ឧបនាយករដ្ឋមន្ត្រី កែ គឹមយ៉ាន សំណេះសំណាលជាមួយគ្រីស្ទបរិស័ទ និងសុំឱ្យទៅបោះឆ្នោតជូនគណបក្សប្រជាជនកម្ពុជា ដើម្បីបន្តមានសន្តិភាព និងការអភិវឌ្ឍ

(បន្ទាយមានជ័យ)៖ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ស្នើសុំបែបនេះក្នុងឱកាសសំណេះសំណាល ជាមួយគ្រីស្ទបរិស័ទខេត្តបន្ទាយមានជ័យ នាព្រឹកថ្ងៃទី១៧ ខែមិថុនា ឆ្នាំ២០២៣ ដោយមានក្រុមការងារគ្រប់ថ្នាក់ចូលរួម។

ក្នុងឱកាសនោះ ឧបនាយករដ្ឋមន្ត្រី កែ គឹមយ៉ាន បានពាំនាំបណ្តាំសួរសុខទុក្ខពីថ្នាក់ដឹកនាំកំពូលជាតិ និងសម្តែងនូវការគោរពដឹងគុណ និងសេចក្តីស្រលាញ់ដ៏ជ្រាលជ្រៅចំពោះបងប្អូនជាគ្រីស្ទបរិស័ទទាំងអស់ ដែលតែងតែផ្តល់នូវការគាំទ្រប្រកបដោយភាពជឿជាក់ ចំពោះការដឹកនាំរបស់រាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជានៅគ្រប់កាលៈទេសៈ ក្នុងការបន្តកសាងនិងអភិវឌ្ឍន៍ប្រទេស។

ក្នុងឱកាសនោះដែរ ឧបនាយករដ្ឋមន្ត្រី កែ គឹមយ៉ាន បានថ្លែងថា សម្តេចតេជោដឹកនាំកម្ពុជា៤៤ឆ្នាំបោះជំហានទៅមុខយ៉ាងរឹងមាំមានសន្តិភាព កិច្ចសហប្រតិបត្តិការ និងការអភិវឌ្ឍលើគ្រប់វិស័យសម្រេចបាននូវសមិទ្ធិផល យ៉ាងត្រចះត្រចង់ ជាពិសេសការធ្វើសុខដុមនីយកម្មជាតិសាសន៍ និងសាសនា អភិរក្ស គាំទ្រ លើកស្ទួយ អភិវឌ្ឍន៍ និងគាំទ្រវិស័យសាសនាផ្សេងៗអាចរួមរស់ជាមួយគ្នាក្នុងគោលដៅឆ្ពោះទៅមុខទាំងអស់គ្នា ផ្តល់សិទ្ធិសេរីភាព គ្មានការរើសអើងសម្រាប់បងប្អូន ក្មួយៗគ្រឹស្តបរិស័ទ ក្នុងការចូលរួមបម្រើការងារទាំងវិស័យរដ្ឋ​​និងឯកជន ក្នុងគោលដៅបម្រើជាតិមាតុភូមិ និងអភិវឌ្ឍប្រទេស។

ជាមួយគ្នានេះ ឧបនាយករដ្ឋមន្ត្រី កែ គឹមយ៉ាន បានស្នើសុំដល់គ្រីស្ទបរិស័ទទាំងអស់សូមបន្តចូលរួមជាមួយរាជរដ្ឋាភិបាលដឹកនាំដោយសម្តេចតេជោ ហ៊ុន សែន បន្តរក្សាបាននូវសុខសន្តិភាព និងការអភិវឌ្ឍ និងសូមអញ្ជើញទៅបោះឆ្នោតជ្រើសតាំងតំណាងរាស្រ្តនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ដោយបោះឆ្នោតជូនគណបក្សប្រជាជនកម្ពុជាឱ្យគ្រប់ៗគ្នា។

វប្បធម៌ចែករំលែក ឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យ បាននាំអំណោយជាថវិកា សម្ភារ ឧបត្ថម្ភដល់អ្នកចូលរួម១២២៦នាក់ដែលសរុបរួមគិតជាថវិកា ចំនួន៣៤លាន៣២៨ពាន់រៀលគត់៕