លោក វ៉ា ថន អភិបាលខេត្តក្រចេះ នារសៀលថ្ងៃទី២៤ ខែមិថុនា ឆ្នាំ ២០២៦ បានទទួលជួបជាមួយលោក ហោ ដារ៉េត អនុព័ន្ធពាណិជ្ជកម្មកម្ពុជាប្រចាំប្រទេសវៀតណាម អមស្ថានឯកអគ្គរាជទូតកម្ពុជាប្រចាំសាធារណរដ្ឋសង្គមនិយមវៀតណាម រួមជាមួយតំណាងក្រុមហ៊ុនវិនិយោគអន្តរជាតិចំនួន៣០ មកពីប្រទេសវៀតណាម អាល្លឺម៉ង់, ម៉ាឡេស៊ី, អ៉ីស្រាអែល, សិង្ហបុរី និងក្នុងប្រទេសកម្ពុជា ដើម្បីស្វែងយល់ឱកាសពាណិជ្ជកម្ម ការផ្គូផ្គងដៃគូធុរកិច្ច និងឱកាសវិនិយោគស្ថិតក្រោម កម្មវិធីពិសេសជំរុញការវិនិយោគ ក្នុងខេត្តភូមិភាគឦសាន (២០២៥-២០២៨) ដោយផ្តោតទីលើវិស័យកសិកម្ម-កសិឧស្សាហ៍កម្ម និងទេសចរណ៍ ។
នាឱកាសនោះលោក ហោ ដារ៉េត បានគូសបញ្ចាក់ថា រាជរដ្ឋាភិបាលបានយកចិត្តទុកដាក់ និងលើកទឹកចិត្តដល់អ្នកវិនិយោគ ដែលមានគម្រោងក្នុងការវិនិយោគជាមួយខេត្តទាំងបួន នៃប៉ែកឦសានប្រទេសកម្ពុជា ដោយផ្ដល់ការលើកទឹកចិត្តលើសពី ច្បាប់ស្ដីពីការវិនិយោគរបស់កម្ពុជាដែលការលើកទឹកចិត្តសំខាន់ៗរួមមាន៖ការលើកលែងពន្ធដារមួយចំនួន និងការកាត់បន្ថយការចំណាយដើមទុនសម្រាប់វិនិយោគិន, ការអនុញ្ញាតឱ្យសកម្មភាពធុរកិច្ច ដែលមិនទាន់បានចុះបញ្ជី, អាចចុះបញ្ជីដោយស្ម័គ្រចិត្តដើម្បីទទួលបានការអនុគ្រោះ, ដើម្បីស្វែងយល់បន្ថែមអំពីចក្ខុវិស័យ និងសក្តានុពលនៃកម្មវិធីពិសេសជំរុញការវិនិយោគក្នុងខេត្តទាំងបួននៅភាគឦសាននេះ ។
នាឱកាសនោះលោក វ៉ា ថន បានថ្លែងអំណរគុណចំពោះតំណាងក្រុមហ៊ុនវិនិយោគ ដែលមានបំណងចង់វិនិយោគនៅខេត្តក្រចេះ ដើម្បីចូលរួមជម្រុញការអភិវឌ្ឍន៍សេដ្ឋកិច្ចភូមិភាគឦសាន និយាយជារួមនិង និងនិយាយដោយឡែក គឺសម្រាប់ខេត្តក្រចេះស្របតាមគោលនយោបាយរបស់រាជរដ្ឋាភិបាល ។ នេះគឺជាសក្ខីភាពនៃឆន្ទៈនយោបាយយ៉ាងមោះមុតរបស់រាជរដ្ឋាភិបាល នៅក្នុងកិច្ចខិតខំប្រឹងប្រែងការពារសន្តិភាព ស្ថិរភាព ឯករាជ្យភាព និងបូរណភាពទឹកដី ក៏ដូចជាការខិតខំពង្រីក និងចែកចាយផលលាភ ពីកំណើនសេដ្ឋកិច្ច ទៅដល់គ្រប់មជ្ឈដ្ឋាននៃប្រជាជនខ្មែរ ។
លោក វ៉ា ថន បានបន្ថែមថា កម្មវិធីពិសេសជំរុញការវិនិយោគនេះគឺក្នុងគោលដៅប្រែក្លាយខេត្តភូមិភាគឦសានឱ្យក្លាយជាប្រភពកំណើនសេដ្ឋកិច្ចថ្មី ដើម្បីជំរុញឱ្យមានការវិនិយោគឯកជនកាន់តែសកម្ម បង្កើតជាចរន្តសេដ្ឋកិច្ច បង្កើតការងារ និងភាពទាក់ទាញ ប្រមូលផ្តុំប្រជាជនយើងឱ្យ ទៅប្រកបអាជីវកម្ម និងរស់នៅកាន់តែច្រើនឡើង នៅក្នុងតំបន់នេះក្នុងខេត្តភូមិភាគឦសាន។
លោក វ៉ា ថន មានសេចក្ដីសង្ឃឹមជឿជាក់យ៉ាងមុតមាំថា ឱកាសសហប្រតិបត្តិការ និងភាពជាដៃគូថ្មីៗ នឹងរួមមានសម្រាប់ខេត្តក្រចេះ ដើម្បីរួមចំណែកដល់ការអភិវឌ្ឍអាជីវកម្ម និងការវិនិយោគប្រកបដោយចីរភាព។ ក្នុងនាមថ្នាក់ដឹកនាំខេត្ត ប្រជាពលរដ្ឋក្នុងខេត្តក្រចេះ សូមស្វាគមន៍យ៉ាងកក់ក្ដៅបំផុតចំពោះអ្នកវិនិយោគ សហគ្រិន និងដៃគូធុរកិច្ចទាំងអស់ដែលបានអញ្ជើញមកសិក្សាស្វែងយល់អំពីឱកាសវិនិយោគនៅក្រចេះ។
អភិបាលខេត្តក្រចេះ បានបញ្ជាក់ទៀតថា វត្តមានរបស់តំណាងក្រុមហ៊ុនអន្តរជាតិមកដល់ខេត្តក្រចេះនាពេលនេះ ជាសក្ខីភាពបង្ហាញពីការចាប់អារម្មណ៍និងទំនុកចិត្តចំពោះសក្តានុពលសេដ្ឋកិច្ច និងបរិយាកាសវិនិយោគនៅក្នុងខេត្ត ហើយក្នុងនាមអាជ្ញាធរខេត្ត និងមន្ទីរ-អង្គភាពពាក់ព័ន្ធ ប្តេជ្ញាសម្របសម្រួល ផ្តល់កិច្ចសហការការគាំទ្រ និងបង្កើតបរិយាកាសអំណោយផល ដើម្បីឱ្យការវិនិយោគរបស់លោកអ្នកអាចប្រព្រឹត្តទៅដោយរលូន ប្រកបដោយប្រសិទ្ធភាព និងនិរន្តរភាព ៕
