កំពត ៖ ជាការពិតណាស់ការចូលរួមចំណែកនិងការអភិវឌ្ឍជំនាញបាល់ទាត់ដល់កុមារកម្ពុជានឹងបានជម្រុញលើកកម្ពស់វិស័យកីឡាកាន់តែមានភាពរីកចម្រើន។យ៉ាងណាមិញ ក្រុមហ៊ុន អេសស៊ីជី(SCG) ដែលជាសាជីវកម្មឈានមុខមួយនៅក្នុងតំបន់អាស៊ាន ដែលផ្គត់ផ្គង់សម្ភារៈសំណង់គ្រប់ប្រភេទនៅប្រទេសកម្ពុជា បាននាំគ្រូបង្វឹកជំនាញៗដើម្បីបើកវគ្គហ្វឹកហាត់បាល់ទាត់ដល់កុមារដែលជាក្រុមយុវជនជំនាន់ក្រោយ ស្ថិតក្នុងរោងចក្រកំពតស៊ីម៉ង់ត៍ ខូ អិលធីឌី ស្ថិតក្នុងស្រុកបន្ទាយមាស ខេត្តកំពត នារសៀលថ្ងៃទី២៧ខែកញ្ញា ឆ្នាំ២០១៧ ដោយមានកុមារនិងយុវជន ចូលរួមជាង២០០នាក់។
លោក Praramate Pimpaboote ប្រធានរោងចក្រកំពតស៊ីម៉ង់ត៍ ខូ អិលធីឌី បានឲ្យដឹងថា ក្រុមហ៊ុន SCG ជាសាជីវកម្មឈានមុខគេក្នុងតំបន់អាស៊ាន ដែលផ្គត់ផ្គង់សម្ភារៈសំណង់ជាច្រើនប្រភេទ ដូចជា ស៊ីម៉ង់ត៍ អេសស៊ីជី ស្មាតបត អេស៊ីជី ស្មាតវូត អេសស៊ីជី បេតុងលាយស្រេច អេសស៊ីជីទុយោ អេស៊ីជី និងស៊ីម៉ង់ត៍ ខេ ស៊ីមេន តែងតែចូលរួមចំណែក ការអភិវឌ្ឍន៍ ធនធានមនុស្ស តាមរយៈកីឡា ក៏ដូចជាជួយលើកកម្ពស់ការរស់នៅរបស់ប្រជាពលរដ្ឋក្នុងសហគមន៍ឲ្យកាន់តែប្រសើរឡើង។
លោកបានបញ្ជាក់យ៉ាងដូច្នោះថា តាមរយៈកម្មវិធីហ្វឹកហាត់បាល់ទាត់ Kick & Share by SCG យើងសង្ឃឹមថាកុមារនៅកម្ពុជានឹងប្រើប្រាស់ពេលវេលារបស់ពួកគេ ទៅលើសកម្មភាពដែលមានប្រយោជន៍ ដូចជាការលេងកីឡាជាដើម ក្នុងគោលបំណងអភិវឌ្ឍជំនាញទំនាក់ទំនងសង្គម ពិសេសជំនាញកីឡារបស់ខ្លួនជាមួយមិត្តភក្តិ ហើយកុមារមួយចំនួននោះអាចក្លាយជាតារាបាល់ទាត់របស់កម្ពុជាទៅថ្ងៃអនាគតផងដែរ។ហើយនេះក៏ជាផ្នែកមួយនៃដំណើរការអាជីវកម្មរបស់យើងនិងជាគម្រោងមួយក្នុងចំណោមគម្រោងទំនួលខុសត្រូវសង្គម ជាច្រើនទៀត។
តាមរយៈគំនិតផ្តួចផ្តើម និងតាមរយៈភាពជាដៃគូជាមួយក្លឹបបាល់ទាត់ភ្នំពេញ ក្រោន ក្រុមហ៊ុន អេសស៊ីជី(SCG)បានផ្តល់វគ្គហ្វឹកហាត់បាល់ទាត់ ដោយមានការចូលរួមពីគ្រូបង្វឹកកំពូលៗមកពីក្លឹបបាល់ទាត់ភ្នំពេញក្រោន សម្រាប់កុមារជាង២០០នាក់ ក្នុងស្រុកបន្ទាយមាស ខេត្តកំពត។ក្នុងនោះថ្នាក់គ្រប់គ្រងនិងបុគ្គលិករបស់ក្រុមហ៊ុន អេសស៊ីជី ក៏បានចូលរួមដើម្បីសម្រូលការហ្វឹកហាត់ឲ្យបានកាន់តែប្រសើរ ថែមទាំងបានចែកនូវសម្ភារៈកីឡាដល់ក្រុមកុមារ សម្រាប់ហ្វឹកហាត់នៅវគ្គក្រោយទៀត ហើយលើកនេះកម្មវិធី Kick & Share by SCG ក៏ត្រូវបានបើកឲ្យកុមារដែលជាកូន ចៅ ម្ចាស់ដេប៉ូរបស់ក្រុមហ៊ុន អេសស៊ីជី បានចូលរួមផងដែរ។
ចំពោះកម្មវិធីហ្វឹកហាត់បាល់ទាត់”Kick,& Share by SCG នៅកម្ពុជាបានផ្តួចផ្តើមដំបូង កាលពីឆ្នាំ២០១៦ ខណៈកំពូលក្លឹបកីឡាបាល់ទាត់ថៃ SCG Muangthong United បានមកប្រកួតកីឡាបាល់ទាត់មិត្តភាពជាមួយក្រុមបាល់ទាត់ All Star កម្ពុជានៅទីក្រុងភ្នំពេញ និងបានចំណាយពេលវេលាដ៏មមាញឹករបស់ពួកគេ ដើម្បីជួយបង្វឹកដល់កុមារកម្ពុជា។ចាប់ពីពេលនោះមក កម្មវិធី”Kick & Share by SCG”ត្រូវបានរៀបចំឡើងជាបន្តបន្ទាប់ ហើយក្នុងខែសីហាក្នុងឆ្នាំនេះ ក្រុមហ៊ុន អេសស៊ីជី ក៏បានរៀបចំកម្មវិធីហ្វឹកហាត់បាល់ទាត់បែបនេះ និងបានឧត្ថម្ភសម្ភារៈកីឡាដល់កុមារជាង១០០នាក់ នៅឯខេត្តស្វាយរៀងថែមទៀតផង។
សូមបញ្ជាក់ថា ក្រុមហ៊ុន អេសស៊ីជី គឺជាសាជីវកម្មឈានមុខគេមួយនៅតំបន់អាស៊ាន ដែលមានអាជីវកម្មស្នូលចំនួនបី គឺស៊ីម៉ង់ត៍ និងសម្ភារៈសំណង់ ឧស្សាហកម្មសារធាតុគីមី និងឧស្សាហកម្មក្រដាស។ជាមួយនឹងក្រុមហ៊ុនបុត្រសម្ព័ន្ធជាង២០០នៅក្រោមឆ័ត្ររបស់ខ្លួននិងនិយោជិតប្រមាណ៥៧.០០០នាក់នៅទូទាំងតំបន់អាស៊ាន ក្រុមហ៊ុន អេសស៊ីជី បង្កើតនិងចែកចាយផលិតផលនិងសេវាកម្មមានគុណភាព ផលិតតាមស្តង់ដារបច្ចេកទេស ស្របតាមតម្រូវការបច្ចុប្បន្ន និងពេលអនាគតសម្រាប់អតិថិជនគ្រប់ស្រទាប់។ក្រុមហ៊ុន អេសស៊ីជី មានវត្តមាននៅកម្ពុជាជាង២០ឆ្នាំមកហើយ ដែលរួមបញ្ចូលក្រុមហ៊ុនចំនួន៧ គឺក្រុមហ៊ុន កំពតស៊ីម៉ង់ត៍ ខូ អិលធីឌី ក្រុមហ៊ុន អេសស៊ីជី ខនគ្រីត រូហ្វ ខូអិលធីឌី ក្រុមហ៊ុន ស៊ីផេក ខេមបូឌា ខូអិលធីឌី ក្រុមហ៊ុន ស៊ីផេក Plank(ខេមបូឌា) ខូអិលធីឌី ក្រុមហ៊ុន ណារ៉ាផ្លាស្ទិក ខូអិលធីឌី ក្រុមហ៊ុន អេសស៊ីជី ត្រេឌីង (ខេមបូឌា) និងក្រុមហ៊ុន អេសស៊ីជី ឡូជីស្ទិក ខេមបូឌា ខូអិលធីឌី។ផលិតផលរបស់ក្រុមហ៊ុន អេសស៊ីជី រួមមាន៖សម្ភារៈសំណង់ជាច្រើនប្រភេទទៅតាមតម្រូវការ សម្រាប់ការសាងសង់គេហដ្ឋាន និងអគារផ្សេងៗ ដូចជា ស៊ីម៉ង់ត៍ អេសស៊ីជី ស្មាតបត អេសស៊ីជី ស្មាតវូត អេសស៊ីជី បេតុងលាយស្រេច អេសស៊ីជី ទុយោ អេសស៊ីជី និងស៊ីម៉ង់ត៍ ខេ ស៊ីមេន(K-Cement)។/ ណារិទ្ធ
