លោក ឆាំង សុង អតីតរដ្ឋមន្រ្តីក្រសួងព័ត៌មានសម័យ លន់ នល់ ទទួលមរណភាពក្នុងវ័យ ៨៤ ឆ្នាំ
លោក ឆាំង សុង អតីតរដ្ឋមន្ត្រីក្រសួងព័ត៌មានក្នុងរបបសាធារណរដ្ឋខ្មែរ ដែលដឹកនាំដោយលោក លន់ នល់ (១៩៧០-១៩៧៥) បានទទួលមរណភាពហើយកាលពីថ្ងៃសៅរ៍ នៅសហរដ្ឋអាមេរិក ក្នុងជន្មាយុ ៨៤ឆ្នាំ។
ដំណឹងនេះត្រូវបានប្រកាសកាលពីម្សិលមិញដោយភរិយារបស់លោកគឺ លោកស្រី ស៊ុំ សារុម នៅលើគណនីហ្វេសប៊ុកផ្លូវការរបស់លោក ហើយក្រោយមកត្រូវបានបញ្ជាក់ដោយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ។
ភរិយារបស់លោក លោក ឆាំង សុង និយាយថា លោកបានធ្វើមរណកាលដោយសារជរាពាធនៅម៉ោងប្រហែល ៣:០០ ព្រឹកថ្ងៃអាទិត្យនៅក្នុងមន្ទីរពេទ្យឡុងប៊ិចនៃរដ្ឋកាលីហ្វ័រញ៉ាដែលត្រូវនឹងម៉ោងប្រហែល
៥:០០ ល្ងាចថ្ងៃសៅរ៍នៅក្នុងប្រទេសកម្ពុជា។
មនុស្សរាប់ពាន់នាក់ដែលស្គាល់ និងគោរពរូបលោក បានសម្តែងការគោរព វិញ្ញាណក្ខ ន្ធលោក ឆាំង សុង នៅលើបណ្តាញសង្គម។
ខណៈពេលដែលសុខភាពរបស់លោកបានធ្លាក់ចុះខ្សោយក្នុងរយៈពេលប៉ុន្មានឆ្នាំចុងក្រោយ ដែលនាំឱ្យមានពាក្យចចាមអារ៉ាមអំពីការស្លាប់របស់គាត់ជាច្រើនដងរួចមកហើយ សុខភាពរបស់លោក ឆាំងសុង បានធ្លាក់ចូលទៅក្នុងស្ថានភាពធ្ងន់ធ្ងរនៅក្នុងខែមេសាឆ្នាំនេះ រហូតលោកត្រូវចូលបន្ទប់សង្គ្រោះបន្ទាន់ ។ ទោះជាយ៉ាងណាក៏ដោយ លោកបានរួចជីវិត ហើយបានសរសេរបញ្ចេញមតិ និងអារម្មណ៍របស់លោកនៅលើបណ្ដាញសង្គម។
លោកបានសរសេរលើហ្វេសបុកនៅថ្ងៃទី ១ ខែឧសភាឆ្នាំនេះ៖ «ការខ្សោះនៃសុខភាពរបស់ខ្ញុំក្នុងកំឡុងឆ្នាំមុនៗមិនត្រូវបានគេធ្វើរោគវិនិច្ឆ័យពេញលេញនោះទេ ប៉ុន្តែនៅក្នុងទម្រង់ចុងក្រោយរបស់វា គឺស្រួចស្រាវដែលខ្ញុំពិតជា “រស់នៅក្នុងសេចក្តីស្លាប់“ ជាមួយនឹងព្រឹត្តិការណ៍ដ៏មានឥទ្ធិពលបំផុតដែលខ្ញុំបានជួបប្រទះនៅក្នុងជីវិតពិតរបស់ខ្ញុំដែលខ្ញុំ មិនអាចពិពណ៌នាជាពាក្យពេចន៍បានទេ ខណៈដែលមិត្តភ័ក្តិ និងសមាជិកគ្រួសារដែលអង្គុយជុំវិញខ្លួនខ្ញុំនៅអង្គភាពសង្គ្រោះបន្ទាន់របស់មន្ទីរពេទ្យ ជឿថានៅពេលនោះខ្ញុំបានទទួលមរណភាពហើយ»។
ពីរខែមុនលោកទទួលមរណភាព លោក ឆាំង សុង នៅតែរក្សាទំនាក់ទំនងជាមួយមិត្តភ័ក្ដិ និងសាច់ញាតិរបស់លោកតាមបណ្ដាញសង្គមហ្វេសបុក។ សាចុងក្រោយរបស់គាត់គឺនៅថ្ងៃទី ៩ ខែមិថុនា។
លោកបានសរសេរនៅក្នុងការបង្ហោះរបស់លោកថា៖ «ចិត្តខ្ញុំស្រណុកក្នុងពេលកុំព្យូទ័រយួរដៃរបស់ខ្ញុំខូច»។
រដ្ឋមន្ត្រីក្រសួងព័ត៌មាន លោក ខៀវ កាញារិទ្ធ ដែលបានទទួលដំណឹងអាក្រក់កាលពីយប់ថ្ងៃអាទិត្យ បាននិយាយថា ការលាចាកលោករបស់លោក ឆាង សុង គឺជាការបាត់បង់ដ៏ធំធេងសម្រាប់ប្រទេសកម្ពុជា ជាពិសេសក្នុងវិស័យសារព័ត៌មាន។
លោកបានថ្លែងថា៖«ក្នុងនាមជាអ្នកសារព័ត៌មាន និងជាមន្ត្រីរដ្ឋាភិបាល លោក ឆាំង សុង ធ្លាប់ឆ្លងកាត់ជាច្រើនជំនាន់ ហើយការបាត់បង់រូបលោក គឺបាត់បង់នូវបណ្ណាល័យមួយ»។
លោកបន្តថា៖ « នៅក្រសួងព័ត៌មាន លោកគឺជាឥស្សរជនមួយរូបដែលបានផ្តល់ដំបូន្មានល្អៗជាច្រើនដល់ពួកយើង។ ខ្ញុំសោកស្តាយពេលដឹងថា លែងបានជួបលោកទៀតហើយ»។
កើតនៅខេត្តតាកែវក្នុងឆ្នាំ ១៩៣៩ លោក ឆាំង សុង បានទទួលការអប់រំនៅសហរដ្ឋអាមេរិក និងបានបញ្ចប់សញ្ញាបត្រកសិកម្មនៅសាកលវិទ្យាល័យរដ្ឋ Louisiana និងបានបង្រៀនអក្សរសាស្ត្របារាំង រយៈពេលខ្លីនៅសហរដ្ឋអាមេរិកមុនពេលត្រឡប់មកទីក្រុងភ្នំពេញវិញនៅចុងទសវត្សរ៍ឆ្នាំ ១៩៦០។
លោកបានធ្វើការក្នុងវិស័យសារព័ត៌មាន ហើយបានក្លាយជាមន្ត្រីព័ត៌មានក្នុងជួរកងទ័ពក្នុងឆ្នាំ ១៩៧០ ឡើងទៅជាអ្នកនាំពាក្យផ្លូវការក្នុងបញ្ជាការដ្ឋានជាន់ខ្ពស់។
នៅថ្ងៃទី ១៦ ខែមិថុនា ឆ្នាំ ១៩៧៤ លោកត្រូវបានតែងតាំងជារដ្ឋមន្ត្រីក្រសួងព័ត៌មាន។ នៅខែមីនា ឆ្នាំ១៩៧៥ លោកបានក្លាយជាលេខាធិការសារព័ត៌មានរបស់សេនាប្រមុខ លន់ នល់។
មិនយូរប៉ុន្មានមុនពេលជ័យជម្នះរបស់ខ្មែរក្រហមនៅថ្ងៃទី ១៧ ខែមេសា ឆ្នាំ ១៩៧៥ លោក ឆាំង សុង បានភៀសខ្លួនជាមួយសេនាប្រមុខ លន់ នល់ ទៅកោះហាវ៉ៃ។ លោកគឺជាមន្ត្រីកម្ពុជាតែម្នាក់គត់ដែលទៅជាមួយលោក លន់ នល់។
បន្ទាប់ពីឆ្នាំ ១៩៧៩ គាត់បានបង្កើតអង្គការ Save Cambodia Inc ដែលជាអង្គការមិនមែនរដ្ឋាភិបាលដែលមានមូលដ្ឋាននៅទីក្រុង Arlington រដ្ឋ Virginia ដែលជួយដល់ការតាំងទីលំនៅថ្មីរបស់ជនភៀសខ្លួនកម្ពុជានៅសហរដ្ឋអាមេរិក។ នៅឆ្នាំ ១៩៨៧ លោកទទួលបានសញ្ជាតិអាមេរិកជាផ្លូវការ។
លោកបានត្រឡប់មកភ្នំពេញវិញនៅឆ្នាំ ១៩៩៥។ នៅឆ្នាំបន្ទាប់ គាត់បានធ្វើជាទីប្រឹក្សាផ្ទាល់របស់ប្រធានគណបក្សប្រជាជនកម្ពុជា ជា ស៊ីម ហើយបានក្លាយជាសមាជិកព្រឹទ្ធសភានៅឆ្នាំ ១៩៩៩ របស់គណបក្សប្រជាជនកម្ពុជា៕
