សម្ដេចតេជោ ហ៊ុន សែន ដាក់ចេញបទញ្ជាដល់កងម្លាំងប្រដាប់អាវុធយោធភូមិភាគទី១ ខេត្តរតនគិរី, មណ្ឌលគិរី និងខេត្តក្រចេះ ទប់ស្កាត់ក្រុមឧទ្ទាមវាយប្រហារនៅវៀតណាម ដែលអាចរត់ចូលមកកម្ពុជា
ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានដាក់ចេញនូវបទបញ្ជាដោយចំហ ឱ្យកងកម្លាំងប្រដាប់អាវុធនៅទិសយោធភូមិភាគទី១ រួមទាំងកងកម្លាំងប្រដាប់ដាប់អាវុធខេត្តរតនគិរី មណ្ឌលគិរី និងខេត្ដក្រចេះ ត្រូវរួមសហការគ្នាជាមួយសមត្ថកិច្ចវៀតណាម ទប់ស្កាត់ក្រុមឧទ្ទាមវាយប្រហារនៅវៀតណាមកាលពីពេលថ្មីនេះ ដែលអាចរត់ចូលមកកម្ពុជានោះ។ ការដាក់ចេញបទបញ្ជារបស់សម្ដេចតេជោនេះ ក្នុងឱកាសអញ្ជើញបន្តចុះជួបសំណេះសំណាល និងសួរសុខទុក្ខ ដល់បងប្អូនកម្មករ-កម្មការិនី ប្រមាណជិត២ម៉ឺននាក់ នៅរោងចក្រ ឡឺក្រោនស៊ូអ៊ិនដាសស្ត្រី (LECROWN SHOES INDUSTRY) ស្ថិតនៅភូមិរវៀង ឃុំខ្នុរដំបង ស្រុកជើងព្រៃ ខេត្តកំពង់ចាម នាព្រឹកថ្ងៃទី១៦ ខែមិថុនា ឆ្នាំ២០២៣។
សម្តេចតេជោ ហ៊ុន សែន បានលើកឡើងថា កាលពីថ្ងៃទី១១ ខែមិថុនា ឆ្នាំ២០២៣កន្លងមកនេះ មានការប្រយុទ្ធគ្នារវាពួកឧន្ទាមមួយក្រុម នៅក្នុងប្រទេសវៀតណាម។ ក្រុមនេះបានបើកការវាយលុកទៅលើសាលាឃុំចំនួនពីរ របស់វៀតណាមក្នុងពេលតែមួយ សម្លាប់មេឃុំ លេខាបក្សឃុំ ប៉ូលីស និងប្រជាពលរដ្ឋ ដោយប្រដាប់អាវុធ។ សម្ដេចតេជោបន្តទៀតថា ឥឡូវក្រុមនេះ កំពុងបាក់ទ័ព ហើយសម្ដេចកំពុងតែបារម្ភថា ពួកនេះ នឹងអាចចូលទឹកដីកម្ពុជា។ ដូច្នេះ សម្ដេចតេជោបានចេញបទបញ្ជាជាចំហ សម្រាប់កងកម្លាំងប្រដាប់អាវុធ ជាកងទ័ពក្ដី ជានគរបាលក្ដី នៅទិសយោធភូមិភាគទី១ និងនៅខេត្តរតនគិរី មណ្ឌលគិរី ហើយអាចរួមនឹងខេត្តក្រចេះ បង្កើនការយកចិត្តទុកដាក់សហការជាមួយភាគីវៀតណាម ដើម្បីទប់ស្កាត់ការឆ្លងដែនខុសច្បាប់ចូលមកក្នុងកម្ពុជា។
សម្ដេចតេជោថ្លែងថា សម្ដេចកំពុងដាក់ការសង្ស័យថា មេរបស់វាកំពុងស្ថិតនៅក្នុងទឹកដីកម្ពុជា ព្រោះមេរបស់វាមិនអាចមកពីខាងទឹកដីចិន ឬនៅក្នុងទឹកដីវៀតណាមទេ ហើយក៏មិនអាចនៅក្នុងទឹកដីថៃនោះដែរ។ នេះជាអង្គការចាត់តាំងមួយ ដែលមានការចាត់តាំងច្បាស់លាស់។ សម្ដេចតេជោគូសបញ្ជាក់ថា៖ «ផ្នែកសន្តិសុខជាតិ ត្រូវយកចិត្តទុកដាក់ត្រួតពិនិត្យមើលឱ្យបានច្បាស់ ព្រោះយើងមានបទពិសោធន៍ហើយ ទៅលើពួកម៉ុងតាញ៉ានេះ ដែលបានធ្វើដំណើរចេញពីប្រទេសវៀតណាម តម្រង់ឆ្ពោះមកកាន់អង្គការ HCR នៅទីក្រុងភ្នំពេញតែម្ដង។ អីចឹង ផែនការរបស់គេ បើវ៉ៃបានចូលកាន់កាប់ បើវ៉ៃមិនបានរត់ចូលមកកម្ពុជា ហើយមាន HCR ចូលរួមជួយតែម្ដង។ អីចឹង បណ្ដាញពិតប្រាកដរបស់វា នៅក្នុងទឹកដីកម្ពុជា»។ សម្ដេចតេជោនាយករដ្ឋមន្រ្ដីបានសម្ដែងនូវកង្វល់ថា ពួកនេះនឹងអាចមកជ្រកក្រោមផ្លាក HCR នៅទីក្រុងភ្នំពេញ ហើយសម្ដេចតេជោបានព្រមានទុកជាមុន នៃអង្គការអន្តរជាតិ ឬ ពួកអន្តរជាតិ ឬក៏ជនជាតិខ្មែរណាក៏ដោយ ដែលឃុបឃិតនាំមនុស្សនេះចូលមកទីក្រុងភ្នំពេញ ហើយយើងមិនអនុញ្ញាតដាច់ខាត ជាមួយនឹងការជ្រកកោននៃពួកក្រុមបាក់ទ័ព ដែលរត់ឆ្លងដែនពីវៀតណាមមកកាន់កម្ពុជា។ សម្ដេចតេជោប្រកាសថា ត្រូវតែចាប់ប្រគល់ឱ្យវៀតណាមវិញភ្លាមៗ បើទោះបីជាមកដល់កន្លែង HCR ហើយក៏ដោយ អត់មានសិទ្ធិធ្វើជាអ្នកជ្រកកោនខាងនយោបាយរង់ចាំទៅប្រទេសទី៣នោះទេ។
សម្ដេចតេជោបានថ្លែងបញ្ជាក់ថា កម្ពុជាមានកិច្ចព្រមព្រៀងជាមួយគ្នាច្បាស់លាស់ជាមួយប្រទេសជិតខាង គឺមិនអនុញ្ញាតឱ្យប្រើប្រាស់ទឹកដីរបស់ខ្លួន ប្រឆាំងជាមួយនឹងប្រទេសមួយផ្សេងទៀត។ សម្ដេចតេជោបានចេញបញ្ជាឱ្យខេត្តរតនគិរី មណ្ឌលគិរី ត្រួតពិនិត្យនៅតាមភូមិឱ្យបានជាក់លាក់ ហើយត្រូវធ្វើរឿងនេះឱ្យច្បាស់លាស់ ហើយសម្ដេចជឿថា បណ្ដាញរបស់ពួកឧន្ទាមនេះវាចេញពីកម្ពុជា ដែលផ្គត់ផ្គង់សេវាកម្មចូលទៅក្នុងប្រទេសវៀតណាម។ សម្ដេចតេជោថ្លែងសង្កត់ធ្ងន់ថា៖ «រឿងនេះវាជាស្ថានភាពធ្ង់ធ្ងរ ដែលសម្ដេចបញ្ជាដាច់ខាត គឺមិនមានការលើកលែងនោះទេ ហើយសូមឱ្យអង្គការអន្តរជាតិទាំងអស់ រាប់ទាំងភ្នាក់ងារអង្គការសហប្រជាជាតិ នេះមិនមែនជាបញ្ហាការស្វែរកសិទ្ធិជ្រកកោនខាងនយោបាយ ឬស្វែងរកជីវភាពសេដ្ឋកិច្ចខ្ពស់ជាងនោះទេ។ ប៉ុន្តែនេះជាប្រភទនៃអំពើភេរវកម្ម ឬក៏ជាប្រភេទដែលគេហៅថា បង្កអសន្តិសុខមហន្តរាយទៅដល់ជីវិតមនុស្ស និងទ្រព្យសម្បត្តិរបស់ជនជាតិវៀតណាម»។ សម្ដេចតេជោថ្លែងបន្ថែមទៀតថា សម្ដេចមានការទទួលខុសត្រូវមួយ ដោយយល់ច្បាស់ថា រឿងដែលកើតនៅក្នុងទឹកដីវៀតណាម មានបណ្ដាញចេញពីកម្ពុជាជាក់លាក់។ ដូច្នេះត្រូវសហការជាមួយភាគីវៀតណាម ប៉ុន្តែអ្វីដែលយើងធ្វើបានគឺនៅក្នុងទឹកដីរបស់យើង។ សម្ដេចតេជោលើកឡើងថា «កុំនាំគ្រាប់បែកមកដាក់ក្នុងផ្ទះកម្ពុជា»។ ដូច្នេះខេត្តរតនគិរី មណ្ឌលគិរី ត្រូវតែពិនិត្យមើលតាមភូមិនានាឱ្យបានច្បាស់លាស់ ហើយត្រូវរឹតបន្តឹងនៅខេត្តក្រចេះ និងខេត្តត្បូងឃ្មុំ ព្រមទាំងខេត្តកំពងង់ចាមផងដែរ។ សម្ដេចតេជោគូសបញ្ជាក់ឱ្យដឹងទៀតថា នេះជាការចេញបញ្ជាដោយចំហនៅថ្ងៃនេះ ដើម្បីយើងត្រួតត្រាសភាពការណ៍នៅក្នុងប្រទេសរបស់យើង ហើយកុំឱ្យប្រទេសរបស់យើង ក្លាយទៅជាកន្លែងឆ្លងកាត់ និងមូលដ្ឋានផ្គត់ផ្គង់ភស្តុភារទៅឱ្យកម្លាំងប្រដាប់អាវុធប្រឆាំងនៅក្នុងប្រទេសវៀតណាម។ សម្ដេចតេជោ ក៏បានព្រមានចំពោះអង្គការអន្តរជាតិនានា ដែលធ្វើសកម្មភាពក្នុងទឹកដីកម្ពុជា ត្រូវគេចចេញពីឧក្រិដ្ឋកម្មដែលពួកនេះបានធ្វើ បើសិនជាពួកអ្នកឯងទទួល គឺស្មើនឹងឧក្រិដ្ឋកម្មលើប្រជាជនវៀតណាម ហើយយើងអាចនឹងបិទនូវការិយាល័យអ្នកទាំងអស់នេះនៅទីក្រុងភ្នំពេញ ដោយសារបំពានទៅលើអ្វីដែលជាក្រឹត្យក្រមធម្មតានៃទំនាក់ទំនងរវាងរដ្ឋ ជាមួយនឹងអង្គការអន្តរជាតិនានា។
សម្ដេចតេជោ ហ៊ុន សែន បានអះអាងថា៖ «កម្ពុជា មិនមែនធ្វើនេះតម្រូវចិត្តវៀតណាមទេ ព្រោះបាននិយាយគ្នាហើយថាប្រទេសទាំងអស់ គឺគោលការណ៍មិនជ្រៀតជ្រែកគ្នា មិនប្រើទឹកដីរបស់ខ្លួនប្រឆាំងនឹងប្រទេសដទៃ ដូច្នេះគឺត្រូវតែធ្វើ»។
គួរម្លឹកដែរថា សារព័ត៌មាន AFP បានចុះផ្សាយថា មានការវាយប្រហារទៅលើទីស្នាក់ការប៉ូលីសឃុំចំនួនពីរ គឺឃុំ Ea Tieu និង Ea Ktur នៃស្រុក Cu Kuin ខេត្ត Dak Lak នៅក្នុងប្រទេសវៀតណាម បានកើតឡើងនៅព្រឹកព្រលឹមថ្ងៃអាទិត្យទី១១ ខែមិថុនា ឆ្នាំ២០២៣ បណ្តាលឱ្យមនុស្សជាច្រើននាក់រួមទាំងប៉ូលីស មន្ត្រីមូលដ្ឋាន និងជនស៊ីវិល ត្រូវបានសម្លាប់ និងរងរបួស៕ដោយ៖ ជឹម ណារី
