កែប ៖ ទិវាទេសចរណ៍ពិភពលោក ឆ្នាំ២០១៧ ក្រោមប្រធានបទ”និរន្តរភាពទេសចរណ៍ ជាយន្តការសម្រាប់ការអភិវឌ្ឍន៍ ត្រូវបានធ្វើឡើងនៅឯរីសត ថ្ងៃបាំងឆ័ត្រ នាព្រឹកថ្ងៃទី២៧ខែកញ្ញា ឆ្នាំ២០១៧នេះ ក្រោមវត្តមានដ៏ខ្ពង់ខ្ពស់ លោកថោង ខុន រដ្ឋមន្ត្រីក្រសួងទេសចរណ៍ ហែរហមដោយសហការីជាច្រើនរូប។ធិធីនេះក៏មានការអញ្ជើញចូលរួមពីសំណាក់ លោកកែន សត្ថា អភិបាលនៃគណៈអភិបាលខេត្តកែប លោក លោកស្រីជាអភិបាលរងខេត្ត ប្រធាន អនុប្រធាន មន្ទីរអង្គភាពពាក់ព័ន្ធនានា អាជ្ញាធរដែនដីគ្រប់ស្រទាប់ រួមទាំងក្រុមអាជីរករផងដែរ។
ជាកិច្ចចាប់ផ្តើមកម្មវិធី លោកកែន សត្ថា អភិបាលខេត្តកែប បានឲ្យដឹងថា ការប្រារព្វពិវាទេសចរណ៍ពិភពលោក ក្នុងគោលបំណងទាក់ទាញ នូវផ្នត់គំនិតយើងទាំងអស់គ្នា បង្វែមកស្រលាញ់ធនធានធម្មជាតិ និងថែរក្សាបរិស្ថានធម្មជាតិឲ្យកាន់តែផុលផុស។លោកថា ការយល់ដឹងពីបរិស្ថានគឺជាជ្រុងមួយយ៉ាងសំខាន់សម្រាប់ជម្រុញលើកកម្ពស់វិស័យទេសចរណ៍និងជាយន្តការក្នុងការអភិវឌ្ឍន៍តំបន់ទេសចរណ៍ប្រកបដោយភាពរីកចម្រើន។ជាមួយនេះ ដើម្បីឆ្លើយតបនឹងតម្រូវការចាំបាច់ផ្សេងៗ ទិសដៅចម្បងរបស់រដ្ឋបាលខេត្តនឹងជម្រុញឲ្យគ្រប់ស្ថាប័នត្រូវតែអនុវត្តឲ្យបានខ្លាំងក្លា លើផ្នែកបរិស្ថានដែលជាកត្តាដ៏សំខាន់។លោកបានសង្កត់ធ្ងន់ទៀតថា ក្នុងអំឡុងពេលនេះ ខេត្តកែបត្រូវបានជាប់ឈ្មោះជាផ្ការំដួលបីទង របស់រាជរដ្ឋាភិបាលកម្ពុជា ថែមទាំងជាប់ឈ្មោះជាទីក្រុងនិរន្តរភាពបរិស្ថានអាស៊ាន លើសូចនាករចំនួនបី គឺដីស្អាត(Clean Land)ទឹកស្អាត(Clean Water)និងខ្យល់ស្អាត(Clean Air)ផងដែរ ដែលទើបតែទទួលបានពានរង្វាន់ នៅប្រទេសប្រ៊ុយណេ កាលពីថ្ងៃទី១២ខែកញ្ញា ឆ្នាំ២០១៧កន្លងទៅនេះ។
ក្នុងឱកាសនោះ លោក ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ដោយលើកយកខ្លឹមសារនៃសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានខ្លឹមសារថា ទិវាទេសចរណ៍ពិភពលោក ជាព្រឹត្តិការណ៍ដ៏សំខាន់សម្រាប់ជម្រុញភាគីពាក់ព័ន្ធនានារួមមាន៖ ផ្នែកសាធារណៈ ផ្នែកឯកជន ដៃគូអភិវឌ្ឍន៍ អង្គការ ប្រជាពលរដ្ឋ និងទេសចរណ៍ ឲ្យកាន់តែយល់ច្បាស់អំពីតួនាទីនិងអត្ថប្រយោជន៍នៃវិស័យទេសចរណ៍ក្នុងការអភិវឌ្ឍសេដ្ឋកិច្ចសង្គមនិងបរិស្ថាន។លោកបន្តថា រាជរដ្ឋាភិបាលនិងប្រជាពលរដ្ឋកម្ពុជា មានសេចក្តីរីករាយក្នុងការចូលរួមប្រារព្វ ទិវាទេសចរណ៍ពិភពលោកឆ្នាំ២០១៧ ជាមួយពិភពលោកទាំងមូល ហើយនេះក៏ដើម្បីអបអរសាទរចំពោះសមិទ្ធផលទេសចរណ៍កម្ពុជា និងលើកទឹកចិត្តគ្រប់ភាគីពាក់ព័ន្ធ បន្តគាំទ្រការអភិវឌ្ឍប្រទេសកម្ពុជា សំដៅសម្រេចគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិនៅឆ្នាំ២០៣០។
ជាក់ស្តែង ទិវាទេសចរណ៍ឆ្នាំ២០១៧ ក្នុងឆ្នាំនេះ នឹងប្រារព្វឡើងអមជាមួយនឹងឆ្នាំអន្តរជាតិ២០១៧នៃការអភិវឌ្ឍន៍ទេសចរណ៍ប្រកបដោយនិរន្តរភាព(2017) International Year of Sustainable Tourism for Development។ទវានេះនឹងនឹងរៀបចំឡើងក្នុងគោលបំណងស្វែងរកការចូលរួមរបស់វិស័យទេសចរណ៍នៅក្នុងគោលដៅអភិវឌ្ឍប្រកបដោយនិរន្តរភាព (Sustainable Development Goals)។ ដោយឈរលើគោលការណ៍នៃការ”មិនទុកបុគ្គលណាម្នាក់នៅពីក្រោយ-Leaving no one behind”វិស័យទេសចរណ៍ត្រូវបានគេរួមបញ្ចូលជាវិស័យអទិភាពមួយនៅក្នុងចំណោមគោលដៅទាំង១៧ចំណុចនៃការអភិវឌ្ឍប្រកបដោយនិរន្តរភាព (Sustainable Development)។ហេតុនេះ វិស័យទេសចរណ៍ទាមទារចាំបាច់ឲ្យមានការចូលរួមពីគ្រប់ភាគីទាំងអស់ នៅក្នុងការអភិវឌ្ឍប្រកបដោយទំនួលខុសត្រូវខ្ពស់បំផុត ដោយបច្ចប្បន្នទេសចរណ៍គឺជាឧស្សាហកម្មនាំចេញធំជាងគេបំផុត ទីបីនៅក្នុងពិភពលោកបន្ទាប់ពីឧស្សាហកម្មគីមី និងប្រេង។/
ណារិទ្ធ
