កែប ៖ បន្ទាប់ពីមានភ្លៀងធ្លាក់បន្តបន្ទាប់ជាប់គ្នារយៈពេលប៉ុន្មានថ្ងៃនេះ គេសង្កេតឃើញក្នុងភូមិសាស្ត្រនៃសង្កាត់ព្រៃធំ ក្រុងកែប មានការលិចលង់មួយអន្លើ ដែលជាបញ្ហាមួយធ្វើឲ្យប្រជាពលរដ្ឋរស់ក្នុងតំបន់ជួបបញ្ហាលំបាកខ្លះៗផងដែរ។
ជាមួយនឹងករណីប្រឈមខាងលើនេះ នៅព្រឹកថ្ងៃទី០៥ខែកក្កដា ឆ្នាំ២០១៨ គេឃើញវត្តមាន លោកស្រី ទិត សុខា អភិបាល នៃគណៈអភិបាលក្រុងកែប បានដឹកនាំមន្ត្រីសាលាក្រុង ព្រមទាំងអាជ្ញាធរមូលដ្ឋាន ចុះពិនិត្យទីតាំងដែលកំពុងរងនឹងជំនន់ភ្លៀង ស្ថិតក្នុងភូិដំណាក់ចង្អើ សង្កាត់ព្រៃធំ ក្រុងកែប ខេត្តកែប ដោយបានរៀបចំធ្វើជាប្រព័ន្ធលូដើម្បីរំដោះទឹកចេញពីទីតាំងខាងលើបានទាន់ពេលវេលា។
លោកស្រី ទិត សុខា អភិបាលក្រុងកែប បានបញ្ជាក់ថា ករណីលិចលង់មួយផ្នែកតូចដែលកំពុងធ្វើឲ្យប្រជាពលរដ្ឋជួបការលំបាកនេះ បណ្តាលមកពីស្ទះទឹក ខណៈពេលប្រជាពលរដ្ឋចាក់ដីបិទប្រព័ន្ធផ្លូវទឹក ស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុងកែប ដោយគ្មានបច្ចេកទេសគឺមិនបានដាក់លូត្រឹមត្រូវទៅតាមស្តង់ដារ លុះពេលមានភ្លៀងធ្លាក់បន្តបន្ទាប់គ្នាទើបធ្វើឲ្យចំណុចនេះត្រូវរងនឹងជំនន់ទឹកភ្លៀងមួយអន្លើ។លោកស្រី អភិបាលក្រុងបានបញ្ជាក់ទៀតថា ក្រោយពីរៀបចំប្រព័ន្ធលូរួចរាល់ ភូមិសាស្ត្រនេះលែងមានបញ្ហាប្រឈមនឹងជំនន់ទឹកភ្លៀងទៀតហើយ ព្រោះដងផ្លូវនៅតំបន់នោះត្រូវបានរៀបចំជីកកកាយដាក់លូរំដោះទឹកចេញបានរួចរាល់ជាស្ថាពរ ដែលអាចបញ្ជៀសទឹកមិនឲ្យជោរជន់ដូចមុនទៀតឡើយ៕
សេង ណារិទ្ធ
