ក្រចេះ ៖ ពលរដ្ឋនៅស្រុកស្នួល ខេត្តក្រចេះ នៅតែបន្តកើតឡើងថា មានលោកឧកញ៉ាម្នាក់នៅតែបន្តការដឹកជញ្ជូនឈើ សុក្រំ កកោះ និងឈើប្រណីតប្រភេទឈើធ្នង់ ចេញពីតំបន់ស្តារបាតអាងនៅស្រុកសេសាន ខេត្តស្ទឹងត្រែង តាមរថយន្តជាច្រើនគ្រឿង ដោយធ្វើចរាចរតាមកំណាត់ផ្លូវជាតិលេខ ៧ សំដៅមកកាន់ច្រកទ្វារព្រំដែនអន្តរជាតិ-វៀតណាម ត្រពាំងស្រែ ស្រុកស្នួល ខេត្តក្រចេះ យកទៅលក់នៅលើទីផ្សារក្នុងប្រទេសវៀតណាមជារៀងរាល់ថ្ងៃ ដោយពុំមានពេលល្ហែនោះឡើយ ។
ប្រជាពលរដ្ឋនៅស្រុកស្នួលបានបន្តទៀតថា លោ់កឧកញ៉ា ដែលកំពុងតែដឹកជញ្ជូនឈើប្រណីតគេចពន្ធទៅលក់នៅ លើទីផ្សារក្នុងប្រទេសវៀតណាមជារៀងរាល់ដោយធ្វើចរាចរឆ្លងកាត់តាមច្រកទ្វារព្រំដែនបានយ៉ាងរលូននោះ ដែលផ្ទុយពីបទ បញ្ជារបស់ប្រមុខរាជរដ្ឋាភិបាលដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយុករដ្ឋមន្ត្រីនៃព្រះរាជាណាចក្រកម្ពុជា តែយ៉ាងណាក៏ដោយក៏សមត្ថកិច្ចជំនាញ និងលោក នាង វណ្ណា ដែលជាមេគយប្រចាំការនៅច្រកទ្វារព្រំដែននៃតំបន់នោះ មិនរវល់អើពើចាត់វិធានការបង្ក្រាបនោះដែរ ។
ប្រភពបានបន្តទៀតថា បើតាមសង្កេតឃើញអំពីសកម្មភាពនៃការដឹកជញ្ជូនឈើប្រណីតគេចពន្ធឆ្លងកាត់តាមតំបន់ នោះ តាមរថយន្តយីឌុបរាប់សិបគ្រឿងជារៀងរាល់ថ្ងៃនេះ ប្រកបទៅដោយសភាពយ៉ាងរលូនយ៉ាងដូច្នេះបាននោះ គឺប្រហែល សមត្ថកិច្ចជំនាញ និងអស់លោកគយដែលប្រចាំការ នៅច្រកទ្វារព្រំដែននៅស្រុកស្នួល ខេត្តក្រចេះ សព្វថ្ងៃនេះបានទទួលនូវ សំណូកសូកប៉ាន់ពីឈ្មួញដូរឈើប្រណីតរូបនោះ ដោយពួកគេបានឃុបឃិតគ្នាជាលក្ខណៈប្រព័ន្ធអស់បាត់ហើយ មើលទៅនោះ បានជាសមត្ថកិច្ចជំនាញនៅតាមស្ថាប័នពាក់ព័ន្ធនោះ នៅសម្ងំយ៉ាងស្ងៀមធ្វើជាមិនដឹងមិនឮយ៉ាងដូច្នោះ ។
ប្រភពដដែលបានបន្តទៀតថា លោកឧកញ៉ាជ័យ និងបក្ខពួកមួយក្តាប់តូចទៀត ដើរបោះពាក្យសម្តីដោយឌឺដងមក កាន់ប្រជាពលរដ្ឋយ៉ាងខែងរ៉ែងថា គ្មានអ្នកណាម្នាក់ហ៊ានចេញមុខមកចាប់ទីតាំងស្តុកឈើ និងរថយន្តដឹកឈើប្រណីតរបស់ពួកគេយកទៅលក់នៅលើទីផ្សារក្នុងប្រទេសវៀតណាមនោះឡើយ ពីព្រោះពួកគេមាន ខ្នងបង្អែកក្រាស់ណាស់ នៅពីក្រោយការប្រកបមុខរបររកស៊ីឈើឆ្លងដែនរបស់ពួកគេសព្វថ្ងៃនេះ ។
ជុំវិញបញ្ហាខាងលើនេះ សារព័ត៌មានយើងពុំអាចសុំការបំភ្លឺពីលោកឧកញ៉ា ជ័យ បាននៅឡើយទេ ៕
