(ក្រចេះ) ៖ នាព្រឹកថ្ងៃទី០៣ ខែមករា ឆ្នាំ២០២៤ នៅខេត្តក្រចេះ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានអញ្ជើញជាអធិបតីពិធីប្រកាសសមាសភាពក្រុមការងារគណបក្សប្រជាជនកម្ពុជា ចុះមូលដ្ឋានខេត្តក្រចេះ ដោយលោក នេត្រ ភក្ត្រា ត្រូវបានប្រកាសជាប្រធានក្រុមការងារ និងលោក ស ចំរ៉ុង ជាអនុប្រធានទី១។
ក្រោយលោក វ៉ា ថន សមាជិកគណៈកម្មាធិការកណ្តាល និងជាប្រធានគណៈកម្មាធិការគណបក្សខេត្តក្រចេះ បានធ្វើរបាយការណ៍សកម្មភាពរបស់គណបក្សខេត្តជូនអង្គពិធីរួចមក, លោក សោម សឿន សមាជិកអចិន្ត្រៃយ៍ នៃគណៈកម្មាធិការកណ្តាល និងជាប្រធានគណៈចាត់តាំង នៃគណកម្មាធិការកណ្តាលគណបក្សប្រជាជនកម្ពុជា បានអានសេចក្ដីសម្រេចស្ដីពីការកែសម្រួលប្រធាន និងអនុប្រធានទី១ ក្រុមការងារគណបក្សចុះមូលដ្ឋានខេត្តក្រចេះ ដោយត្រូវបានចាត់តាំងលោក នេត្រ ភក្ត្រា ជាប្រធានក្រុមការងារគណបក្សចុះមូលដ្ឋានខេត្តក្រចេះ ជំនួសលោក ព្រំ សុខា និងចាត់តាំង លោក ស ចំរុង ជាអនុប្រធានទី១ ក្រុមការងារគណបក្សចុះមូលដ្ឋានខេត្តក្រចេះ។
ថ្លែងក្នុងឱកាសនោះ សម្តេចកិត្តិសង្គហបណ្ឌិត ម៉ែន សំអន បានកោតសសើរលោក ព្រំ សុខា ដែលបានដឹកនាំក្រុមការងារគណបក្សចុះមូលដ្ឋានខេត្តក្រចេះកន្លងមក ដោយសម្រេចបាននូវសា្នដៃជាច្រើន ក្នុងការចូលរួមចំណែក ក្នុងការថែរក្សាសុខសន្តិភាព សណ្តាប់ធ្នាប់សង្គម ការអភិវឌ្ឍនសង្គម សេដ្ឋកិច្ច លើកម្ពស់ជីវភាពរស់នៅរបស់ប្រជាពលរដ្ឋខេត្កក្រចេះ។
សម្តេចកិត្តិសង្គហបណ្ឌិត ក៏បានផ្ដាំផ្ញើដល់លោក នេត ភក្ត្រា ដែលបានទទួលបានការតែងតាំងមុខតំណែងថ្មី ត្រូវបន្តខិតខំប្រឹងប្រែងដើម្បីចូលរួមចំណែកកសាង និងអភិវឌ្ឍន៍ខេត្តក្រចេះ ឱ្យមានការរីកចម្រើនថ្មីៗបន្ថែមទៀត ពិសេសត្រូវអនុវត្តអោយបានខ្ជាប់ខ្ជួននូវលក្ខន្តិកៈរបស់គណបក្ស និងកម្មវិធីគោលនយោបាយ គោលការណ៍ទាំងឡាយរបស់គណបក្ស ដែលថ្នាក់កណ្ដាលបានដាក់ចុះឲ្យបានត្រឹមត្រូវ ម៉ឺងម៉ាត់ ព្រមទាំងសាមគ្គីភាព ផ្ទៃឲ្យបានរឹងមាំ ដោយឈរលើមាគ៌ាមហាជនរបស់បក្ស ដើម្បីត្រៀមការងារសំខាន់ៗឆ្ពោះទៅកាន់ការបោះឆ្នោតនៅអាណត្តក្រោយៗទៀត ឱ្យទទួលបានលទ្ធផលជោគជ័យ។
លោក នេត្រ ភក្ត្រា ប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តក្រចេះ បានធ្វើការប្តេជ្ញាចិត្ត៨ចំណុចសំខាន់ៗ ដើម្បីបង្កើនជំនឿទុកចិត្តកាន់តែខ្លាំងរបស់ពលរដ្ឋខេត្តក្រចេះ និងដណ្តើមជ័យជម្នះគ្រប់ការ បោះឆ្នោតជូនគណបក្សប្រជាជនកម្ពុជា។
ចំណុចសំខាន់ទាំង៨ នៃការប្តេជ្ញាចិត្តរបស់ប្រធានក្រុមការងារគណបក្សប្រជាជនកម្ពុជា ចុះមូលដ្ឋានខេត្តក្រចេះ រួមមាន៖
*ទី១៖ អនុវត្តឱ្យបានខ្ជាប់ខ្ជួននូវលក្ខន្តិកៈបក្ស និងគោរពអនុវត្តនូវគោលការណ៍ និងសេចក្តីសម្រេចនានារបស់គណបក្សដែលបានដាក់ចុះឱ្យបានជោគជ័យ និងមានប្រសិទ្ធភាពខ្ពស់។
*ទី២៖ យកអស់កម្លាំងកាយ បញ្ញាស្មារតី សមត្ថភាព និងលទ្ធភាពគ្រប់បែបយ៉ាងអនុវត្តយ៉ាងសកម្ម មោះមុតរួមចំណែកក្នុងការអនុវត្តកម្មវិធីនយោបាយគណបក្ស និងយុទ្ធសាស្ត្ររបស់រាជររដ្ឋាភិបាលកម្ពុជា ឱ្យបានជោគជ័យ និងយកចិត្តទុកដាក់ពង្រឹងឱ្យមានប្រសិទ្ធភាពខ្ពស់ រចនាសម្ព័ន្ធក្បាលម៉ាស៊ីនដឹកនាំក្រុម ការងារគណបក្សចុះមូលដ្ឋានខេត្ត និងយន្តការគណបក្សខេត្ត ក្រុង ស្រុក ឃុំសង្កាត់ និងសាខាបក្សភូមិ ក្រុមបក្ស ធានាបានទាំងបរិមាណ និងគុណភាពដើម្បីបុព្វហេតុដ៏ឧត្តុង្គឧត្តមរបស់គណបក្ស និងទទួលបានការគាំទ្រ ជឿទុកចិត្តពីប្រជាពលរដ្ឋគ្រប់មជ្ឈដ្ឋានមកលើគណបក្សប្រជាជនកម្ពុជា។
*ទី៣៖ ចូលរួមពង្រឹង និងថែរក្សាឱ្យបានរឹងមាំនូវសាមគ្គីភាព និងឯកភាពផ្ទៃក្នុងដែលជាស្នូល ដ៏រឹងមាំរបស់គណបក្ស តាមគោលការណ៍ «រក្សាចាស់ បង្កើនថ្មី» និងប្តេជ្ញាយកចិត្តទុកដាក់ខ្ពស់និង ប្រកាន់ខ្ជាប់នូវវប្បធម៌ចែករំលែក ណែនាំតម្រង់ទិស តាមដានវាយតម្លៃ និងពង្រឹងជាប់ជាប្រចាំនូវរបៀបរបបការងារ របបប្រជុំ ត្រួតពិនិត្យ និងរបបរបាយការណ៍, បន្តចិញ្ចឹមចលនាគណបក្សនៅមូលដ្ឋានដើម្បីផ្សាភ្ជាប់ជាមួយប្រជាជន និងមហាជន ស្វែងយល់តម្រូវការចាំបាច់ និងខិតខំប្រឹងប្រែងដោះស្រាយសំណូមពររបស់ប្រជាពលរដ្ឋឱ្យទទួលបានលទ្ធផលល្អប្រសើរ។
*ទី៤៖ ធ្វើឱ្យអង្គការចាត់តាំងគណបក្សគ្រប់ជាន់ថ្នាក់ ត្រូវតែប្រកាន់ខ្ជាប់នូវភាពស្មោះត្រង់ជាមួយ គណបក្ស និងត្រូវយកប្រជាជនធ្វើជាគោលដៅក្នុងការបម្រើរបស់ខ្លួន។
*ទី៥៖ ចូលរួមចំណែក ក្នុងការបន្តកសាង ពង្រឹងអង្គការចាត់តាំងគណបក្សនៅគ្រប់ថ្នាក់ឱ្យបាន រឹងមាំទាំងទស្សនៈ គោលជំហរ នយោបាយ សតិអារម្មណ៍និងអនុវត្តឱ្យបានល្អនូវគោលការណ៍ «សមាជិកបក្សម្នាក់ ជាសំឡេងឆ្នោតគាំទ្រមួយសំឡេងសម្រាប់គណបក្ស ដើម្បីនាំមកនូវជោគជ័យដ៏ត្រចះ ត្រចង់ ជូនគណបក្សប្រជាជនកម្ពុជា និងធានានិរន្តរភាពនៃជ័យជម្នះរបស់បក្សនៅគ្រប់ការបោះឆ្នោត។
*ទី៦៖ ចូលរួមអនុវត្តឱ្យបានជោគជ័យនូវកម្មវិធីនយោបាយសម្រាប់កសាងនិងការពារមាតុភូមិឆ្នាំ ២០២៣-២០២៨ ដែលបានក្លាយជាកម្មវិធីនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា និង យុទ្ធសាស្ត្របញ្ចកោណដំណាក់កាលទី១ ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។
*ទី៧៖ ចូលរួមជាមួយរាជរដ្ឋាភិបាលថែរក្សាការពារឱ្យបានដាច់ខាតនូវឯករាជ្យ អធិបតេយ្យ និងបូរណភាពទឹកដី ការពារសន្តិភាព ស្ថេរភាពនយោបាយ សន្តិសុខ សណ្តាប់ធ្នាប់ និងការអភិវឌ្ឍសេដ្ឋកិច្ច សង្គម និងមិនអនុញ្ញាតឱ្យក្រុមជនអគតិណាមួយមកបំផ្លិចបំផ្លាញសន្តិភាព និងឯកភាពជាតិកម្ពុជាបានឡើយ។
*ទី៨៖ ការពារពារឱ្យបានគង់វង្សស្ថិតស្ថេរជានិរន្តរ៍នូវរបបរាជានិយមអាស្រ័យរដ្ឋធម្មនុញ្ញ ការពារ រាជបល្ល័ង្គ និងការពារ អង្គព្រះមហាក្សត្រ ជាទីគោរពសក្ការៈដ៏ខ្ពង់ខ្ពង់ ដើម្បីព្រះអង្គគង់ប្រថាប់ជាម្លប់ដ៏ត្រជាក់និងសុខក្សេមក្សាន្តសម្រាប់ប្រទេសជាតិនិងប្រជាជនកម្ពុជា៕
