លោកស្រី ហ៊ុន ម៉ាណា ដឹកនាំក្រុមគ្រូពេទ្យស្ម័គ្រចិត្ត ចុះព្យាបាលជំងឺជូនប្រជាពលរដ្ឋនៅខេត្តព្រះវិហារ និងប្រគល់អំណោយផ្ទះទេវតា ២ខ្នង, ប្រគេនទេយ្យវត្ថុដល់វត្តចំនួន៥ ក្នុងខេត្តស្វាយរៀង

(ព្រះវិហារ-ស្វាយរៀង)៖ នៅព្រឹកថ្ងៃអាទិត្យទី១៥ ខែឧសភា ឆ្នាំ២០២២កន្លងទៅនេះ លោកស្រី ហ៊ុន ម៉ាណា អគ្គនាយការវិទ្យុ និងទូរទស្សន៍បាយ័ន និងជាប្រធានក្រុមវេជ្ជសាស្ត្រសម្ដេចតេជោ បានអញ្ជើញដឹកនាំក្រុមគ្រូពេទ្យស្ម័គ្រចិត្តចុះពិនិត្យ ព្យាបាលជំងឺជូនកងទ័ព, គ្រួសារកងទ័ព និងប្រជាពលរដ្ឋ សរុបចំនួន ១,៧៦៩នាក់។

ពិធីនេះធ្វើឡើងនៅបរិវេនកងពលតូចអន្តរាគមន៍លេខ៧ ក្នុងភូមិសែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ។ ពិធីនេះ ក៏មានការអញ្ជើញចូលរួមពីសំណាក់លោកឧត្តមសេនីយ៍ឯក ស្រី ឌឹក មេបញ្ជាការរងកងទ័ពជើងគោក និងជាមេបញ្ជាការកងអន្តរាគមន៍លេខ៣, លោក សួស យ៉ារ៉ា អ្នកតំណាងរាស្រ្តមណ្ឌលព្រះវិហារ និងលោកស្រី ប៉ាង រ៉ាវី អភិបាលរងខេត្តព្រះវិហារ។

លោកស្រី ហ៊ុន ម៉ាណា ប្រធានក្រុមវេជ្ជសាស្រ្តសម្តេចតេជោ បានមានប្រសាសន៍សំណេះសំណាល និងពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនប្រជាពលរដ្ឋដែលបានចូលរួម។ លោកស្រីមានប្រសាសន៍ថា សម្តេចតេជោ និងសម្តេចកិត្តិព្រឹទ្ធបណ្ឌិត តែងតែគិតគូរយកចិត្តទុកដាក់ដល់ប្រជាពលរដ្ឋគ្រប់ទីកន្លែង និងគ្រប់ពេលវេលា។ លោកស្រី ក៏បានថ្លែងអំណរគុណអាជ្ញាធរគ្រប់លំដាប់ថ្នាក់នៃស្រុកជាំក្សាន្ត ដែលបានសម្របសម្រួលដល់បងប្អូនប្រជាពលរដ្ឋឱ្យបានអញ្ជើញមកដល់ទីតាំងពិនិត្យ ពិគ្រោះ និងព្យាបាលជំងឺដោយឥតគិតថ្លៃនេះ។

មុនការពិនិត្យ ពិគ្រោះ និងព្យាបាលជំងឺ ក្រុមការងារបានផ្តល់ជូនអាហារសម្រន់នៅពេលព្រឹកមានជានំបញ្ចុក នំបុ័ង និងភេសជ្ជៈ ឲ្យប្រជាពលរដ្ឋទទួលទានផងដែរ។

ក្រុមការងារបានចែកវែនតាសម្រាប់លោកយាយ លោកតាចំនួន ៥០០នាក់, សម្ភារសិក្សាសម្រាប់សិស្សានុសិស្ស, ខោអាវលោកយាយលោកតា និងចែករទេះរុញសម្រាប់ជនពិការចំនួន១០គ្រឿង ជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត។

លទ្ធផលនៃការព្យាបាល ក្នុងចំនួន ១,៧៦៩នាក់នេះ រួមមាន៖ ការវះកាត់តូចបានចំនួន ៥២នាក់, ពិនិត្យព្យាបាលរោគស្ត្រីចំនួន ១០១នាក់, ពិនិត្យជំងឺទូទៅចំនួន ៩៣១នាក់, ពិនិត្យសម្ភព និងអេកូសាស្ត្រចំនួន៧០នាក់, និងពិនិត្យ ព្យាបាលមាត់ធ្មេញចំនួន១១៥នាក់។

នៅថ្ងៃដដែលនោះ លោកស្រី ហ៊ុន ម៉ាណា ក៏បានបន្តដំណើរឆ្ពោះមកកាន់ខេត្តស្វាយរៀង ជាមួយលោក ឌី វិជ្ជា ដើម្បីប្រគល់អំណោយផ្ទះទេវតា២ខ្នង និងប្រគេនទេយ្យវត្ថុដល់វត្តចំនួន៥។

ផ្ទះទេវតាចំនួន២ខ្នងនេះ បានប្រគល់ជូនទូរគតជន ជនចាស់ជរាគ្មានទីពឹង២គ្រួសាររួមមាន៖

១៖ លោកតា ដួង ឆុំ អាយុ៧៨ឆ្នាំ និងលោកយាយ គុជ ពេជ្រ អាយុ ៦៧ឆ្នាំ រស់នៅភូមិព្រែកត្នោត ឃុំសំបួ ស្រុករមាសហែកខេត្តស្វាយរៀង។ ផ្ទះនេះជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
២៖ លោកយាយ ម៉ៅ សំបូ អាយុ៩០ឆ្នាំរស់នៅភូមិចន្ត្រី ស្រុករមាសហែកខេត្តស្វាយរៀង។ ផ្ទះនេះជាអំណោយដ៏ថ្លៃថ្លារបស់លោក វណ្ណ ហុង និង ស្រី អ៉ីម ផាន វ៉ាន់ឌី តាមរយៈកម្មវិធីផ្ទះទេវតា។

លោកស្រី ហ៊ុន ម៉ាណា និងលោក ឌី វិជ្ជា បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេចទាំងពីរតែងគិតគូរពីសុខទុក្ខដល់ពលរដ្ឋគ្រប់ទីកន្លែង និងគ្រប់ពេលវេលា។

បន្ថែមលើអំណោយផ្ទះ លោកស្រី ក៏បានផ្តល់ជូនគ្រួសារដែលទទួលបានផ្ទះនីមួយៗ នូវអំណោយសម្តេចតេជោ និងសម្តេចកិត្តិព្រឹទ្ធបណ្ឌិតបន្ថែមទៀត រួមមានមួយផ្ទះ ទទួលបានអង្ករ ១០០គីឡូក្រាម, ត្រីខ ១កេស, មីចំនួន ៥កេស, ទឹកដោះគោខាប់ ១កេស, ពួក១, ប្រេងកូឡូ ១ប្រអប់ធំ, ប្រេងខ្យល់ ១ប្រអប់ធំ, ចានដែក១, ឆ្នាំងតូច១, ឆ្នាំងធំ១, ខ្ទះឆា១, វែងឆា១, វែងបាយ១, វែងសំឡ១, ស្លាបព្រា និងសម ១ឡូ, កំសៀវ១, ចានបាយចំនួន៥, ចានសម្លចំនួន៥, តែ ១គីឡូក្រាម, ខ្នើយចំនួន២, មុងចំនួន២, ភួយចំនួន២, កន្ទេលចំនួន២, ស្ករសចំនួន៥គីឡូក្រាមទឹកស៊ីអ៊ីវចំនួន៣យួរ, វិទ្យុFM12 ១គ្រឿង, ថ្មដាក់វិទ្យុចំនួន២ ស្បែកជើងចំនួន២គូរ, ថ្នាំនឹងច្រាសដុសធ្មេញចំនួន៥ឈុត, សាប៊ូដុំចំនួន១២ដុំតូច, ថ្នាំពេទ្យចំនួន៥ប្រអប់តូច, ខោអាវលោកយាយចំនួន២កំប្លេរ, ខោអាវលោកតាចំនួន២កំប្លេ, និងថវិកាចំនួន ៥០ម៉ឺនរៀល។

បន្ទាប់មកទៀត លោកស្រី ហ៊ុន ម៉ាណា និងលោក ឌី វិជ្ជា បានអញ្ជើញនាំយកទេយ្យវត្ថុ អ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី ប្រគេនដល់ដល់វត្តចំនួន៥ ហើយទេយ្យវត្ថុក្នុងមួយវត្តទទួលបាន៖

០១- អង្ករ១តោន
០២- ត្រីខ ចំនួន១កេស មាន១០យួរ
០៣- មីចំនួន៥កេសធំ(៣០កេសតូច)
០៤- ត្រីងៀតចំនួន ១០ គីឡូ
០៥- សាច់ក្រកចំនួន១០ គីឡូ
០៦- សាច់ជ្រូផាត់ចំនួន១០ គីឡូ
០៧- ទឹកដោះគោខាប់ ចំនួន២កេ០៨- កាហ្វេ ចំនួន ៥កញ្ចប់ធំ
០៩- តែ ចំនួន ២គីឡូក្រាម
១០- ស្ករសចំនួន១បេ
១១- អំបិលចំនួន១បេ
១២- ប៊ីចេងចំនួន១បេ
១៣- ទឹកត្រីចំនួន៥យួ
១៤- ទឹកស៊ីអ៊ីវចំនួន៥យួរ
១៥- សាប៊ូដុំ ចំនួន ៣០ ដុំតូច
១៦- ច្រាស និងថ្នាំដុសធ្មេញ ចំនួន១០០ឈុត
១៧- វីតាមីនសេ ចំនួន ១០ ប្រអប់
១៨- ប្រេងកូឡា ចំនួន ៥ ដុំ
១៩- ប្រេងខ្យល់ ចំនួន៥ដុំ
២០- ម៉ាស ចំនួន២០ប្រអប់ មាន១០០០ម៉ាស
២១- អាល់កុលសម្លាប់មេរោគ ចំនួន៤កាន
២២- ដបសំរាប់ដាក់អាល់កុល ចំនួន១០ ដប
២៣- ស្លាដក់ចំនួន៥៥
២៤- ថវិកា ចំនួន២លានរៀល៕