កំពត ៖ ប្រជាពលរដ្ឋដែលរស់នៅក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្ពកំពត មានក្តីរីករាយ ខណៈអាជ្ញាធរខេត្តកំពត បញ្ជូនក្រុមការងារទៅពិនិត្យ ដោះស្រាយ និងវាស់វែងផ្តល់ប័ណ្ណកម្មសិទ្ធិដីធ្លីដល់ពួកគាត់។
ជាមួយនឹងបេសកកម្មចុះពិនិត្យ ដោះស្រាយដីខាងលើនេះ លោក ង៉ែត សាវឿន ជំនួសឱ្យក្រុមការងារវាស់វែងដីធ្លី បានប្រាប់អ្នកយកព័ត៌មាន នៅព្រឹកថ្ងៃទី២២ខែឧសភា ឆ្នាំ២០១៨នេះថា ការចុះអនុវត្តនេះ ក្រុមការងារក៏ដូចជាជំនាញបានចុះបេសកកម្មតាមគោលការណ៍របស់អាជ្ញាធរខេត្ត តាមរយៈប្រជាពលរដ្ឋចំនួន១៨៩គ្រួសារ ដែលបានស្នើសុំរដ្ឋបាលខេត្តកំពតឱ្យជួយអន្តរាគមន៍កន្លងមក។
លោក ង៉ែត សាវឿន បានប្រាប់ទៀតថា សកម្មភាពនេះក្រុមការងារបានសហការជាមួយសមត្ថកិច្ចជំនាញគ្រប់ស្រទាប់ និងអាជ្ញាធរមូលដ្ឋាន ដើម្បីចុះមកពិនិត្យជាក់ស្តែងនៅទីតាំងខាងលើ ដើម្បីអនុវត្តតាមការស្នើសុំរបស់បងប្អូនប្រជាពលរដ្ឋនៅតំបន់នេះ។លោកបានបញ្ជាក់ផងដែរថា កន្លងមកមានសារព័ត៌មានក្នុងស្រុកមួយផ្នែកតូចបានចុះផ្សាយពីករណីទំនាស់ដីធ្លីរាំុរ៉ៃនៅចំណុចភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ដោយការចុះផ្សាយដោយបំផ្លើសគ្មានការពិតឡើយ។
ផ្ទុយទៅវិញ អាជ្ញាធរនិងក្រុមការងារ បានខិតខំអនុវត្តគោលការណ៍គ្មានពេលទំនេរឡើយ ហើយអំឡុងពេលនេះ ក្នុងចំណោមប្រជាពលរដ្ឋ១៨៩គ្រួសារ ក្រុមការងារបានចុះវាស់វែងជូនប្រជាពលរដ្ឋចំនួន៨៣គ្រួសាររួចហើយ។ចំណែកនៅសេសសល់ក្រុមការងារនឹងបន្តនីតិវិធីដើម្បី ពិនិត្យ-ដោះស្រាយជូនពួកគាត់ជាបន្តបន្ទាប់ទៀត។
ជាមួយនេះដែរ លោកក៏បានលើលឡើងពីករណីប្រឈមមួយចំនួន ដូចជាក្នុងចំណោមប្រជាពលរដ្ឋចំនួន១៨៩គ្រួសារខាងលើមានឈ្មោះស្ទួនរហូតដល់៤១គ្រួសារ ទើបក្រុមការងារពិបាករកដំណោះស្រាយជូន។បានន័យថាឧបសគ្គកើតឡើងគឺផ្តើមឡើងដោយសារភាគីប្រជាពលរដ្ឋនិងប្រជាពលរដ្ឋ មិនមែនពាក់ព័ន្ធជាមួយអាជ្ញាធរឡើយ និយាយឱ្យចំ គឺការវិវាទរវាងប្រជាពលរដ្ឋក្នុងចំណោម១៨៩គ្រួសារ ជាមួយប្រជាពលរដ្ឋ១០៣គ្រួសារ ដែលបានប្រកាសទិន្នន័យក្បាលដីរួចហើយ ។
លោក ង៉ែត សាវឿន បានបញ្ជាក់បន្ថែមថា ទោះជាមានករណីប្រឈមខ្លះៗដោយសារមនុស្សខិលខូចមួយក្តាប់តូចបង្កភាពញុះញង់យ៉ាងណាក៏ដោយ ក៏ក្រុមការងាររបស់លោក មិនរាថយដោយនៅតែបន្តនីតិវិធីដោះស្រាយដីធ្លីជូនប្រជាពលរដ្ឋក្នុងតំបន់ខាងលើឱ្យបានជោគជ័យនាពេលខាងមុខ។
សូមបញ្ជាក់ផងដែរថា៖ ការចុះពិនិត្យ ដោះស្រាយ និងវាស់វែងដីធ្លីជូនប្រជាពលរដ្ឋស្ថិតក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ក្រុមការងារបានអនុវត្តទៅតាមការស្នើសុំរបស់ប្រជាពលរដ្ឋ១៨៩គ្រួសារ ចាប់ពីខែមីនា ដល់ថ្ងៃទី១៨ខែឧសភា ឆ្នាំ២០១៨ បានសរុប៨៣គ្រួសារ ទំនាស់០៥គ្រួសារ ។ ហើយក្នុងចំណោម១៨៩គ្រួសារក៏មានឈ្មោះស្ទួនរហូតដល់ទៅ៤១គ្រួសារ និងមានប្រជាពលរដ្ឋចំនួន១៤គ្រួសារ ស្មើនឹង១៤ក្បាលដីកំពុងមានទំនាស់រវាងប្រជាពលរដ្ឋដូចគ្នាដែលមានចំនួន១០៣គ្រួសារ ដែលមានផ្ទៃដី៥២៣ហិកតា ក្នុងសេចក្តីជូនដំណឹងលេខ ១៤០២ សជណ ចុះថ្ងៃទី០៨ខែធ្នូ ឆ្នាំ២០១៥ របស់ទីស្តីការគណៈរដ្ឋមន្ត្រី ដែលក្រុមការងារមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ធ្វើការបិទផ្សាយរួចហើយៗក្រុមការងារបានវាស់វែងកាលពីឆ្នាំ២០១៦កន្លងមក៕
សេង ណារិទ្ធ
