ឯកឧត្តម ម៉ែន អេង ជំរុញឲ្យមន្ត្រីអនុរក្សមណ្ឌលប្រឡងត្រូវពង្រឹងភារកិច្ចរបស់ខ្លួនដើម្បីឲ្យការប្រឡងជ្រើសមន្ត្រីក្របខណ្ឌនៅពេលខាងមុខមានភាពសុក្រិតនិងទទួលយកបាន
(ខេត្តស្វាយរៀង): ឯកឧត្តម ម៉ែន អេង អភិបាលរងខេត្តស្វាយរៀង តំណាងឯកឧត្តមអភិបាលខេត្ត នៅថ្ងៃទី ១៨ ខែឧសភា ឆ្នាំ២០២៣ បានធ្វើការជំរុញឲ្យមន្ត្រីអនុរក្សមណ្ឌលប្រឡងនាពេលខាងមុខនេះត្រូវពង្រឹងភារកិច្ចរបស់ខ្លួនដើម្បីឲ្យការប្រឡងជ្រើសមន្ត្រីក្របខណ្ឌនៅពេលខាងមុខ ឲ្យមានភាពសុក្រិតមានតម្លាភាពនិងទទួលយកបាន។
ឯកឧត្តមអភិបាលរងខេត្ត បានមានប្រសាសន៍ដូច្នេះក្នុងឱកាសដែលឯកឧត្តមបានអញ្ជើញជាអធិបតីនៅក្នុងកិច្ចប្រជុំទៅលើសេចក្តីសម្រេចស្ដីអំពីការបង្កើតអនុគណៈកម្មការមេប្រយោគ. អនុគណៈកម្មការកណ្ដាល. អនុគណៈកម្មការអនុរក្ស. អនុគណ:កម្មការអប្បមាទនិងអនុគណៈកម្មការសន្តិសុខនៃគណៈកម្មការរៀបចំការប្រឡងប្រជែងជ្រើសរើសបេក្ខជនឲ្យចូលបម្រើការងារក្នុងក្របខណ្ឌរដ្ឋបាលក្រុងបាវិតខេត្តស្វាយរៀងសម្រាប់ឆ្នាំ ២០២៣ដែលបានប្រព្រឹត្តទៅនៅសាលប្រជុំសាលាខេត្តស្វាយរៀង។
ឯកឧត្តមអភិបាលរងខេត្តបានមានប្រសាសន៍បន្តថា:សម្រាប់ឆ្នាំ២០២៣នេះ ការប្រឡងជ្រើសរើសឲ្យចូលក្របខ័ណ្ឌមន្ត្រីបម្រើការងារនៅក្រុងបាវិតមានចំនួនពីរនាក់ហើយក្នុងនោះក៏មានជាប់បម្រុងពីរនាក់ផងដែរដោយមានបេក្ខជនចូលរួមប្រលងចំនួន ៣ បន្ទប់ដែលនឹងប្រព្រឹត្តទៅនៅវិទ្យាល័យស្វាយរៀងមានរយៈពេល ២ ម៉ោង។ ចំពោះលក្ខខណ្ឌនៃការប្រឡងបេក្ខជនត្រូវចេះភាសាអង់គ្លេសហើយនិងសំណួរ QGM ទូទៅ សំណួរពាក់ព័ន្ធទៅនឹងរដ្ឋបាលសាធារណៈជាដើម។
ឯកឧត្តមអភិបាលរងខេត្តបានមានប្រសាសន៍បន្ថែមទៀតថា: បាវិតគឺជាក្រុងប៉ូលមួយដែលរកចំណូលសេដ្ឋកិច្ចឲ្យរាជរដ្ឋាភិបាលបានច្រើនដូច្នេះត្រូវរៀបចំដោយឆន្ទៈយុត្តិធម៌មន្ត្រីត្រូវមានចំណេះដឹងពិតប្រាកដហេតុដូច្នេះហើយការប្រឡងនាពេលខាងមុខនេះគ្រប់អនុគណៈកម្មការដែលបានរៀបចំរួចត្រូវខិតខំប្រឹងប្រែងឲ្យអស់ពីលទ្ធភាពនិងសមត្ថភាពដើម្បីឲ្យមានភាពយុត្តិធម៌អ្នកចេះគឺជាប់ដើម្បីកុំឲ្យមានពាក្យចរចាមអារាមថាអ្នកនេះជាខ្សែអ្នកនោះធ្វើឲ្យមានការថ្នាំងថ្នាក់ពីមជ្ឈដ្ឋានផ្សេងៗជាហេតុធ្វើឲ្យប៉ះពាល់ដល់ថ្នាក់ដឹកនាំ។ បញ្ហាចម្បងរបស់អនុគណៈកម្មការនីមួយៗត្រូវដកហូតទូរសព្ទទាំងអស់ទាំងបេក្ខជននិងអនុរក្ស មិនអនុញ្ញាតឲ្យប្រើប្រាស់នាពេលកំពុងប្រឡងនោះឡើយ។ ក្រៅពីនេះក៏ត្រូវត្រៀមរថយន្តសង្គ្រោះបន្ទាន់ផងដែរដើម្បីជួយសង្គ្រោះនៅពេលមានករណីចាំបាច់កើតឡើងជាយថាហេតុ៕ ដោយ:PK
