ពិធីប្រកាសទទួលស្គាល់សមាសភាពក្រុមការងារចុះជួយសហភាពសហព័ន្ធយុវជនកម្ពុជា ស្រុកពាមរក៍
ព្រៃវែង : នាព្រឹកថ្ងៃទី១២ ខែឧសភា ឆ្នាំ២០២៤នេះ ឯកឧត្តម ខៀវ ភារិទ្ធ ប្រធានសហភាពសហព័ន្ធយុវជនកម្ពុជា ខេត្តព្រៃវែង បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីប្រកាសទទួលស្គាល់សមាសភាពក្រុមការងារចុះជួយសហភាពសហព័ន្ធយុវជនកម្ពុជា ស្រុកពាមរក៍ ក្នុងនោះ ក៏មានវត្តមានលោកប្រធានក្រុមប្រឹក្សាស្រុក និងលោកស្រីអភិបាលស្រុក ព្រមទាំងកងកម្លាំងទាំងបី និងសមាជិក សមាជិកា សរុបប្រមាណ ១៥០នាក់។
ថ្លែងក្នុងអង្គពិធី ឯកឧត្តមប្រធាន បានមានប្រសាសន៍ថា តាមរយ:អំពើល្អរបសស់យុវជន បច្ចុប្បន្ននេះ ស.ស.យ.ក. បាននិងកំពុងក្លាយទៅជានិមិត្តរូបដ៏ល្អនៅក្នុងដួងចិត្តប្រជាពលរដ្ឋ ហេតុនេះ ក្នុងនាមជាយុវជនជំនាន់ក្រោយ ត្រូវពង្រឹងសមត្ថភាពរបស់ខ្លួនជាប្រចាំ ហើយក្ដាប់ឲ្យបាននូវស្ថានភាពប្រវត្តិសាស្រ្ត និងគោលនយោបាយរបស់រាជរដ្ឋាភិបាល ដើម្បីគាំទ្រដល់ចក្ខុវិស័យ និងសកម្មភាពរបស់ថ្នាក់ដឹកនាំ នាពេលអនាគត។
ឆ្លៀតក្នុងឱកាសនេះដែរ ឯកឧត្តម បានបង្ហាញនូវគោលជំហរយ៉ាងមុតមាំក្នុងការគាំទ្រនូវគម្រោងព្រែកជីក ហ្វូណន-តេជោ ដែលគម្រោងនេះ បានផ្តល់អត្ថប្រយោជន៍ដ៏មហាសាលដល់សេដ្ឋកិច្ចប្រទេសជាតិ ជាពិសេសការបង្កើតឱ្យមានប្រព័ន្ធធារាសាស្ត្រសម្រាប់ស្រោចស្រពផ្ទៃដីកសិកម្មនៅទិសនិរតី និងការបង្កើតប្រព័ន្ធរំដោះទឹកជំនន់ជាដើម។ ក្នុងស្មារតីនេះ សូមអំពាវនាវដល់ប្រជាពលរដ្ឋខ្មែរទាំងអស់រួមគ្នាគាំទ្រ “ការសាងសង់ព្រែកជីកហ្វូណន-តេជោ” ដើម្បីទុកជាទ្រព្យសម្បត្តិដ៏មានតម្លៃសម្រាប់ប្រទេស និងប្រជាជនកម្ពុជា ទាំងក្នុងបច្ចុប្បន្ន និងបន្តទៅអ្នកជំនាន់ក្រោយ។
