖ ការអនុវត្តនូវនយោបាយ សុខដុមនីយកម្មសាសនា គឺជាការនាំមកនូវ សុខសន្តិភាព និងការអភិវឌ្ឍន៍ព្រមទាំង ធ្វើឲ្យប្រជាពលរដ្ឋមានជីវភាពរស់នៅប្រកបដោយសុខសាន្ត។ នេះជាការលើកឡើង របស់ លោក លី សារីសមាជិកព្រឹទ្ធសភា និងជាប្រធានអង្គការមូលនិធិអភិវឌ្ឍន៍មុស្លីមកម្ពុជាខេត្តកំពត នៅក្នុងពិធីចែកសាច់គោ ជូនដល់ប្រជាពលរដ្ឋសសាសនិកខ្មែរឥស្លាមប្រមាណជាង៣០០គ្រួសារនៅក្នុងឱកាស នៃបុណ្យរ៉យ៉ាហាជ្ជីសាសនាឥស្លាមដែលពិធីនេះធ្វើនៅភូមិកំពង់កែស ឃុំត្រពាំងសង្កែ ស្រុកទឹកឈូ ខេត្តកំពតកាលពីថ្ងៃ២៣ខែសីហាឆ្នាំ២០១៨ថ្មីៗនេះ។
លោក លី សារី បានបន្តលើកឡើងទៀតថា រាជរដ្ឋាភិបាលនៃព្រះរាជាណាចក្រកម្ពុជាយើង ក្រោមការដឹកនាំរបស់សម្ដេចតេជោ ហ៊ុន សែនគឺបានដឹកនាំប្រទេសនាំមកនូវសុខសន្តិភាព និងការអភិវឌ្ឍន៍នាំមកនូវសុខដុមនីយកម្មសាសនា ដោយមានការសម្របសម្រួលជូនប្រជាពលរដ្ឋនូវការគោរពជំនឿសាសនារៀងៗខ្លួននិងប្រជាពលរដ្ឋមានការរស់នៅប្រកបដោយសុខដុមរមនា។
លោក លី សារី ក៏បាន ពាំនាំនូវការសួរសុខទុក្ខពីសំណាក់ថ្នាក់ដឹកនាំកំពូលនៃស្ថាប័នជាតិទាំងបី និងបានថ្លែងអំណរគុណកោតសរសើរចំពោះបងប្អូនសាសនិកខ្មែរឥស្លាមនៅទីនោះដែលតែងតែមានជំនឿជឿជាក់លើការដឹកនាំដ៏ត្រឹមត្រូវរបស់រាជរដ្ឋាភិបាលដែលមានសម្ដេចតេជោហ៊ុន សែន ជានាយករដ្ឋមន្ត្រី។ ពិសេសការបោះឆ្នោតជ្រើសតាំងតំណាងរាស្ត្រអាណត្តិទី៦ថ្មីៗនេះ សង្កេតឃើញថាបងប្អូនប្រជាពលរដ្ឋយើងបាននាំគ្នាទៅបោះឆ្នោតគាំទ្រសម្ដេចតេជោ ហ៊ុន សែន ដើម្បីបានដឹកនាំប្រទេសបន្តទៀតយ៉ាងភ្លូកទឹកភ្លូកដីដោយមិនបានជឿតាមការអូសទាញញុះញង់របស់អ្នកប្រឆាំងក្រៅច្បាប់ឡើយ។
លោក លី សារីក៏បានថ្លែងអំណរ គុណកោតសរសើរដល់អង្គការមូលនិធិទួរគីឌីយ៉ានេតនៃប្រទេសទួរគីផងដែរដែលតែងតែបានធ្វើអំណោយសប្បុរសធម៌ដល់ប្រជាពលរដ្ឋសាសនិកឥស្លាមកម្ពុជា។ពិសេសការបែងចែកសាច់គោដល់អ្នកក្រីក្រនៅក្នុងពិធីបុណ្យរ៉យ៉ាហាជ្ជីនាពេលនេះគឺជាអំពើកុសលផលបុណ្យដ៏ប្រពៃសម្រាប់បុណ្យមួយនេះផងដែរ ។
ក្នុងឱកាសនោះដែរ លោក ម៉ាត់ សេត សមាជិក អ្នកតំណាងរាស្ត្រ មណ្ឌលកំពតនិងជាតំណាង លោក ឧស្ម័ន ហាស្សាន់បានឲ្យដឹងថា គម្រោងចែកសាច់គោជូនដល់ប្រជាពលរដ្ឋសាសនិកខ្មែរឥស្លាមក្នុងឱកាសបុណ្យរ៉យ៉ាហាជ្ជីនៃសាសនាឥស្លាមនាពេលនេះគឺជាគម្រោងលើកទី៣ហើយក្រោមជំនួយសហការឧបត្ថម្ភរបស់អង្គការមូលនិធិទួរគីឌីយ៉ានេតហៅថា( TDV)នៃប្រទេសទួរគី តាមរយៈលោក ឧស្ម័ន ហាស្សាន់ ប្រធានអង្គការមូលនិធិអភិវឌ្ឍន៍មុស្លីមកម្ពុជា ។
សម្រាប់ឆ្នាំនេះ នៅទូទាំងប្រទេសមានចំនួនគោ៤៥០ក្បាលដោយអនុវត្តបែងចែកនៅទីតាំងខេត្តចំនួនបីកន្លែងខុសគ្នា។
ដោយឡែកសម្រាប់ទីតាំងនៅខេត្តកំពតនាពេលនេះ មានគោចំនួន១១០ក្បាល ដោយបែងចែកតាមខេត្ត រាជធានី គោលដៅចំនួន០៧ គឺ
ទី១-ខេត្តកំពតចំនួន(៧០ក្បាល)
ទី២-ខេត្តកែប(០៤ក្បាល)
ទី៣-ខេត្តព្រះសីហនុ(០៦ក្បាល)
ទី៤-ខេត្កកំពង់ស្ពឺ(០២ក្បាល)
ទី៥-ខេត្តកោះកុង(១០ក្បាល)ទី៦ខេត្ត
តាកែវ(០៨ក្បាល)
និងទី៧-រាជធានីភ្នំពេញ(១០ក្បាល)។
ហើយការបែង ចែកសាច់គោជូនប្រជាជលរដ្ឋនៅក្នុងភូមិកំពង់កែស ឃុំត្រពាំងសង្កែ នាពេល នេះដែរមានចំនួនជាង៣០០គ្រួសារ៕
សេង ណារិទ្ធ
